DWIZ 882

Nanawagan si Senator Francis Tolentino sa Department of Human Settlements and Urban Development (DHSUD) na tutukan ang sustainable resettlement at rehabilitation program ng mga biktima ng pag-aalburoto ng bulkang Taal.

Sa inihaing Senate Resolution No. 297, layon nitong magsagawa ng pagdinig ang Senate Committee on Urban Planning para talakayin ang ilalatag na plano ng DHSUD at iba pang ahensya ng gobyerno na makatutulong sa pagbangon ng mga naapektuhan ng bulkan.

Ani Tolentino, mainam na simulan na ngayon ang mga hakbang para makabalik na rin agad sa normal nilang pamumuhay ang mga apektadong residente.

Iminungkahi ng senador na tutukan partikular ang pabahay, imprastraktura, at pangkabuhayan ng mga residenteng apektado ng pag aalburoto ng bulkang Taal.

Muling iginiit ng malakaniyang na hindi na kailangan pa ng Senate concurrence sa pagkansela ng Visiting Forces Agreement (VFA) sa pagitan ng Pilipinas at Estados Unidos.

Ayon kay Presidential spokesperson Salvador Panelo, maituturing kasi na “executive agreement” ang VFA.

Ibig sabihin ay nasa desisyon ng pangulo at walang mandato sa konstitusyon ang pagkakaroon ng papel ng Senado tuwing may kakanselahing kasunduan.

Ani Panelo, ang ginagawa lamang ngayon ni Foreign Affairs Secretary Teddy Locsin na pakikipag ugnayan sa Senado ay para abisuhan lang ang sangay ng pamahalaan sa nasabing hakbang bilang tanda umano ng courtesy o pagkilala sa co-equal branch.

Patuloy ang pagiging alerto ng mga health authorities sa Kalibo International Airport.

Ito’y kahit pa nakaalis na ang huling batch ng mga turistang Chinese na mula sa Wuhan, China na pinagmulan ng 2019 novel coronavirus (nCoV).

Labas pasok pa rin kasi ang mga turista mula sa iba’t ibang bansa. Nabatid rin na mayroong siyam na iba pang probinsya sa Mainland China ang may direct flight patungong Kalibo.

Kasabay nito dumaing naman ang ilang turista na tila aniya nakakaramdam na sila ng diskriminasyon dahil sa pangamba umano ng iba na mayroon silang novel coronavirus.

Iginiit ng Malacañang na hindi bigo ang administrasyong Duterte na labanan ang kurapsyon sa bansa.

Ito’y kasunod ng pagbagsak sa pwesto ng Pilipinas sa 2019 Corruption Perceptions Index.

Ayon kay Presidential spokesman Salvador Panelo, hindi tumitigil si Pangulong Rodrigo Duterte sa paglilinis ng gobyerno mula katiwalian.

Sa katunayan pa aniya ay walang nakakaligtas na mga tiwaling opisyal ng pamahalaan kay Pangulong Duterte dahil kaniya itong sinisibak sa pwesto at pinasasampahan ng kaukulang kaso.

Mananatili sa mga lalawigan ng Batangas at Cavite ang mga ipinadalang standby support force ng Philippine National Police (PNP) mula Kampo Crame.

Ito ang inihayag ni PNP Spokesman Brig. Gen. Bernard Banac, kahit ibinaba na ng Philippine Institute of Volcanology and Seismology (PHIVOLCS) sa level 3 ang alerto ng Bulkang Taal.

Ayon kay Banac, may pangangailangan pa ng karagdagang puwersa ng pulis sa mga problemadong bayan sa Batangas at Cavite para mapanatili ang kaayusan doon.

Tiniyak naman ni Banac na magpapatupad ng shifting sa mga nakatalagang pulis sa loob ng tatlo hanggang apat na araw upang makapagpahinga at makabawi ng lakas ang mga ito.

Aabot sa mahigit 2,000 pulis mula sa reactionary standby support force ang nakatalaga para sa disaster response at humanitarian assistance sa mga apektadong lugar ng pag-aalburuto ng Bulkang Taal. — ulat mula kay Jaymark Dagala (Patrol 9)

Isang mag-asawang Chinese ang naka-confine sa San Lazaro Hospital sa Maynila matapos makitaan ng mga sintomas ng novel coronavirus (2019-nCoV).

Ayon kay San Lazaro Hospital Spokesman Dr. Ferdinand De Guzman, nanggaling sa Wuhan ang mag-asawa at ipinasok sa ospital noong Biyernes.

Aniya, ang lalaking Chinese national ang nakitaan ng mga sintomas habang may ubo naman ang asawa nito.

Dagdag ni De Guzman, naipadala na rin sa Australia ang mga nakuhang samples sa dalawang pasyente para makumpirma kung merong 2019-nCoV ang mga ito.

Samantala, isa pang lalaking Chinese ang isinugod din sa San Lazaro Hospital matapos makitaan ng mga sintomas ng trangkaso pero nabatid na meron itong varicella o chickenpox.

Una nang sinabi ng Department of Health (DOH) na 11 persons under investigation para posibilidad ng nCoV infection ang kanilang binabantayan sa mga lugar sa Metro Manila, Mimaropa, Northern Mindanao, Western, Eastern at Central Visayas.

Nakikipag-ugnayan na ang Philippine National Police (PNP) sa Department of Health (DOH) para sa pagbalangkas ng mga hakbang laban sa banta ng novel coronavirus (2019-nCoV) sa bansa.

Ayon kay PNP Chief Police General Archie Gamboa, bahagi na rin ito ng pag-iingat sa posibilidad ng pagpasok sa Pilipinas ng nabanggit na bagong virus mula Wuhan City, China.

Kasunod nito, sinabi ni PNP Spokesman Brig. General Bernard Banac na pinakikilos na ang kanilang units na mayroong chemical, biological, radiological, nuclear and high yield explosives para magsilbing frontliners.

Kabilang aniya rito ang Special Action Force (SAF), crime laboratory at health service.

Tiwala naman si Banac na sapat ang kakayahan at kagamitan ng bansa para harapin ang problemang pangkalusugan ng maaaring idulot ng nCoV dahil nagkaroon na ng health emergencies noong 2003 at 2015 bunsod naman ng SARS at MERS-CoV.

Pagtitiyak pa ni Banac, bibigyan ng agarang atensiyong medikal sa PNP general hopital sa Kampo Krame sakaling magkapagtala ng mga pulis na nahawaan ng nCoV. — ulat mula kay Jaymark Dagala (Patrol 9)

Inatasan ni PNP Chief General Archie Gamboa ang housing board ng pambansang pulisya na pangasiwaan ang posibleng relokasyon sa mga pulis na nakatira sa mga bayan sa Batangas na apektado ng pag-aalburuto ng Bulkang Taal.

Ayon kay PNP Spokesman Brig. General Bernard Banac, tinatayang nasa 50 mga pulis ang nakatira sa loob ng 7 kilometer radius danger zone.

Gayunman nilinaw ni Banac na hindi sapilitan ang gagawing relokasyon sa mga nabanggit na pulis at nakadepende pa rin sa magiging pasiya ng mga ito.

Sinabi ni Banac, may mga pabahay ang PNP sa Calamba, Laguna, General Trias Cavite at Rizal na maaaring paglipatan ng mga apektadong pulis. — ulat mula kay Jaymark Dagala (Patrol 9)