DWIZ 882

Aminado si Pangulong Ferdinand Marcos Jr. na matagal nang problema ang paggamit ng mga paaralan bilang evacuation centers, na nakahahadlang sa pangunahing layunin ng mga ito na magtaguyod ng pagkatuto at creativity.

Ginawa ni Pangulong Marcos ang pahayag matapos lagdaan ang ligtas Pinoy Centers Act at Student Loan Payment Moratorium During Disasters and Emergencies Act sa Malakanyang.

Tiniyak naman ng Presidente sa Department of Education na ang mga paaralan ay magiging sentro na lamang ng pagpapabuti sa kapakanan ng mga mag-aaral.

Kasabay nito, ipinag-utos ni PBBM sa Department of Public Works and Highways (DPWH) ang agarang pagtatayo ng mga evacuation center sa mga prayoridad na Local Government Units (lgus), alinsunod sa minimum standards, national building code, at iba pang lokal na pangangailangan.

Inatasan din ang Commission on Higher Education (CHED) at Technical Education and Skills Development Authority (TESDA) na magbigay ng lahat ng uri ng tulong sa mga estudyante upang matiyak na ang kanilang mga suliraning pinansyal ay hindi magiging hadlang sa pagtatapos ng kanilang edukasyon.

Samantala, pinasalamatan din ni Pangulong Marcos ang mga mambabatas na aniya’y nasa likod ng dalawang bagong batas, at sinabing ito ay patunay ng kanilang pangakong unahin ang kapakanan ng taumbayan.

Bumaba ang unemployment rate o bilang ng mga walang trabaho sa bansa sa ikatlong quarter ng 2024.

Naitala sa pinakahuling Labor Force Participation survey ng Philippine Statistics Authority ang 3.9% na unemployment rate nuong Oktubre, mas mababa sa 4.7% na naitala nuong Hulyo.

Gayunman, kung ikukumpara ang nasabing datos nuong setyembre, mas mataas ito ng 3.7% unemployment rate o katumbas ng 1.97 million na mga Pilipinong walang trabaho.

Paliwanag naman ni PSA Chief at National Statistician Dennis Mapa, isa sa nakikita nilang dahilan ng pagtaas ng bilang ng mga jobless ay ang pagtama ng magkakasunod na bagyo.

Samantala, umabot naman sa  96.1% ang employment rate o katumbas ng 48.16 milyong Pilipino ang may trabaho o negosyo nuong Oktubre.

Naitala rin sa kaparehong buwan ang 12.6% underemployed o mga manggagawang hindi napapasweldong sapat at nasa trabahong hindi angkop sa kanilang kakayahan.

Aminado si veteran Election Lawyer Romulo Macalintal na nasa kongresista na kung maisusulong ang impeachment complaints laban kay Vice President Sara Duterte.

Sinabi ni Atty. Macalintal sa DWIZ, mas mapapabilis ang pagproseso sa impeachment kung ang mga mambabatas mismo ang maghahain ng isang verified complaint laban sa Bise Presidente.

Naniniwala rin si Atty. Macalintal, na political strategy ni Pangulong Ferdinand Marcos Junior ang paghikayat sa kamara na huwag nang ituloy ang impeachment laban kay Vice President Sara Duterte.

Asahan na ang taas-singil sa kuryente sa susunod na taon

Ito’y matapos na aprubahan ng NGCP ang  70% na natitirang utang sa mga plantang nagbigay ng ancillary services noong pebrero na nagkakahalaga ng mahigit tatlong bilyong piso.

Dahil dito, namumuro ang 12 centavos na dagdag-singil sa kuryente mula enero hanggang marso 2025 sa Luzon consumers;

Gayundin sa visayas na magsisimula rin sa buwan ng enero hanggang Hunyo na aabot ng anim na buwan ang dagdag singil na 12 centavos kada kilo watt hour; at 3 centavos naman ang taas-singil sa mga taga-Mindanao mula  Enero hanggang Marso.

Paliwanag ni ERC Chairperson Monalisa Dimalanta, hindi na kayang ipagpaliban pa ang dagdag singil dahil magkakaroon lamang ito ng malaking epekto sa  rate ng bill sa darating na summer 2025.

Samantala, nagbabadya rin ang taas-singil ng meralco ngayong buwan dahil sa paghina ng piso kontra dolyar at outage sa ilang mga power plant bunsod ng mga nagdaang bagyo.

Tumaas ang demand ng lechon at ham sa gitna ng preparasyon para sa holiday season.

Dahil dito, tiniyak ng Department of Agriculture  sa mga mamimili na sapat ang supply ng baboy sa kabila ng epekto ng paglaganap ng African Swine Fever sa bansa.

