DWIZ 882

Higit 243 million doses ng bakuna kontra COVID-19 ang na-i-proseso na ng Bureau of Customs-Port of Ninoy Aquino International Airport (BOC-NAIA).

Batay sa datos ng BOC, nabigyan na ng clearance ang walong iba’t ibang COVID vaccine brand, gaya ng Astrazeneca, Johnson and Johnson, Moderna, Pfizer, Sinopharm, Sinovac at Sputnik V.

Naipamahagi agad ng customs ang mga bakuna sa pamamagitan ng advanced clearance procedures.

Gayunman, binabantayan ang mga nasabing bakuna ng Covax special handling task force o mga miyembro ng security and operations unit ng BOC. —sa panulat ni Jenn Patrolla

Kailangang magkaroon ng hiwalay na polisiya ang gobyerno sa pagsusulong ng salary standardization para sa mga guro sa pribado at pampublikong paaralan.

Sa panayam ng DWIZ kay Benjo Basas, Chairperson ng Teachers Dignity Coalition (TDC), inaasahan niyang may “last tranche” salary adjustment sa susunod na taon o hanggang 2024.

Aminado si Basas na hindi na nakasasabay sa sahod sa mga public school ang sahod ng mga guro sa mga pribadong paaralan sa gitna ng patuloy na pagtaas ng presyo ng mga bilihin. —sa panulat ni Jenn Patrolla

Mahigit isang milyong pisong halaga ng financial assistance ang ipinagkaloob ng Department of Agriculture sa mga magsasaka at mangingisda matapos ang pananalasa ng Bagyong Karding sa bayan ng Polillo, Quezon.

Ayon kay OIC Regional Executive Director Milo Delos Reyes, sa kabila ng mga sakuna ay walang humpay ang pagsuporta ng kagawaran sa paglilingkod upang tiyakin ang produksyon ng pagkain.

Kabilang sa mga naipamahagi ang binhi ng gulay at mais, pataba, soil conditioner, veterinary drugs, materyales na kailangan sa mga nasirang bangka at iba pang mga kagamitan.

Nagmula ang pondo sa rice program, high value crops, corn, livestock ng Bureau of Fisheries and Aquatic Resources.  —sa panulat ni Jenn Patrolla

Pansamantalang sinuspinde ng PNP ang visiting hours sa custodial facility sa Camp Crame matapos ang pag-hostage kay dating senador na si Leila De Lima.

Ito, ayon kay PNP Spokeperson, Col. Jean Fajardo, ay habang isinasagawa ang imbestigasyon sa kaso.

Kumpirmado anyang mga miyembro ng Abu Sayyaf ang mga suspek na sina Arnel Cabintoy, Idang Susukan at Feliciano Sulayao Junior.

Samantala, inilipat na sa ibang ospital ang pulis na si Corp. Roger Agustin na sinaksak ng hostage takers. —sa panulat ni Jenn Patrolla

Umabot na sa 6.5 million pesos ang pabuya para sa makapagtuturo sa pumatay sa beteranong broadcaster na si Percival Mabasa o Percy Lapid.

Ayon kay House Speaker Martin Romualdez, umabot sa limang milyong piso ang nalikom mula sa ambagan nilang mga kongresista bukod pa sa 1.5 million pesos mula kina DILG Secretary Benhur Abalos at dating Manila Mayoralty Candidate, Atty. Alex Lopez.

Lahat ng miyembro anya ng kamara ay may malasakit kay Ka Percy at iginiit na dapat mahanap sa lalong madaling panahon ang nasa likod ng pagpaslang sa broadcaster. —sa panulat ni Jenn Patrolla

Pipirmahan na bukas, Lunes ni Pangulong Ferdinand Marcos Jr. ang batas na magre-require sa mga sim card users sa bansa na mag-register sa mga Public Telecommunications Entities (PTEs).

Ayon sa Office of the Press Secretary (OPS), ang seremonyal na paglalagda sa Sim Card Registration Act ay gaganapin sa Malacañang na dadaluhan ng mga mambabatas at opisyal mula sa presidential legislative liason office.

Sa ilalim ng panukala, ang mga direct sellers ng sim cards ay aatasang i-require ang mga users na magpresenta ng valid identification document na mayroong photo.

Aatasan din ang mga telecommunication firms na i-disclose ang buong pangalan at address ng users sakaling magkaroon ng subpoena o kautusan galing sa korte.

Matatandaang i-vineto ni dating Pangulong Rodrigo Roa Duterte noong abril ang naunang version ng panukala dahil ayon sa kaniya ay kailangan pa itong pag-aralan.

Samantala, nagpahayag naman ng suporta at kahandaan sa pagpapatupad ng batas ang mga major telecommunications company sa oras na maisabatas na ang panukala.–-mula sa panulat ni Hannah Oledan