DWIZ 882

Ipinag-utos na ni Pangulong Rodrigo Duterte ang pagpapatupad ng travel ban sa mga galing ng Hubei Province sa China.

Ito ay kasunod ng outbreak ng novel coronavirus.

Ayon kay Presidential Spokesperson Salvador Panelo, nakadepende pa sa mga mangyayari sa China sa mga susunod na araw ang pagpapalawig ng ban.

Kahapon ay kinumpirma na ng Department of Health (DOH) ang kauna-unahang kaso ng nCoV sa bansa

Magugunitang ang Wuhan Province sa Hubei ang itinuturing na episentro ng outbreak ng sakit. — ulat mula kay Jopel Pelenio (Patro 17)

Tumaas ang bilang ng persons under observation (PUI) na pinangangambahang mayroong novel coronavirus (2019-nCoV).

Ayon sa Department of Health (DOH), mayroon nang 29 ang PUI sa bansa isang araw matapos makumpirma ang unang kaso ng sakit sa bansa.

Sa ngayon ay ipinag-utos na ni Pangulong Duterte ang travel ban sa mga galing ng Hubei Province, China.

Aminado ang Bureau of Immigration (BI) na apektado na ang lahat ng mga biyahe papasok at papalabas ng bansa sa paliparan at pantalan ng novel coronavirus (2019-nCoV).

Ayon kay Immigration Spokesperson Dana Sandoval, makikita sa kanilang datos ang pagbaba ng traveller’s rate mula nang pumutok ang balita hinggil sa nCoV.

Makikita natin bumababa yung rate nung travelers sa airport natin pati sa sea ports, pati mga cruise ships natin bumababa yung dami,” ani Sandoval.

Sa ngayon ay binigyan na ng derektiba ang mga frontline personnel ng immigration na alalayan at tulungan ang bureau of quarantine.

Dagdag pa nito, oras na may makita silang pasahero na may travel history sa Hubei Province ay agad nila itong itu-turnover.

Nagkaroon ng direktiba si Commissioner Morente dito sa ating mga frontline personnels not just sa airports but also sa mga sea ports, doble vigilant alalayan natin ang Bureau of Quarantine, ang maitutulong ng immigration is that kung may makita pa kaming galing Hubei province ibabalik namin sa Bureau of Quarantine for re-checking and double checking just for caution and prudence,” ani Sandoval. — panayam mula Ratsada Balita.

Nilinaw ng pamunuan ng Cebu Pacific na kailangan muna nilang gumawa ng mas malalimang validation at verification.

Ito ay matapos lumabas ang mga report na eroplano ng Cebu Pacific ang sinakyan ng Chinese national na nagpositibo sa novel coronavirus (nCoV).

Ayon kay Cebu Pacific Spokesperson Charo Logarta-Lagamon, wala pa silang hawak na sapat na detalye sa ngayon dahil kahapon lang din nila ito nalaman.

Aniya, makikipag-ugnayan sila sa Department of Health (DOH) hinggil dito.

Samantala, nilinaw naman ni Logarta na wala pa silang opisyal na pahayag mula sa DOH at marami pang detalye ang kailangan nilang makuha.

We have to wait for official word, we have to wait and validate to the Department of Health. Hindi natin alam knug ano pa ang detalye nito, kasi kailangan pong malaman kung sino siya, sino’ng nakaupo sa tabi nya, so, ito ‘yung mga bagay na kailangan pa naming i-coordinate with them,” ani Lagamon. —sa panayam ng Balitang Todong Lakas

Tukoy na ng Department of Health ang mga eroplanong sinakyan ng pasyenteng kauna–unahang nagpositibo sa novel coronavirus sa bansa.

Ayon kay Health Undersecretary Eric Domingo, ang 38 anyos na babaeng Chinese mula sa Wuhan ay sumakay ng Cebu Pacific flight mula Hong Kong patungong Cebu.

Sumakay muli ito ng Cebu Pacific flight mula Cebu patungong Dumaguete.

Habang Philippine Airlines flight naman ang sinakyan nito mula Dumaguete pa–Maynila.

Nasa proseso na ang DOH ng contact tracing para matukoy ang mga taong nakahalubilo ng naturang pasyente.