DWIZ 882

Kanya-kanyang tipid ang mga mamimili sa pamimili ng mga Christmas Decoration bunsod ng mataas na inflation na naitala kamakailan.

Pumalo na kasi sa 6.9 % ang inflation sa bansa, dahilan kung bakit nagsipag-taasan ang mga bilihin.

Ayon sa mga supplier ng mga dekorasyon, kung noo’y bultuhan bumili ang kanilang mga suki ngayon ay pakonti-konti nalang.

Anang ibang supplier, bahagya na rin nilang tinaasan ang presyo ngunit mas mababa pa rin kaysa sa mga mall.

Unti-unti na ring dinadagsa ng mga mamimili ang dapitan sa Quezon City dahil sa mga murang paninda nito.

Sa kabilang banda isinusulong naman ng isang mall sa Mandaluyong ang pagpapatupad ng Christmas market para itampok ang mga dekorasyon at pang-regalo na gawa sa lokal na materyales. - sa panunulat ni Hannah Oledan 

Ikinababahala ng ilang frontliners ang hindi pagbibigay ng Philippine Overseas Employment Association (POEA) ng Overseas Employment Certificate na magpapahintulot sa kanila upang mangibang-bansa.

Ito ay dahil 7,000 Health Care Workers (HCW) lamang ang maaaring ideploy ng pamahalaan sa buong taon dahil sa deployment cap.

Ngunit ayon sa Department of Migrant Workers (DMW) , bagamat nasa 6,543 na ang na-deploy na HCW, 2,246 dito ay dumaan sa government deployment o exempted kaya’t may 2,703 pa na maaaring i-deploy hanggang katapusan ng taon.

Ayon naman sa latest advisory ng DMW, ang deployment cap ay para lamang sa nurses, nursing assistant, at nursing aids ngunit binabantayan din ang mga mission critical skills tulad ng medical technology.

Mababatid na ayon sa DOH, nasa 200 HCW ang kakulangan sa Pilipinas dahil sa kaliwa’t kanan na pagre-resingn ng mga frontliners upang maghanap ng mas magandang oportunidad sa ibang bansa. - sa panunulat ni Hannah Oledan 

Nakasubsob sa isang sulok malapit sa creek ang isang lalaki matapos umanong makipagbarilan sa mga pulis.

Patay ang 21 taong gulang na si John Philip Rodriguez matapos paputukan ng mga rumerespondeng pulis sa isang iligal na tupadahan sa lugar.

Ayon kay Police Lt. Col. Roldante Sarmiento, hindi naman talaga si Rodriguez ang kanilang target.

Matapos masita ng mga operatiba ay bigla na lamang aniya itong tumalon sa kaniyang motorsiklo atsaka bumunot ng baril.

Giit pa ni Sarmiento, dinipensahan lamang ng mga pulis ang kanilang sarili.

Aminado naman ang mga kaanak ng nasawi na may 3 kaso na ito dahil sa pagkakasangkot sa pamamaril ngunit anila, pinalabas lamang na nanlaban ang kapatid nila.

Giit naman ng mga otoridad, normal na sa kanila ang alibi mula sa mga kaanak ng mga suspek.

Narekober naman ang kalibre .38 na baril na ginamit ni Sarmiento at ang sinakyan nitong motorsiklo. - sa panunulat ni Hannah Oledan 

Iimbestigahan ng Department of Health (DOH) ang dahilan ng diarrhea outbreak sa Quezon Province.

Ayon sa DOH, tinamaan ng diarrhea ng ilang miyembro ng indigenous dumagat tribes sa lalawigan kung saan 36 na ang naiulat na kaso kabilang ang 6 na nasawi dahil sa severe dehydration mula Setyembre 26 hanggang Oktubre.

Sinabi naman ni Ariel Valencia, Regional Director ng DOH CALABARZON na marami ang namamtay dahil hindi agarang nadadala ang mga pasyente sa mga primary health care facilty para ma-diagnose.

Samantala, nakikipag-ugnayan na ang ahensya sa Integrated Provincial Health Office upang magpaabot ng tulong.

- sa panunulat ni Hannah Oledan

Inihayag ng embahada ng Pilipinas sa Thailand na wala itong natanggap na ulat hinggil sa Pilipinong nasaktan sa mass shooting sa isang daycare center sa Thailand nitong Huwebes.

Ayon sa Embahada, nakikipag-ugnayan na ito sa mga otoridad ng Thailand upang suriin kung mayroong Pilipino sa 37 katao na namatay kabilang ang 24 na bata.

Sinabi rin ni Philippine Ambassador to Thailand millicent cruz-paredes na handa ang embahada na magbigay ng karampatang tulong sa sinumang pilipinong apektado.

Samantala, nagpahayag naman ng pakikiramay ang embahada sa mga indibidwal na nasawi.

Kinilala naman ni Police Colonel Jakkapat Vijitraithaya ang gunman na si Panya Khamrab na dating pulis.

Kalaunan, binaril ni Khamrab ang asawa’t anak sa kanilang tahanan at saka pinatay ang sarili. – Sa panunulat ni Hannah Oledan 

Iminungkahi ng miyembro ng Interim Bangsamoro Parliament na bumuo ng ahensya na tututok sa pagpapalago ng turismo sa Bangsamoro Autonomous Region in Muslim Mindanao (BARMM)

Ayon kay Amir Mawallil, napapanahon ang pagbuo ng isang ministry dahil sa mabilis na paglago ng tourism sector

Kaya naman isinusulong ni Mawallil ang BTA Proposed Bill no. 13 na bubuo ng ministry ng turismo.

Sa kasalukuyan ay sakop ng Ministry of Trade, Industry and Tourism (MTIT) ang turismo sa rehiyon.

Ayon kay Mawallil, ang Ministry of Tourism ang tututok sa pagpapaunlad at pagsulong ng turismo sa BARMM bilang isang major socio-economic activity na lilikha ng trabaho.

Tututukan din ng ministry of tourism ang pagpapakalat ng benepisyo ng turismo sa mas malawak na populasyon ng Bangsamoro. - sa panunulat ni Hannah Oledan