Ipapatupad na ng lokal na pamahalaan ng lalawigan ng Cebu ang 14-day quarantine period sa mga pasahero mula mainland China, Hong Kong at Macau.
Ayon sa mga report, ito ay upang masiguro na walang sintomas ng novel coronavirus ang mga pasahero bago pa man makarating ng Cebu.
Nagpulong kahapon ang mga opisyal ng pamahalaan, pribadong sektor at mga travel agencies hinggil dito.
Sa ngayon ay inihahanda na ang mga quarantine facilities ng lalawigan.
Kinansela ng ilang Chinese airlines ang kanilang byahe papuntang Aklan.
Ayon sa Civil Aviation Authority of the Philippines (CAAP), nag abiso sa kanila ang mga Chinese carriers kahapon.
Samantala, nagbawas naman ng mga byahe patungong China ang ilang mga airlines sa bansa.
Susupindehin ng Philippine airlines ang kanilang mga biyahe mula kalibo papuntang Nanking, Hangzhou at Shanghai sa China.
Babawasan naman ng Cebu Pacific ang mga byahe mula Pilipinas papuntang China, Hong Kong at Macau mula Pebrero 5 hanggang Marso 19.
Kanselado na ang opening parade ng Panagbenga Festival ngayong taon na nakatakda dapat gawin bukas.
Ginawa mismo ang anunsyo ni Baguio City Mayor Benjamin Magalong.
Ito ay kasunod ng outbreak ng novel coronavirus.
Samantala kanselado na rin ang ilang pang mga aktibidad sa Baguio City sa susunod na tatlong linggo.
Nilinaw ng Department of Health (DOH) na 31 ang bilang ng persons under investigation (PUI) sa banta ng 2019 novel coronavirus.
Ayon kay Health Undersecretary Eric Domingo, pasado 12:00 ng tanghali ngayong araw ay nadagdagan pa ng dalawa ang mga PUI.
Ginawa ang paglilinaw matapos lumabas ang report na pumalo na sa 56 ang kasalukuyang PUI na binabantayan sa ngayon.
Samantala, kasama na sa naturang bilang ang isang kumpirmadong kaso ng nCoV sa bansa.
As of 12 noon today we have two additional persons under investigations reported in the last 24 hours which brings the total to 31, we have now 31 persons under investigation including one of them which turned out to be positive and verified case,” ani Domingo.
Muli na namang bumaba ang lebel ng tubig sa Angat Dam makalipas ang 24 oras.
Ayon sa tala ng PAGASA hydrology division, mula sa 202.89 meters kahapon ay nasa 202.78 meters na lamang ang tubig sa dam.
Bahagya ring nabawasan ang tubig sa La Mesa Dam na nasa 77.80 meters na lamang ngayon mula sa 77.81 meters kahapon.
Nabawasan din ang lebel ng tubig sa Ipo Dam, Pantabangan Dam, Magat Dam at Caliraya Dam.
Samantala, nadagdagan naman ang antas ng tubig sa Binga Dam at Ambuklao Dam.
Muli na namang naranasan ang napakalamig na klima sa Baguio City kaninang umaga.
Base sa tala ng PAGASA synoptic division, pumalo sa 11.2 degrees celsius ang temperatura sa Baguio City kaninang 6:00 ng umaga.
Dahil dito ay muling nag paalala ang mga opisyal sa mga nasa lungsod na magsuot ng makakapal na damit, bonnet at scarf bilang panangga sa lamig.
Magugunitang noong nakaraang linggo ay nakaranas din ng malamig na klima ang baguio nang nakapagtala ng 11.4 degrees celsius na temperatura.
Wala nang nakikitang bakas ng sulfur dioxide sa Bulkang Taal.
Ito ang kinumpirma ng Philippine Institute of Volcanology and Seismology (PHIVOLCS) sa inilabas nitong bulletin.
Anila, below instrumental detection na ang sulfur dioxide sa bulkan.
Ang sulfur dioxide ang siyang indikasyon na umaangat na ang magma sa bunganga ng bulkan.
Sa kabila nito ay muli na namang nakapagtala ng pitong volcanic earthquake sa paligid nito.
Mahigpit na ipinatutupad ng San Lazaro Hospital ang ‘no face mask, no entry policy’.
Ito ay matapos ianunsyo ng Department of Health (DOH) ang kauna-unahang kaso ng novel coronavirus (2019-nCoV) sa bansa.
Ayon sa reports, nakapaskil na sa pasilidad ng ospital ang naturang abiso.
Samantala, makikita naman sa paligid ng ospital ang kabi-kabilang mga tindero ng face mask.
Mas pinaigting pa ng mga lalawigan sa Pilipinas ang kanilang mga hakbangin kontra novel coronavirus (2019-nCoV).
Agad dinala sa isolation room sa isang ospital sa Nueva Vizcaya ang mag-ina na kagagaling lamang sa bansang Hong Kong.
Nais naman ipatigil ng Puerto Prinsesa City sa Palawan ang lahat ng direct flight mula sa naturang bansa.
Naghihigpit na rin ang mga otoridad sa Tablas Island sa Romblon.
Nanawagan naman ang mga opisyal ng ilang lalawigan sa bansa sa publiko na panatilihin ang kalinisan.
Kinumpirma na ng pamahalaan ng bansang Italy ang unang dalawang kaso ng novel coronavirus (2019-nCoV) sa kanilang bansa.
Ayon kay Italian Minister Giuseppe Conte, dalawang turistang Chinese national ang unang mga kaso ng sakit.
Magugunitang idineklara na ng World Health Organization (WHO) ng global public health emergency dahil sa outbreak ng nCoV.