DWIZ 882

Tinanggap ng National Disaster Risk Reduction and Management Council (NDRRMC) ang may 168 portalets mula sa Philippine Amusement and Gaming Corporation (PAGCOR) at City of Dreams.

Ito’y bilang bahagi ng ayuda ng PAGCOR para sa mga residenteng apektado ng pag-aalburuto ng Bulkang Taal sa lalawigan ng Batangas.

Mismong si Defense Secretary Delfin Lorenzana at NDRRMC Executive Director Usec. Ricardo Jalad ang tumanggap ng nasabing donasyon mula kay PAGCOR President at CEO Andrea Domingo.

Ayon kay Domingo, ilalagay ang mga naturang portalet sa evacuation centers kung saan may ilang residente pa ring nananatili kahit tinanggal na ang lockdown sa maraming lugar sa lalawigan.

Kapwa nagpasalamat naman sina Lorenzana at Jalad sa donasyong ipinagkaloob ng PAGCOR para sa mga apektado ng pag-aalburuto ng bulkan na nananatili sa alert level 3. — ulat mula kay Jaymark Dagala (Patrol 9)

Pormal nang nanumpa at ginawaran ng bagong ranggo ang nasa 27 opisyal ng Philippine National Police (PNP).

Mismong si PNP Chief Gen. Archie Gamboa ang nagsabit ng ikalawang Estrella kina NCRPO Chief Maj/Gen. Debold Sinas at CIDG Chief Maj/Gen. Joel Coronel.

Itinanghal namang mga bagong heneral sina P/Bgen. Romeo Caramat Jr. ng PNP drug enforcement group, P/Bgen. Alessandro Abella ng women and children’s protection center, P/Bgen. Flyn Dongbo ng directorate for investigative and detection management.

Gayundin sina P/Bgen. Rommil Mitra ng firearms and explosives office, P/Bgen. Daniel Mayoni ng directorate for information and communications management, P/Bgen. Prexy Tanggawohn ng office of the chief PNP at P/Bgen. Baltazar Israel ng PNP Internal Affairs Service.

Maliban sa mga nabanggit, nasa 18 opisyal pa ang umakyat bilang full pledged colonel salig na rin sa inilabas na rekumendasyon ng National Police Commission (Napolcom). — ulat mula kay Jaymark Dagala (Patrol 9)

Magkakasa ng summer camp ang National Capital Region Police Office (NCRPO) para sa mga matatabang pulis na kailangang magbawas ng timbang at magpapayat.

Ito ang inihayag ni NCRPO Chief Maj/Gen. Debold Sinas ay bilang pagsunod sa kautusan ni PNP Chief Archie Gamboa hinggil sa mahigpit na pagpapatupad ng Body Mass Index (BMI) sa mga pulis.

Ayon kay Sinas, simula sa susunod na buwan ay titipunin ang mga pulis taba na nasa ilalim ng kategoryang obese 2 at 3 para ihanda sa ikinasa nilang weight loss program.

Magsisimula sa buwan ng Marso ang nasabing programa na tatagal ng dalawang buwan kung saan, hindi muna sila papapasukin sa trabaho para tutukan ang pagpapaganda sa kanilang katawan.

Una rito, sinabi ni Sinas na pangungunahan mismo niya ang pagsasailalim sa nasabing programa upang walang maging dahilan para lumusot dito ang iba pang mga pulis. — ulat mula kay Jaymark Dagala (Patrol 9)

Asahan na ang mas pinalakas na kampaniya ng National Capital Region Police Office (NCRPO) kontra sa ilegal na sugal bilang pagtalima na rin sa kautusan ni PNP Chief Gen. Archie Gamboa.

Ayon kay NCRPO Director Maj/Gen. Debold Sinas, kaniya nang ipinag-utos na isama sa kanilang aarestuhin ng mga pulis ang mga may-ari ng lugar sugalan gayundin ang mga tumataya rito.

