DWIZ 882

Hindi bababa sa 10 ang sugatan sa pagsalpok ng isang pampasaherong jeep sa kasalubong na van ng Philippine Navy sa Barangay Bangkal Makati City, kagabi.

Batay sa imbestigasyon ng Makati City Police, patungong PRC ang jeep nang mag-overtake ito sa sinusundang sasakyan kaya sumalpok sa paparating na van ng Philippine Navy.

Walong pasahero ng jeep ang nagtamo ng minor injuries habang isinugod naman sa military hospital ang dalawang sakay ng van.

Samantala, tumakas naman ang driver ng jeep na nakilala lamang sa pangalang Rene Dela Cruz.

Sinibak na sa puwesto ang commanding officer ng 2nd infantry battalion at ng 9th infantry division ng Philippine Army na sangkot sa pagpapalabas ng minanipulang larawan ng mga sumukong rebelde sa Masbate noong nakaraang linggo.

Ayon kay Philippine Army Spokesman Lt. Col. Ramon Zagala, noong Martes pa, Enero 7 sinibak si Lt. Col. Napoleon Pabon.

Ito ay matapos aniyang aminin ni Pabon ang pagkakamali at akuin ang pananagutan sa kontrobersyal na edited pictures ang mga sumukong rebelde.

Dagdag ni Zagala, kanila nang nirerepaso ang polisiya sa pagpapalabas ng tamang impormasyon at ulat sa publiko kasunod ng insidente.

Samantala, muling iginiit ni Zagala na totoo ang pagbabalik pamahalaan ng mahigit 300 mga dating rebelde at pagsuko ng 45 armas. — ulat mula kay Jaymark Dagala (Patrol 9)

Kakasuhan ng National Capital Region Police Office (NCRPO) ang nasa 59 na mga debotong lumabag sa mga ipinatupad na ordinansa ng lungsod ng Maynila sa kasagsagan ng Traslacion ng itim na Nazareno.

Ayon kay NCRPO acting Director Brig. General Debold Sinas, hindi pinakinggan ng mga nabanggit na deboto ang tagubilin ng mga awtoridad hinggil sa mga bawal sa prusisyon.

Kabilang aniya sa sasampahan ng kaso ang mga debotong sumira sa mobile ng NCRPO sa kasagsagan ng Traslacion.

Habang hindi naman aniya kasama ang mga nangbato ng bote ng mineral water na may lamang ihi sa mga pulis. — ulat mula kay Jaymark Dagala (Patrol 9)

Hindi sisibakin sa puwesto si Southern Police District (SPD) Director Nolasco Bathan.

Ito ang inihayag ni NCRPO acting Director Brig. General Debold Sinas matapos niyang atasan ang Regional Interal Affairs Service (RIAS) na imbestigahan ang insidente ng pang-aagaw ni Bathan sa cellphone ng TV reporter na si Jun Veneracion.

Ayon kay Sinas, ipauubaya na lamang niya sa Regional Internal Affairs Service ang pagtukoy kung nagkasala si Bathan bagama’t naniniwala naman siyang ginampanan lamang nito ag tungkulin.

Kasabay nito, humingi na ng paumanhin si Bathan kay Veneracion at sinabing kanya lamang napagkamalan ang TV reporter na kasama sa mga nagkakagulong deboto.

Dala aniya ng pagod at tindi ng sitwasyon kaya’t nagawa niya ang hakbang.

Magugunitang, inagaw ni Bathan ang cellphone ni Veneracion habang kinukunan nito ang pag-aresto sa isang deboto sa bahagi ng Ayala Bridge sa kasagsagan ng Traslacion ng itim na Nazareno noong Huwebes. — ulat mula kay Jaymark Dagala (Patrol 9)

Maglalabas ang Bangko Sentral ng Pilipinas ng ‘commemorative coins’ para sa selebrasyon ng ika–70 taon ng central banking sa Pilipinas at ika–25 taong anibersaryo ng BSP.

Kabilang sa ilalabas ng BSP ay ang 10,000 pisong ‘gold commemorative coin’ na nagkakahalaga ng 127,500 pesos at 500 pisong ‘silver commemorative coin’ na nagkakahalaga ng 3,500 pesos.

Sa mga interesado, hinikayat ang mga ito na umorder nang hindi lalampas ng January 15 “on a first mail – in, first listed basis.

Isang uri lamang ng bawat commemorative coins ang maaring bilhan kada indibwal at isasagawa lamang ang cash payment at pick up ng naturang mga limited coins mula 9:00 hanggang 2:00 ng hapon sa mga pinakamalapit na sangay ng BSP.