DWIZ 882

“Huwag nang ikulong si Mary Jane Veloso sa correctional Institute for Women sa Mandaluyong”

Ito ang panawagan sa pamahalaan ng kaniyang ina na si Celia Veloso, sa panayam ng DWIZ, dahil sa nasabing kulungan din aniya nakapiit ang isa sa mga dahilan ng pagkakakulong ni Mary Jane sa Indonesia na si Maria Cristina Sergio.

Dagdag pa ng ina ni Mary Jane na sana ay ilagay sa ligtas na lugar ang kaniyang anak.

Nagpasalamat din si ginang Celia sa mga tumulong upang makabalik na ng Pilipinas ang kaniyang anak partikular na sa pamahalaan ng Indonesia at Pilipinas.  Sa panulat ni Riz Calata

Sinabon ni Senator Alan Peter Cayetano si Health Secretary Ted Herbosa sa budget deliberations ng Department of Health sa plenaryo.

Kaugnay ito sa kawalan ng aksyon ng DOH Sa ipinasarang mga health centers at lying-in clinics sa 10 Embo barangays na idineklarang bahagi ng Taguig City.

Ayon kay Senador Cayetano, hindi tinupad ni secretary Herbosa ang pangako nitong padadalhan ng mobile clinics at gamot ang mga Embo barangays nang ikandado ang mga ito ng Makati City local government.

Aminado ang mambabatas na inakala niyang magiging Solomon ang kalihim sa pagitan ng girian ng Makati at Taguig pero tila naging Pontio Pilato o naghugas kamay.

Nadisyama si Cayetano nang sagutin ito ni Herbosa na tumutulong ang Makati sa mga pasyente mula sa Embo barangays sa pamamagitan ng medical assistance to indigent patients na programa ng DOH.

Personal na dinalaw ni Vice President Sara Duterte kagabi ang kanyang Chief-of-Staff na si Undersecretary Zuleika Lopez, na nakapiit sa kamara.

Kinumpirma ni House Secretary General Reginald Velasco na bago mag-alas otso ng gabi nang dumating si VP Duterte sa tanggapan ng kapatid nitong si Davao Rep. Paolo Duterte.

Nagkita na lamang sa visitors center ng Batasan Pambansa sa Quezon City, sina VP Sara at Lopez dahil tapos na ang regular visiting hours na alas otso ng umaga hanggang alas singko ng hapon.

Sa kamara anya, partikular sa tanggapan ni Congressman Duterte, natulog ang pangalawang pangulo at buong contigent nito at hanggang kaninang umaga ay nasa batasang pambansa pa ito.

Magugunitang pina-contempt ng House Committee on Good Government and Public Accountability si Lopez makaraang kumpirmahing lumagda siya sa liham na humihiling sa Commission on Audit na huwag isumite sa House Appropriations panel ang audit reports ng confidential fund ng OVP at Department of Education noong 2022 at 2023.

Napabilang ang palawan sa 2024 world’s “Most desirable islands.”

Batay sa UK-based publication na Wanderlust Travel magazine, nasa ika-10 pwesto ang palawan sa nasabing listahan.

Nakilala ang Palawan dahil sa tropical landscapes, clear waters, at white-sand beaches nito.

Samantala, hinirang naman ang Sri Lanka bilang Most Desirable Island sa buong mundo, habang pumangalawa naman sa nasabing listahan ang Taiwan, at pangatlo ang Puerto Rico.

Matapos lumutang ang pangalang Mary Grace Piattos, isang ‘Kokoy Villamin’ naman ang lumitaw sa mga kuwestyunableng resibo na isinumite ng Office of the Vice President at Department of Education.

Sa pagdinig ng House Committee on Good Government and Public Accountability, lumabas ang nasabing pangalan sa iba’t ibang acknowledgement receipts na may magkakaibang sulat-kamay at lagda.

Una nang  lumitaw ang pangalang “Mary Grace Piattos,” na pinagsamang pangalan ng isang kainan at sitsirya, na umani ng negatibong reaksyon mula sa publiko.

Sa kabila ng isang milyong pisong pabuya tungkol sa katauhan ni Piattos, wala pa ring lumalapit o nagbibigay ng impormasyon hinggil dito.

Pinatutsadahan ni House Majority Leader at Zamboanga City Second District Representative Manuel Jose “Mannix” Dalipe si Vice President Sara Duterte sa kanyang estratehiya ng paglihis ng isyu upang makaiwas sa pananagutan sa siansabing maling paggamit ng 612.5 millions pesos confidential funds na inilaan sa Office of the Vice President at Department of Education sa ilalim ng kanyang pamumuno.

Ayon kay Congressman Dalipe, dapat nang itigil ng bise presidente ang taktika at pambubudol dahil patuloy anyang ginagamit ni VP Sara ang kanyang Chief of Staff bilang human shield.

Giit pa ng kongresista panahon na para harapin ang kongreso; sagutin ang mga tanong ng mambabatas at itigil na ang pamimintang sa iba para takasan ang mga pananagutan.

Ipinunto pa ng mambabatas na ang hindi pagdalo ng pangalawang pangulo sa pagdinig ng House Committee on Good Government and Public Accountability ay pagpapakita ng kaduwagan dahil hinihanyaan na lamang nito ang kanyang mga tauhan na humarap sa problema ng OVP.

Patuloy na tinatalakay ng pamahalaan ng Pilipinas at Indonesia ang mga kondisyon para sa pagpapauwi kay Mary Jane Veloso sa bansa.

Sa isang joint statement, sinabi ng Department of Justice at Department of Foreign Affairs na handang tumalima ang Pilipinas sa mga kundisyong itatakda ng pamahalaan ng Indonesia sa kaso ng naturang pinay.

Binigyang diin pa ng dalawang ahensya na obligadong kilalanin at sundin ng pamahalaan ang anumang mapagkakasunduang kondisyon.

Gayunman, hindi anila saklaw dito ang parusang kamatayan laban kay Veloso, dahil ipinagbabawal ito sa batas ng Pilipinas.

Nagpatung-patong na ang mga akusasyon laban kay Vice President Sara Duterte at sa ilang opisyal ng OVP at Department of Education.

Ayon ito kay Political Analyst Ronald Llamas, at ipinunto na dahil ito sa patuloy na pang-iisnab ng mga opisyal sa pagdinig ng kamara kaugnay sa usapin ng confidential funds.

Giit pa ni Llamas, dumarami na ang mga suspisyon ng mga kongresista dahil hindi anya masagot ng mga opisyal ang mga simpleng tanong sa pagdinig.

Matataandaang nagsasagawa ng imbestigayson ang House Committee on Good Government and Public Accountability upang alamin kung saan napunta ang confidential funds ng dalawang tanggapan noong 2022 at 2023 na siya namang pinamumunuan ni Vice President Duterte.- sa panulat ni Kat Gonzales

Tumangging mag-komento si Vice President Sara Duterte kaugnay kay “Mary Grace Piattos.”

 Ayon kay VP Sara, hindi dumaraan sa kaniya ang lahat ng mga papel o dokumento sa OVP.

Wala rin anya siyang nakitang acknowledgment receipts kung saan nakasulat ang pangalang Mary Grace Piattos na tumanggap ng confidential fund.

Una rito, kinuwesyton ng House Good Government Committee ang nasa mahigit isanlibong sinasabing kahina-hinalang acknowledgment receipts na pinirmihan ni piattos na siya namang isinumite ng OVP sa COA. - sa panulat ni Kat Gonzales