Lumalabas kasi sa kanilang imbestigasyon na mayroong natatanggap na 20% lagay ang may-ari ng lugar kung saan naroon ang mga illegal na sugal tulad ng video karera.

Maliban sa video karera, color game at tupada o sabong, sinabi ni Sinas na gigibain din nila ang mga saklaan lalo na’t ginagamit din umano ito sa operasyon ng illegal na droga ng ilang mga drug lord.

Mula noong Oktubre 2019 hanggang Enero ng taong ito, aabot na sa P1.5-M ang kanilang nasasabat mula sa mahigit 2,000 operasyong kanilang ikinasa kontra illegal gambling. — ulat mula kay Jaymark Dagala (Patrol 9)

Dumipensa ang Quezon City Police District (QCPD) hinggil sa alegasyong tinutulugan umano nila ang problema ng illegal gambling sa kanilang lungsod.

Ito’y makaraang kastiguhin ni PNP Chief P/Gen. Archie Gamboa si QCPD Director P/Bgen. Ronnie Montejo sa isang panayam sa radyo dahil talamak pa rin umano ang ilegal na sugal sa kaniyang nasasakupan.

Sinabi ni Montejo na mula noong isang taon aniya, aabot sa mahigit 600 operasyon ang kanilang ikinasa kung saan, halos 2,000 ang naaresto habang mahigit 600 ang kanilang nasampahan ng kaso.

Ngayong buwan lang ani Montejo, nasa halos 60 na ang naikasa nilang operasyon, mahigit 120 ang naaresto at 40 ang nakasuhan.

Bagama’t aminado si Montejo na sa kabila ng kanilang maigting na kampaniya kontra ilegal na sugal ay marami pa rin sa mga ito ang nagbabalikan dahil sa padrino ng ilang gambling lords. — ulat mula kay Jaymark Dagala (Patrol 9)

Walang planong bawasan ng National Water Resources Board (NWRB) ang ibinibigay nilang alokasyon ng tubig sa mga taga-Metro Manila.

Ito’y sa kabila ng patuloy na pagbaba ng lebel ng tubig ng Angat dam na siyang pinagmumulan ng suplay ng NCR at ng ilang probinsya sa Central Luzon.

Ayon kay NWRB Executive Director Dr. Sevillio David Jr, ayaw naman nilang lumaki pa ang problemang dulot ng mas mababang alokasyon ng tubig tulad ng naranasan na sa nakalipas na mga panahon.

Mula kasi sa normal water allocation na 46 cubic meters per second, sinabi ni David na ipinako na ito ng NWRB sa 42 cubic meters per second.

Kaya naman apela ni David sa publiko, huwag magsayang ng tubig upang maging maayos ang antas ng suplay mula sa Angat dam hanggang sa dumating ang panahon ng tag-ulan. — ulat mula kay Jaymark Dagala (Patrol 9)

Pormal nang tinanggap ni AFP Chief of Staff Gen. Filemon Santos ang kaniyang ika-apat na Estrella.

Mismong si Defense Sec. Delfin Lorenzana ang nagsabit ng Estrella kay Santos bilang ika-53 AFP Chief of Staff sa Kampo Aguinaldo.

Dumalo sa nasabing seremoniya ang pamilya ni Santos at ang matataas na opisyal ng AFP sa pangunguna ng Vice Chief of Staff nitong si Vice Admiral Gaudencio Collado Jr.

Magugunitang sa pagpasok ng taon ay inaprubahan ni Pangulong Rodrigo Duterte ang ad-interim appointment kay Santos bilang bagong AFP Chief of Staff kapalit ng nagretirong si Gen. Noel Clement.

Si Santos ay miyembro ng Philippine Military Academy (PMA) Sinagtala Class of 1986 at mistah ni PNP Chief Gen. Archie Francisco Gamboa. — ulat mula kay Jaymark Dagala (Patrol 9)