DWIZ 882

Nakikipag-ugnayan na ang pamahalaan sa 30 hanggang 50 mga Filipino sa Wuhan City at Hubei Province na nagnanais nang bumalik ng Pilipinas.

Ayon kay Philippine Ambassador to Beijing Jose Santiago Sta. Romana, pinangangasiwaan ito ng Philippine Consulate General sa Shanghai na siyang malapit at nakakasakop sa hurisdiksyon ng Hubei Province.

Dagdag pa ni Sta. Romana, mahigpit na ring nakikipag-ugnayan sa Chinese government ang konsulada para mabantayan ang sitwasyon ng nasa 300 mga Filipino sa nabanggit na probinsiya sa China.

Iginiit naman ni Sta. Romana na walang panawagan ng repatriation sa mga Pilipinong nasa Wuhan at Hubei pero kanilang tinitiyak ang tulong sa mga boluntaryong uuwi ng Pilipinas.

Sa pinakahuling impormasyon ng embahada ng Pilipinas, wala pang Filipino sa Wuhan at Hubei ang napaulat na nahawaan ng novel coronavirus (2019-nCoV) dahil lahat ng mga ito ay naka self-quarantine sa kani-kanilang mga tinutuluyan.

Itinakda ng Department of Justice (DOJ) magpupulong ang mga miyembro ng gabinete ng pamahalaan na kabilang sa security, justice at peace clusters sa Biyernes, Enero 31.

Ito’y ayon kay Justice Secretary Menardo Guevarra ay upang matalakay ang planong pagbasura ni Pangulong Rodrigo Duterte sa Visiting Forces Agreement (VFA).

Dagdag ni Guevarra, bubuo na rin sila ng rekomendasyon hinggil sa mas mainam na paraan o proseso sa pagpapatupad ng termination ng VFA na siya namang isusumite kay Pangulong Rodrigo Duterte.

Maliban sa DOJ, kabilang din aniya sa nabanggit na pulong ang Department of Foreign Affairs, National Defense, Interior and Local Government, Armed Forces of the Philippines, Philippine National Police, National Bureau of Investigation, National Intelligence Coordinating Agency at Office of the Executive Secretary.

Una nang inatasan ng Pangulo ang DOJ na magsagawa ng pag-aaral hinggil sa proseso ng pag-terminate sa VFA gayundin ang posibleng epekto nito sa bansa.

Ikinalugod ng Malakanyang ang balitang pormal nang sinampahan ng kasong murder ang mag-asawang Kuwaiti na employer ng pinaslang na OFW na si Jeanalyn Villavende.

Ayon kay Presidential Spokesperson Salvador Panelo, magandang balita aniya lalo na sa hinihinging hustisya ng pamahalaan at pamilya ni Villavende.

Sa kabila naman nito, iginiit ni Panelo ang pananatili ng ipinatutupad na deployment ban ng mga manggagawang Pilipino sa Kuwait.

Ito aniya ay hangga’t hindi kikilalanin ng pamahalaan ng Kuwait ang nilagdaang kasunduan hinggil sa pagbibigay ng proteksyon at pagtitiyak sa kalagayan ng mga manggagawang Filipino doon.

Una na ring sinabi ni Labor Secretary Silvestre Bello III na mananatili ang deployment ban sa Kuwait hangga’t hindi nasasaayos ang memorandum of agreement para pagbibigay proteksyon ng mga OFW sa nabanggit na bansa.

Muling ipinagpaliban ang nakatakdang tête-à-tête o one-on-one interview ni Pangulong Rodrigo Duterte kasama si Presidential Spokesperson Salvador Panelo kagabi.

Sa isinagawang televised announcement ni Panelo mula sa Malakanyang, kanyang sinabi na masama ang pakiramdam ng Pangulo.

Bunsod naman aniya ito ng magkakasunod na pulong na dinaluhan ni Pangulong Duterte noong Lunes kabilang na ang pakikipagkita kay outgoing New Zealand Ambassador to the Philippines David Strachan.

Dagdag ni Panelo, napagod din ang Pangulo sa pagbabasa at pag-aaral ng mga dokumentong nakatambak sa tanggapan nito.

Sinabi ni Panelo, posibleng itakda na lamang muli sa susunod na linggo ang one-on-one interview.

Una nang itinakda ang nabanggit na panayam noong Enero 22 pero kinansela bunsod ng mahalagang usaping pangpamilyang kinakailangang ayusin ng Pangulo.

Ipinatawag ng mababang kapulungan ng Kongreso si Health Secretary Francisco Duque III para sa itinakdang question hour ngayong araw.

