Nagnegatibo sa novel coronavirus (nCoV) ang isang dayuhan na sumailalim sa mga laboratory tests sa Camiguin Provincial Hospital.
Ayon sa Department of Health (DOH), galing ang dayuhan sa Wuhan, China bago nakarating sa Camiguin para magbakasyon.
Nagpakita ito ng mga sintomas ng sakit katulad ng lagnat at ubo at boluntaryong nagtungo sa ospital.
Paliwanag ng Health Department, hindi na ito sasailalim sa confirmatory test dahil nagnegatibo ito sa initial test.
Sinuspinde ng Department of Foreign Affairs (DFA) ang pag-iisyu ng Philippine visa sa mga bibyahe mula sa Huban Province sa China.
Ito ay kasunod ng outbreak ng novel coronavirus (nCoV).
Ayon kay Foreign Affairs Undersecretary Dodo Dulay, ibinaba ang utos matapos ang proposal at resolusyon ng Inter-Agency Task Force for the Management of Emerging Diseases hinggil sa mga dapat gawin.
Kasama na sa resolusyon ay ang aniyay “discouragement” sa mga Pilipino na babyahe sa China nang walang importanteng rason.
Samantala, inilagay na sa lockdown ang ilang mga syudad sa Hubei Province kabilang na ang Wuhan na siyang outbreak ng epicenter.
Patuloy na nadaragdagan ang mga bansang may kumpirmadong kaso ng novel coronavirus (nCoV) 2019.
Sa pinakahuling tala, kinumpirma ng Sri Lanka ang kauna-unahang kaso ng nCoV sa naturang bansa.
Pumalo naman sa anim na katao na ang mayroong nCoV sa Japan at dalawa naman sa Germany.
Una nang nagkumpirma ng kaso ng sakit ang mga bansang South Korea, Vietnam, Singapore, Malaysia, Thailand at Nepal.
Kasama na rin ang Australia, Amerika, Canada at France.
Sa ngayon ay meron nang higit 17 bansa ang apektado.
Kanselado na ang biyahe ng cruise ship na MV World Dream sa Subic bay free port matapos dumaong sa Pier 15 ng South Harbor Manila, kahapon.
Ito ang inanunsyo ni Philippine Coast Guard Spokesperson Captain Armand Balilo matapos magpasiya ang pamunuan ng nabanggit na cruise ship na bumalik na lamang ng Hong Kong kung saan ito nakabase sa halip na magtungo pa ng Subic.
Una rito nabatid na sumulat si Subic Zambales Mayor Jon Khongkun kay SBMA Administrator Wilma Eisma na huwag pahintulutan ang pagdaong sa kanilang pantalan ang M/V World Dream.
Nagsagawa rin ng kilos protesta ang ilang mga residente ng Olongapo City sa pangunguna ng kanilang alkalde na si Rolen Paulino laban din sa pagpunta sa Subic ng nabanggit na cruise ship.
Sinabi ni Balilo, sakay ng M/V World Dream ang nasa 778 mga turista mula Hong Kong na nakapamasyal na rin aniya ng Manila.
Supposed to be 4,000 yung sakay nito may mga kukunin na mga turista sana galing iba’t-ibang lugar sa China pero parang nag-decide yung may-ari na hindi na nila kinuha kaya 700 na lang yung sakay, nag-cancel na ang kanilang trip papuntang Subic instead babalik na lang sila sa Hong Kong,” ani Balilo.
— panayam mula sa Teka Teka (alas 4:30 na!)
Itinanggi ng University of Santo Tomas Hospital ang ulat na may isinugod sa kanilang pasyente na may novel coronavirus (2019-nCoV).
Sa ipinalabas na pahayag ng USTH office of medical director, kanilang iginiit na peke ang kumakalat na balita sa social media at text messages hinggil dinalang pasyente sa kanilang hospital na may nCoV.
Pagtitiyak pa ng USTH, may sinusunod silang protocol para sa paghawak ng mga pasyenteng hinihinalang may 2019-nCoV.
Kanila ring pinaalalahanan ang publiko na maniwala lamang sa mga opisyal na abiso na ipinalalabas ng mga kinauukulang ahensiya at ng Department of Health hinggil sa kaso ng nCoV sa bansa.
Nakalabas na ng Aklan Provincial Hospital ang tatlong Chinese na batang kabilang sa mga binabantayan dahil sa posibilidad ng pagkakaroon ng novel coronavirus (2019-nCoV).
Ayon Aklan Provincial Health Officer Dr. Cornelio Cuachon Jr., isa mga nabanggit na pasyente ang anim na taong gulang na batang galing Wuhan, China.
Aniya, nagnegatibo sa 2019-nCoV ang nabanggit na bata pero nakaranas ito ng pneumonia.
