DWIZ 882

Nais ng mga progresibong mambabatas na isapubliko ng Malacañang ang bagong water concession agreements sa Manila Water at Maynilad water services.

Ayon kay Bayan Muna Partylist representative Carlos Zarate, dapat makita ng taumbayan kung talagang tinanggal na ang sinasabing ‘onerous provisions’ sa bagong kontrata.

Sinabi ni Zarate na hindi dapat maging shotgun deal ang bagong kontrata.

Kung nais aniya ng pangulo na ibalik sa pamamahala ng pamahalaan ang water sector, dapat gawin na niya ito ngayon at huwag gamiting panakot sa Manila Water at Maynilad.

Una rito, sinabi ni Presidential spokesman Salvador Panelo, kapag hindi tinanggap ng Manila Water ang bagong kontrata ay mapipilitan ang pangulo na kanselahin ang kanilang concession agreement.

Nangako ng dagdag na P2-bilyon ang Japan para gawing matibay ang dalawang tulay sa Metro Manila.

Ayon kay Foreign Affairs Secretary Teddy Boy Locsin, layon nito na gawing mas matibay laban sa lindol ang Lambingan bridge sa Sta. Ana, Maynila at Guadalupe bridge.

Ipinaliwanag ni Locsin na ang pagtaas ng halaga ng proyekto ay bunga ng mga pagbabago sa construction technology na gagamitin sa mga tulay.

Unang nalagdaan ang paunang loan agreement na P4.5-bilyon nuong August 2015 subalit na extend ang proyekto hanggang August ng 2023.

Posibleng hindi umano makasama sa mandatory repatriation ang mga hindi dokumentadong manggagawang Pilipino sa Iraq.

Ayon sa isang OFW sa Iraq, 60 silang Pilipino ang direktang kinuha ng employer mula sa Pilipinas.

Hindi aniya malayo na naglagay  ang kanilang employer kaya nakapasok sila ng Iraq kahit pa mayroong deployment ban sa nasabing bansa.

Sinabi ng OFW na sinabihan sya ng kanyang employer na kung nais nilang makasama sa repatriation ay magbayad muna sila ng tig-8,000 dolyar dahil yun ang halagang ginastos niya para makapunta sila sa Iraq.

Tiniyak ng Malacañang na susundin ng Pangulong Rodrigo Duterte ang pangakong doblehin ang sahod ng mga guro tulad ng ginawa nya sa mga sundalo at pulis.

Ayon kay Presidential spokesman Salvador Panelo, hindi pa naman tapos ang termino ng pangulo kaya’t may panahon pa para matupad ang kanyang pangako sa mga guro.

Dapat anyang alalahanin ng mga guro na ang umento sa kanilang sahod ay nakasalalay kung magkano lamang ang pondo ng pamahalaan.

Una rito, dismayado ang mga guro dahil hindi naibigay ang inaasahan nilang umento sa sahod sa kabila ng pagkaka apruba sa 2019 Salary Standardization Law.

Mas mabilis na natapos ang traslacion ngayong taon kumpara nuong mga nakalipas na taon.

Inabot lamang ng mahigit 16 na oras ang naging prusisyon na nagsimula sa pag alis ng andas sa quirino grandstand alas 4:20 ng umaga at natapos sa pagbabalik nito sa loob ng quiapo church bandang alas 8: 45 ng gabi.

Ang huling pinakamabilis na traslasyon ay naitala nuong 2013 kung saan umabot lamang sa labing walong oras habang ang nakalipas na limang taon ay umabot naman ng tig 20 oras ang prusisyon.

Naging posible dahil sa inibang ruta ng prusisyon kung saan dumaan ito sa Ayala bridge sa halip na sa dati nitong ruta na Jones bridge.

Nagkaroon din ng mas mahigpit na seguridad ang mga pulis kung saan sa kauna – unahang pagkakataon ay nakilahok sa traslasyon ang mga unipormadong pulis.

Ipinagtanggol ng Malakanyang ang ipinatupad na mahigpit na seguridad ng Philippine National Police sa traslasyon ng itim na Nazareno.

Marami kasing mga deboto ang nadismaya sa presensiya ng napakaraming pulis kabilang pa ang pagbuo ng tinatawag na andas wall.

Ayon kay Presidential Spokesman Salvador Panelo, mandato ng pambansang pulisya na magpatupad ng mahigpit na seguridad para sa kaligtasan ng mga deboto.

Pina re-review ni Pangulong Rodrigo Duterte ang concession agreement sa pagitan ng gobyerno at beep card provider sa AF Payment Incorporated kasunod ng pagtataas ng halaga ng issuance fee ng beep card.

Ayon kay Presidential Spokesman Salvador Panelo, nais ng Pangulo na walang probisyon sa naturang kasunduan ang hindi sa kapakinabangan ng publiko.

Una nang ipinag utos ni Transportation Secretary Arthur Tugade ang pag re-review sa kontrata.

Matatandaang mula sa P20 at naging P30 na ang halaga ng beep card sa pagpasok ng 2020.

Dismayado ang Ecowaste Coalition sa tone–toneledang basura na iniwan ng mga deboto ng itim na Nazareno matapos ang traslacion ng itim na Nazareno.

Ayon sa grupo, binalewala ng mga deboto ang naging paalala ukol sa tamang pagtatapon ng mga basura at  pagpapanatili ng kalisinisan sa Quirino Grandstand at iba pang dinaanan ng prusisyon.

Sari–sari anilang basura ang mga nakuha sa naging ruta ng traslacion kabilang ang mga plastic bag, mga tirang bagkain, single use plastic, mga karton, bote na puno ng ihi at maging diaper.

Matatandaang hindi bababa sa 20 garbage trucks ang nakuhang basura ng MMDA at lokal na pamahalaan ng Maynila sa kanilang isinagawang paglilinis pagkatapos ng prusisyon.