Alinsunod ito sa inaprubahang mosyon ni Majority Leader Martin Romualdez na humihiling sa presensiya ni Duque sa kanilang sesyon.

Ito ay para aniya tanungin ang kalihim hinggil sa ipinatutupad na hakbang ng DOH para mapigilan ang pagpasok ng novel coronavirus sa bansa.

Nilinaw naman ni Romualdez na ang pagpapatawag kay Duque ay hindi bilang pagsasagawa ng imbestigasyon ng Kamara o layuning lumikha ng batas.

Bagkus ay bahagi aniya ito ng kanilang oversight function para mapahupa ang pangamba ng kani-kanilang mga nasasakupan bunsod ng balitang nakapasok na bansa ang nCoV.

Nakatakdang magtungo ng Kuwait si Labor Secretary Silvestre Bello III sa susunod na linggo.

Ito aniya ay upang talakayin sa mga opisyal ng Kuwait ang pagkakaroon ng standard employment contract para sa mga Filipinong manggagawa sa nabanggit na bansa.

Sa pagdinig ng senate labor committee, sinabi ni Bello na inimbitahan siya ng Kuwaiti government matapos ang serye ng kaniyang pakikipagpulong kay Kuwait Ambassador Musaed Saleh Ahmad Althwaikh hinggil sa kaso ng pagpatay kay Jeanalyn Villavende.

Ayon kay Bello, inaasahang makakapulong niya sa Kuwait ang ministry of labor, ministry of interior, ministry of justice, ministry of economic affairs at posibleng maging ang kanilang Prime Minister.

Maliban aniya sa standard employment contract ng mga Filipinong manggagawa sa Kuwait, kaniya ring patututukan ang pagpapabilis sa resolusyon ng kaso ni Villavende.

Tutulak ng Kuwait si Bello sa February 2 hanggang 3 kung saan makakasama niya sina POEA Administrator Bernard Olalia, OWWA Administrator Hans Leo Cacdac at isang undersecretary ng DOLE.

Nakahanda ang pamahalaan na i-repatriate ang mga Filipino na nasa Wuhan, China at nais nang bumalik ng bansa.

Ito ang tiniyak ng Department of Foreign Affairs (DFA) matapos ang isinagawang pulong ng inter-agency task force.

Ayon kay Foreign Affairs Undersecretary Brigido Dulay, nakipag-ugnayan na sila sa mga Chinese authorities hinggil sa repatriation ng mga Pinoy sa Wuhan at nangako na ang mga ito na tutulong.

We have to work within the protocols of the Chinese government they also have the rules on disease containment so, there are certain protocols that we have to observe, as you know that is the reason why parts of China are under restriction. So, the ministry of foreign affairs of China already said they are willing to work with the Philippine government to repatriate our nationals if there is a need to repatriate them,” ani Dulay.

Samantala, kinakailangan naman aniyang sumailalim ng mga uuwing Filipino mula Wuhan sa 14 na araw na quarantine.

We came out with the decision, the task force came out with the decision that any Filipino who wants to come home, can come home except they will be place for quarantine for 14 days, also for their own protection as well as the protection for their families so, in that, they are all free to go we are now asking our missions in China to now collect the number of Filipino’s, as well as the names on those who want to come home under that condition,” ani Dulay.

Pumalo na sa 27 ang kabuuang bilang ng mga Persons Under Investigation (PUI) na dahil sa posibilidad ng pagiging infected o nahawaan ng novel coronavirus.

Batay ito sa pinakahuling bilang ng Department of Health (DOH) kung saan karamihan sa mga ito ay Chinese nationals at may travel history sa Wuhan City, China.

Ayon kay Health Secretary Francisco Duque III, tatlo sa nabanggit na bilang ang na-discharge na mula sa hospital.

Dagdag ni Duque, 13 sa mga PUI ang sumailalim na sa swab test sa Research Institute for Tropical Medicine (RITM) at hinihintay na lamang ang resulta.

Habang anim naman ang naipadala na ang sample sa laboratoryo sa Australia para sa confirmatory test.

Kasabay nito, muli namang iginiit ni Duque na nananatiling ncov free ang Pilipinas.

13 in Metro Manila, 3 in Western Visayas, 3 in Central Visayas, one in Mimaropa, one in Eastern Visayas, and one in Northern Mindanao. As of today, three of the PUI’s have already been discharged as the laboratory results revealed other diseases. DOH is now awaiting results for 13 PUI’s for the Research Institute for Tropical Medicine for screening and 6 PUI laboratory results from the Victorian infectious disease reference laboratory for confirmation,” ani Duque.