Habang ang dalawa pang batang pasyente ay nagmula naman ng Shanghai at hinihintay pa ang resulta ng confirmatory test sa mga ito.
Gayunman, iginiit ni Cuachon na mas malaki rin ang posibilidad na pneumonia ang sakit ng dalawang bata batay na rin sa nakitang sintomas.
Samantala, dalawang Chinese national na nakatakda na sanang bumalik ng China ang isinugod din sa Aklan Provincial Hospital, kahapon.
Gayunman agad ding dinis-charge ang mga ito matapos na hindi tumugma sa criteria para sa 2019-nCoV ang mga sintomas na nakita sa mga ito.
Nilinaw ng Bureau of Immigration (BI) na walang ipinatutupad na total ban sa pagpasok ng mga Chinese nationals sa Pilipinas.
Kasunod naman ito ng pasiya ng ahensiya na pansamantalang kanselahin ang pagkakaloob ng visa-upon-arrival (VUA) sa mga Chinese national sa gitna na rin ng pangamba sa novel coronavirus (2019-nCoV).
Ayon kay Immigration Spokesperson Dana Sandoval, nasa limang porsyento lamang ng kabuuang bilang ng mga dumarating na Chinese sa bansa ang apektado ng kanselasyon ng VUA facility.
Dagdag ni Sandoval, layunin lamang aniya ng hakbang ang mapabagal ang pagpasok ng malaking bulto ng mga Chinese tourist sa bansa.
Sinabi pa ni Sandoval, papayagan pa ring makapasok ng bansa ang mga Chinese nationals na may hawak na regular na tourist o working visa at makakapasa sa assessment ng bureau of quarantine sa mga paliparan.
Patay ang isang pulis matapos tambangan ng may tatlong salaring sakay ng motorsiklo sa Dumaguete City, Negros Oriental pasado 7:00 kagabi.
Batay sa ulat ng Negros Oriental Provincial Police Office, nakilala ang biktima na si P/Msgt. Roldan Esmajer na naka-assign sa San Jose Municipal Police Station.
Papasok na sana sa kaniyang trabaho sakay ng kaniyang motorsiklo si Esmajer at binabagtas ang national highway nang bigla itong tambangan ng mga hindi pa nakilalang salarin.
Dahil dito, nagtamo ng tama ng bala ng baril ang pulis sa kaniyang kanang balikat, dibdib at tiyan.
Nagawa pang isugod ng mga nagmagandang loob si Esmajer sa Siliman Medical Center subalit idineklara na itong dead on arrival.
Agad namang kumaripas ang mga salarin sa hindi matukoy na direksyon na siya ngayong tinututukan ng imbestigasyon ng mga pulis. — ulat mula kay Jaymark Dagala (Patrol 9)
Patay ang dalawang Chinese national gayundin ang isang Pinoy habang sugatan naman ang dalawang menor de edad na kasama nito matapos tambangan sa Taguig City kahapon.
Kinilala ni Southern Police Distrct Spokesperson P/Maj Jaybee Bayani ang mga biktimang Chinese na sina Ninjie Zhang at isang nakilala sa alyas na Kauyu gayundin ang Pinoy na nakilala lamang sa alyas na Noel.
Alas dos ng hapon nang makatanggap ng tawag ang Taguig City PNP hinggil sa nangyaring pananambang sa mga biktimang sakay ng kotse sa harap mismo ng opisina ng Department of Science and Technology (DOST) sa Gen. Santos Avenue.
Kasalukuyan namang nagpapagaling sa Taguig – Pateros District Hospital ang dalawa pang menor de edad na nasugatan sa nangyaring pananambang.
Patuloy ang ginagawang imbestigasyon ng Taguig City PNP hinggil sa pagkakakilanlan ng may apat na mga salarin gayundin ang motibo ng mga ito sa krimen. — ulat mula kay Jaymark Dagala (Patrol 9)
Naaresto ng mga tauhan ng police regional office 12 ang isang pulis na sangkot sa madugong Ampatuan massacre sa Maguindanao noong 2009.
Kinilala ni P/Ltc. Barney Condes, force commander ng regional mobile force battalion 12 ang naaresto na si Patrolman Suari Esmail na kilala rin sa alyas na Alfie sa bisa ng warrant of arrest.
Nasukol si Esmail nang makatanggap ng isang tip ang mga pulis mula sa isang impormante hinggil sa presensya nito sa hangganan ng Lambayong sa Sultan Kudarat at Sultan sa Barongis sa Maguindanao.
Dahil dito, dadalhin sa Quezon City Regional Trial Court branch 221 si Esmail na may patong na P300,000 sa ulo para isailalim sa paglilitis.
Magugunitang 58 ang nasawi sa madugong massacre sa Maguindanao kung saan, kabilang dito ang may 32 miyembro ng media. — ulat mula kay Jaymark Dagala (Patrol 9)