Batay sa monitoring ng D.A., naglalaro sa 330 hanggang 400 pesos ang presyo ng kada kilo ng baboy; 160 hanggang 220 pesos kada kilo sa presyo ng manok;   beef rump na nasa 410 hanggang 492 pesos kada kilo;

Samantala, nagsisimula naman ng bumaba ang presyo ng mga gulay sa ilang pamilihan sa bansa matapos ang pananalasa ng mga nagdaang bagyo.

Tutulong na ang kongreso para mapababa ang presyo ng mga bilihin lalo na sa mga pagkain.

Ayon kay House Speaker Martin Romualdez, magsasanib-pwersa at mag-iimbestiga ang limang komite ng kongreso kung bakit mataas pa rin ang presyo ng mga pagkain gayung mababa naman ang presyo nito sa farmgate at presyo sa pandaigdigang kalakalan lalo na ang bigas.

Inatasan na ng opisyal ang Committee on Ways and Means; Food and agriculture, trade and Industry; Food Security; at social Services na alamin kung ang mataas na presyo ng bilihin ngayon ay dikta ng  monopolyo o smuggling.

Binigyang-diin pa ni Speaker Romualdez na wala silang sasantuhin kung sinuman ang nasa likod ng pagkontrol ng presyo ng bilihin at handa nila itong sampahan ng price manipulation o smuggling.

Marami ang hindi naniniwala na walang kinalaman si Pangulong Ferdinand Marcos Jr. sa inihaing impeachment complaint laban kay Vice President Sara Duterte.

 Ayon ito kay dating presidential legal counsel Atty. Salvador Panelo, na nagsabi ring  itinanggi lamang ni Pangulong Marcos ang hakbang upang hindi siya napagbintangang may pakana ng impeachment.

Para naman sa Political Analyst na si Dr. Froilan Calilung, tila naghugas-kamay ang pangulo sa naging pahayag nito na huwag nang pag-aksayahan ng panahon ng kamara ang impeachment laban sa Bise Presidente.

Aniya, malinaw naman na kontrolado ng Pangulo ang mayorya ng mababang kapulungan.

Magkakasa ng rally ang Iglesia ni Cristo bilang suporta sa pahayag ni Pangulong Ferdinand Marcos Jr., na tutulan ang impeachment complaint laban kay Vice President Sara Duterte.

Ayon sa INC, ang pagsasagwa ng mapayapang protesta ay upang suportahan ang panawagan ni Pangulong Marcos na huwag ng  ituloy ang paghahain ng impeachment complaint kay VP Sara dahil wala itong maidudulot na kabutihan para sa bansa.

Gayunman, nakahanda ang Philippine National Police sakaling matuloy ang nasabing rally ng INC kung saan mag-de-deploy na sila ng mga pulis para sa seguridad ng publiko.

Malaya pa rin ang mga Pilipino na bumiyahe sa South Korea, sa harap ng political tension kaugnay ng laban-bawing pagdedeklara ng martial law sa naturang bansa.

Sa bagong Pilipinas ngayon public briefing, sinabi ni Foreign Affairs Undersecretary Eduardo De Vega na wala pang itinatataas na alert level sa South Korea, at wala ring ipinatutupad na travel ban.

Gayunman, pinaalalahanan ni Usec. De Vega ang mga pilipinong magtutungo sa South Korea na dapat na batid nila ang kasalukuyang sitwasyon at iwasang magtungo malapit sa border o demilitarization zone.

Iniulat din ng DFA official na nananatiling kalmado ang mga overseas filipino worker sa naturang bansa.

Ayon sa DFA, tinatayang nasa 78,000 mga Pilipino ang nagtatrabaho sa South Korea, na karamihan ay machine operators, managers, at farm workers.

Nanindigan si dating presidential spokesman Harry Roque na hindi ito babalik ng pilipinas maliban na lamang kung ipag-u-utos ng korte suprema.

Ayon kay Atty. Roque, may karapatan pa rin siyang maglabas pasok ng bansa dahil wala itong hold-departure order at wala rin aniyang  arrest warrant  laban sa kanya.

Iginiit pa ng dating presidential spokesman na kung gusto ng Quad Committee ng hustisya para sa kanilang imbestigasyon kaugnay sa iligal na POGO, magtungo aniya sila sa korte at kung may katanungan ang mga ito handa niya itong sagutin via zoom.

Aniya, magsusumite siya ng mga dokumento na hinihingi ng quad comm sakaling ipag-utos ito ng supreme court subalit nanindigan ito bilang abogado na tama siya at karapatan nya na manahimik hinggil sa isyu.

Una nang kinumpirma ng Department of Foreign Affairs na personal na nagtungo si Roque at kanyang asawa sa Philippine Embassy sa Abu Dhabi para sa notarial services  na gagamiting dokumentaryo sa Pilipinas.

Si Roque ay nagsumite ng counter affidavit na naka-notarized sa UAE para sa inahaing reklamong qualified human trafficking laban sa kaniya na may kinalaman sa iligal POGO sa bansa.