DWIZ 882

Pinaalalahanang muli ng Philippine National Police (PNP) ang lahat ng kanilang mga unit commander hinggil sa umiiral na one strike policy sa illegal na sugal.

Kasunod ito ng naging babala ni PNP Chief General Archie Gamboa sa isang panayam sa radyo na sisibakin sa puwesto si QCPD Director Brig. Gen. Ronnie Montejo kung hindi maaayos ang problema sa sugal sa nasasakupan nito.

Ayon kay PNP Spokesman Brig. General Bernard Banac, ang pagtawag ni Gamboa sa atensyon ni Montejo ay batay na rin sa mga impormasyong nakakarating sa tanggapan ng PNP Chief.

Nilinaw naman ni Banac na hindi sini-single out si Montejo bagkus ay paraan na rin ng pagbibigay babala sa iba pang mga unit commanders na kumilos laban sa illegal na sugal.

Dagdag ni Banac, asahan na ang muling paiigtinging kampanya ng pulisya laban sa illegal gambling sa susunod na pitong buwan lalo na sa NCR, Central Luzon at CALABARZON kung saan namamayagpag ito. — ulat mula kay Jaymark Dagala (Patrol 9)

Maaaring magpalabas ng nagkakaisang opinyon ang Senado sa plano ni Pangulong Rodrigo Duterte na ipatigil na ang Visiting Forces Agreement (VFA).

Ayon kay Senate President Vicente Sotto III, maaari nilang pag-usapan ang isyu sa isang caucus o public hearing para na rin malaman ang opinyon ng bawat Senador.

Saka naman aniya sila magpapalabas ng tinatawag na sense of the senate o isang resolusyon hinggil sa planong termination ng VFA.

Gayunman, aminado si Sotto na walang magiging impluwensiya ang kanilang ipalalabas na opinyon dahil hindi nila maaaring panghimasukan ang kapangyarihan ng ehekutibo na ipawalang bisa ang anumang pinasok na kasunduan.

Iginiit ni Sotto, ang mahalaga na lamang aniya ay malaman ng publiko ang pananaw at panindigan ng mga Senador sa usapin ng termination ng VFA. — ulat mula kay Cely Ortega-Bueno (Patrol 19)

Posibleng mawala sa kustodiya ng Pilipinas si US Lance Corporal Joseph Pemberton, ang sundalong Amerikano na nahatulan sa kasong pagpatay sa transgender na si Jennifer Laude noong October 2014.

Ito ang pinangangambahan ni Senadora Imee Marcos, oras na tuluyan nang makansela ang Visiting Forces Agreement (VFA).

Ayon kay Marcos, nabibigyan ng VFA ng legal na hurisdiksyon ang Pilipinas sa mga sundalong Amerikano na nakagagawa ng krimen o paglabag sa anumang batas sa bansa.

Dagdag ni Marcos, maaari ding hilingin ng Amerika ang maagang pagpapalaya kay Pemberton kung tuluyan nang ibabasura ng pamahalaan ang VFA.

Iginiit naman ng senadora na salip na VFA, ibasura na lamang aniya ang EDCA na nagpapahintulot aniya sa US military na balewalain ang bahagi ng konstitusyon ng Pilipinas na nagbabawal sa pagtatayo ng base militar sa bansa. — ulat mula kay Cely Ortega-Bueno (Patrol 19)

Pinaiiwas muna ng Department of Health (DOH) ang publiko sa pakikipagkamay at pakikipagbeso-beso sa ibang tao bilang pag-iingat sa gitna na rin ng banta ng novel coronavirus (2019-nCoV) mula China.

Ayon kay Health Secretary Francisco Duque III, makakabuting iwasan muna ang mga nabanggit na tradisyon na pagbati sa kapwa lalo na’t may mga binabantayan silang posibleng kaso ng nCoV sa bansa.

Nagbiro din ang kalihim na ang pinakamalapit lamang na maaaring gawin bilang pagbati ay ang pag-fist bump.

Pinayuhan din ni Duque ang publiko laban sa pagkain ng mga hindi lutong karne o mga kinilaw.

Sinabi ni Duque, kinakailangang matiyak na wasto ang pagkakaluto sa mga karne lalo na’t nagmula ang virus sa mga hayop na nailipat lamang sa mga tao.

Wala pang pangangailangan para magsuspinde ng klase ang eskuwelahan dahil sa banta ng novel corona virus (2019-nCoV).

Ito ang inihayag ni Health Secretary Francisco Duque III kasunod ng naging desisyon ng ilang eskuwelahan partikular ang mga kilalang Chinese schools na magsuspinde ng pasok.

Ayon kay Duque, hindi nila alam ang batayan ng nasa anim na pribadong mga paaralan sa pagpapasiyang magsuspinde ng klase dahil sa nCoV.

Sinabi ni Duque, wala pa silang natatanggap na abiso mula sa who World Health Organizations at wala rin silang ipinalalabas na guidelines hinggil sa pagsususpinde ng klase.

Gayunman, binigyang diin ng kalihim na nasa pagpapasiya pa rin ng pamunuan ng mga paaralan kung magsusupinde ng klase.

Patuloy naman aniyang makikipag-ugnayan ang DOH sa mga eskuwelahan.

Nagsagawa ng emergency meeting ang Department of Foreign Affairs (DFA) kasama ang mga opisyal ng Department of Health (DOH).

Ayon sa DFA, tinalakay sa pulong ang mga estratehiyang maaaring gamitin ng pamahalaan sakaling magkaroon ng mga emergency bunsod ng outbreak ng novel coronavirus (2019-nCoV) sa China at iba pang mga bansa.

Humingi rin ng guidelines o patnubay ang DFA sa DOH hinggil sa ipatutupad na protocol sakaling kailanganin na ang evacuation at repatriation ng mga Filipino sa Wuhan City at iba pang mga lugar sa China na apektado ng virus.

Gayundin ang pagbalangkas ng mga karagdagang abiso para sa mga Filipinong nagtatrabaho o naninirahan sa mga bansa apektado ng nCoV at paglalagay ng hotline ng DOH sa bawat foreign service post ng Pilipinas sa China.

Sa kasalukuyan, umaabot sa 150 mga Filipino ang nasa Wuhan City.