DWIZ 882

Iimbestigahan ng simbahan ng Quiapo ang reklamo ng ilang mga deboto hinggil sa katatapos lamang na Traslacion ng itim na Nazareno.

Ayon kay Quiapo Church Rector Monsignor Hernando Coronel, pakikinggan nila ang hinaing ng lahat dahil magagamit rin aniya ang mga matutunan dito para sa mga susunod na Traslacion.

Gayunman, iginiit ni Coronel na itinuturing nila ang katatapos lamang na Traslacion bilang isa sa mga pinakamabilis sa kasaysayan ng taunang prusisyon na natapos sa loob ng 16 na oras.

Samantala, ipinagtanggol naman ni Quiapo Church Parochial Vicar Fr. Doughlas Badong na ang mga ipinatupad na pagbabago sa Traslacion.

Sinabi ni Badong, naglagay ng tinatawag na andas wall hindi para pigilan ang mga deboto na makalapit sa imahe ng itim na Nazareno bagkus ay upang mapanatiling mapayapa at maayos ang prusisyon.

Iginiit pa ni Badong, pangkalahatang naging mapayapa at maayos ang katatapos na Traslacion dahil na rin sa pagtutulungan ng simbahan at mga opisyal ng pamahalaan.

Pinapapalitan ni dating Senador Bongbong Marcos ang nilalaman ng mga history books hinggil sa kanilang pamilya.

Ayon kay Marcos, pinatunayan ng mga naipanalo nilang kaso na mali ang mga akusasyon laban sa kanila.

Aniya, walang ebidensiya at hindi totoo ang mga sinasabing ninakaw ng kanilang pamilya mula sa kaban ng bayan batay na rin sa desisyon ng Korte.

Dagdag ni Marcos, ilang taon nang kinakaladkad ang kanilang pamilya sa mga kasong wala namang ebidensiya dahil sa mga propaganda.

Bunsod nito, iginiit ng dating senador na mali ang mga itinuturo sa mga kabataan.

Magugunitang, limang kasong may kaugnayan sa ill-gotten wealth ng pamilya Marcos ang ibinasura ng Korte noong nakaraang taon.

Itinanggi ng Land Transportation Franchising and Regulatory Board (LTFRB) na ipinag-utos nila ang pagbabawal sa ride hailing app na Angkas na tumanggap ng mga mabibigat o matatabang pasahero.

Kasunod ito ng anunsiyo ng Angkas na posibleng hindi na sila magsakay ng mga overweight na pasahero alinsunod sa safety guidelines ng pamahalaan.

Ayon kay LTFRB Technical Working Group Consultant Alberto Suansing, kanila lamang pinatitiyak sa mga motorcycle ride hailing companies ang kaligtasan ng mga pasahero.

Aniya, hindi nila ipinag-utos ang pagbabawal sa pagsakay ng mga mabibigat na pasahero sa mga motorcylce taxis na tila pinalilitaw ng Angkas na kabilang sa kanilang guidelines.

Una rito, ipinadedeklara ng Angkas sa kanilang mobile app ang weight range ng kanilang mga pasaherong nagpa-book para umano matiyak ang kaligtasan ng kanilang rider at sakay nito.

Bumuo na ng Special Investigation Task Group (SITG) ang Philippine National Police (PNP) para tutukan ang imbestigasyon sa pagpatay kay retired Police General at Congresman Marlou Chan.

Ayon kay PNP Spokesperson Brig. General Bernard Banac, pangungunahan ang task group ng Police Regional Office 1.

Tiniyak naman ni Banac na kanilang tinitignan ang lahat ng anggulo para matukoy ang motibo sa krimen kabilang na ang dating trabaho ni Chan bilang dating hepe ng Pangasinan Police.

Aniya, posibleng may nasagasaang criminal groups o sindikato si Chan na nagtanim ng galit dito noong nasa serbisyo pa ito.

Tinambangan si Chan ng mga hindi pa nakikilalang mga salarin sa bahagi ng barangay Nalsiyaan sa Calasiao Pangasinan noong huwebes, Enero 9. — ulat mula kay Jaymark Dagala (Patrol 9)

Pinag-aaralan na ng Land Transportation Franchising and Regulatory Board (LTFRB) ang posibleng paggalaw sa singil sa pamasahe.

Kasunod ito ng hirit ng iba’t-ibang transport groups na gawing P12 ang minimum na pamasahe sa mga pampasaherong jeepney bilang paghahanda sa posibleng epekto sa presyo ng produktong petrolyo ng tensyon sa Middle East.

Ayon kay LTFRB Chairman Martin Delgra, may inihain mang petisyon o wala, kusa silang nagsasagawa ng pag-aaral sa pasahe lalo na kung nagkakaroon aniya ng biglaan at malakihang pagtaas sa presyo ng krudo.

Gayunman sinabi ni Delgra na hindi pa nila matukoy sa ngayon kung kailan maipapalabas ang desisyon hinggil dito.

Dagdag ni Delgra, posibleng hindi na rin naman aniya kailanganin ang pagtataas ng pamasahe dahil sa ganap na pagpapatupad ng jeepney modernization program sa kalagitnaan ng taon.