DWIZ 882

Ibinasura ng Commission on Elections (COMELEC) ang election protest na inihain laban kay Manila mayor Honey Lacuna.

Sa kautusang inilabas ng komisyon noong Huwebes at isinapubliko kahapon, ibinasura nito ang alegasyong “Massive Acts of Vote Buying” na isinampa ni Mayoral candidate at lawyer Alex Lopez laban kay Lacuna.

Sa kasagsagan ito ng halalan noong Mayo kung saan nagwagi sa pwesto si Lacuna na nakakuha ng mahigit 500,000 boto kumpara sa mahigit 166,000 boto ni Lopez.

Ayon sa COMELEC, walang sapat na dokumento at patunay na ipinakita si Lopez na sangkot sa pagbili ng boto ang bagong Alkalde ng Maynila.

Ikinatuwa naman ni Lacuna ang desisyon ng COMELEC.

Abiso sa mga motorista!

Malakihang oil price hike ang naghihintay sa mga motorista ngayong darating na Martes.

Ayon sa mga kumpanya ng langis, posibleng pumalo sa P6 hanggang P6.30 centavos ang taas-presyo sa kada litro ng diesel.

Madaragdagan naman ng P1.20 centavos hanggang P1.40 centavos ang kada litro ng gasolina.

Samantala, ang kerosene ay tataas din ang presyo na posibleng maglaro sa P3.50 centavos hanggang P3.70 centavos kada litro.

Matatandaang una rito, sinabi ni Oil Industry Management Bureau director Rino Abad na ang malaking dagdag-presyo ay dahil sa desisyon ng Organization of Petroleum Exporting Countries (OPEC) na bawasan ang produksyon ng langis ng dalawang milyong bariles kada araw.

Pinaghahanda na ng lokal na pamahalaan sa Albay, Bicol ang mga residente roon kaugnay sa posible pang pag-alburuto ng Bulkang Mayon.

Ayon sa Albay Provincial Disaster Risk Reduction and Management Council (PDRRMO), posibleng itaas pa sa Alert level 3 ang Bulkang Mayon kung magpapatuloy ang pagbabantang pagputok nito.

Noong Biyernes nang itinaas na ng Philippine Institute of Volcanology and Seismology (PHIVOLCS) ang Alert level 2 sa Bulkang Mayon at nagbabala pa sa maaaring explosion nito.

Agad namang pinaalalahanan ng PDRRMO ang mga residente ng ilang barangay na umiwas na sa 6-kilometer-radius permanent danger zone.

Ang Bulkang Mayon ay ang pinaka-aktibong bulkan sa Pilipinas.

Nakapagtala ng isang volcanic quake ang Philippine Institute of Volcanology and Seismology (PHIVOLCS) sa bulkang Mayon sa nakalipas na 24-oras.

Ayon PHIVOLCS, naitala rin ang moderate emission ng white steam-laden plumes sa nakalipas na isang araw.

Inabisuhan pa rin ng PHIVOLCS ang publiko na manatiling alerto dahil sa mga shallow magmatic processes na posibleng magresulta sa phreatic o mas malalang magmatic eruptions.

Noong Oktubre a-1, papalo sa halos 400 tonelada ang sulfur dioxide emission ng bulkan bawat araw.

Dahil dito, ipinagbabawal pa rin ang pagpasok sa anim na kilometrong permanent danger zone ng bulkan upang mabawasan ang mga panganib mula sa biglaang pagsabog, pagbagsak ng bato, at pagguho ng lupa.