DWIZ 882

Umabot na sa 23 tao ang binabantayan ng Department of Health dahil sa hinihinalang kaso ng novel coronavirus (NCov).

Ayon kay Health Secretary Francisco Duque III, 17 sa suspected cases ay nasa Metro Manila habang 2 naman sa Central Visayas.

Habang tig isang kaso sa Western Visayas, Mimaropa, Eastern Visayas at Davao.

Apat sa naturang mga pasyente ang na-dicharged at nag negatibo na sa NCov.

Samantala, namatay na kahapon ang isang person under investigation na naka–admit sa San Lazaro Hospital dahil sa sakit na pneumonia at nagpositibo sa HIV ngunit hindi pa makumpirma kung mayroon itong NCov.

Posibleng matanggap na bukas o sa Biyernes ang resulta ng novel corona virus test na ipinadala sa Australia.

Matatandaang nagpadala ang Department of Health ng 6 na specimen mula sa mga pasyenteng hinihinalang may sakit na NCov sa bansa.

Sa kabila nito, sinabi ng DOH nanatili pa ring NCov free ang bansa sa ngayon.

Matapos na matanggap ang resulta, hindi na rin kinakailangan ng DOH na magpadala muli ng test sa Australia dahil paparating na ang primer mula sa Japan para mismong ang mga tauhan na ng DOH–RITM ang siyang gumawa ng test dito sa bansa.

Kinumpirma ng San Lazaro Hospital na namatay na ang isang Chinese national na under investigation dahil sa posibleng kaso ng novel corona virus.

Ayon kay Dr. Edmundo Lopez, direktor ng ospital, Lunes nang ma- confined ang 29 anyos na lalaki na nagmula sa Yunnan, China at ngayong Miyerkules ng umaga ito binawian ng buhay.

Aniya, sa isinagawang 2 screening ay nagpositibo ito sa HIV at tinukoy na pneumonia ang siyang ikinamatay nito.

Ngunit nilinaw ng opisyal na hindi pa kumpirmado kung namatay nga ito dahil sa NCov dahil hinihintay pa ang magiging resulta ng isinagawang test.

Nakatakdang isalang sa review ng Senate Committee on Foreign Relations ang Visiting Forces Agreement (VFA) sa pagitan ng Pilipinas at Amerika simula sa susunod na linggo.

Kasunod ito ng pagbabanta ni Pangulong Rodrigo Duterte na i te-terminate ang naturang kasunduan kasunod ng pagkansela ng amerika sa US visa ni Senador Ronald ”Bato” Dela Rosa.

Ayon kay Senator Koko Pimentel, aalamin dito ay ang mga kapakinabangan ng Pilipinas sa VFA, paano ito ipinapatupad, mga problema at paglabag sa batas at iba pa.

Bukod sa VFA ay tatalakayin rin ang Enchanced defense cooperation agreement at mutual defense treaty na pinasok ng bansa sa Amerika at Australia.

Layon aniya ng komite na maipasa sa Malakanyang ang kanilang committee report bago mag Marso.

Balik eskwela na ang mga mag aaral sa Batangas City ngayong araw, Enero 29  matapos na maantala dahil sa pagputok ng bulkang Taal.

Ito ay matapos na ipag utos ni Batangas City Mayor Beverly Dimacuha ang balik eskwela ng lahat ng mga estudyante sa mga pribado at pampublikong paaralan sa lungsod.

Dahil dito, mahigit 1,500 mga mag aaral sa Batangas City East Elementary School mula kinder hanggang grade 6 ang pumasok sa eskwela kabilang ang nasa special education program at alternative learning system.

Nabawasan na rin ang pamilyang nanunuluyan sa naturang paaralan kung saan 13 pamilya na lamang ang nanatili dito na pawang mga taga Agoncillo.

Sa kabuuan, ayon sa DepEd division sa Batangas umabot na sa 17 mga paaralan sa lalawigan ang mayroon nang normal na klase matapos na magsilbing evacuation areas.

Nakatakdang dumating sa bansa ngayong araw, Miyerkules, Enero 29, ang Japanese counterpart ng Research Institute for Tropical Medicine (RITM).

Bitbit nito ang isang tool na may kakayahang matukoy ang novel coronavirus (nCoV).

Kumpiyansa naman ang Department of Health (DOH) na makatutulong ang mga ito para matukoy kung ang hinihinalang coronavirus sa mga iniimbestigahan ay pareho ng virus na mula sa China.

Nag-anunsyo ng kanselasyon ng klase ang ilang paaralan kasunod pa rin ng pangamba dahil sa novel coronavirus (nCoV).

Walang pasok sa mga sumusunod na paaralan:

• Hope Christian High School
• Philippine Cultural College
• St. Jude Catholic School
• St. Stephen’s High School
• Uno High School

Ang suspensyon ng klase ay bilang precaution laban sa pagkalat ng nCoV sa bansa.