Nakatakdang magsagawa ng hearing ang Senado kaugnay sa pagresponde ng gobyerno sa 2019 novel corona virus respiratory disease.
Ayon kay Senator Christopher ”Bong” Go, chairman ng Senate Health Committee, inaasahang dadalo sa naturang pagdinig ang mga kinatawan ng mga concerned agencies tulad ng DOH, DFA, DOTr at mga opisyal ng MIAA.
Binuksan naman ng senador ang imbitasyon para sa mga doktor na maaring magbahagi ng kanilang kaalaman para labanan ang nCoV.
Naniniwala si Senate President Vicente Sotto III na mas makabubuting hindi muna pauwiin ang mga Pilipino sa Wuhan, Hubei Province.
Ayon kay Sotto, ito ay para maiwasan na makaranas sila ng diskriminasyon at maging kanilang mga kapamilya kapag nakabalik sila sa bansa.
Naniniwala naman si Sotto na sakaling magkaroon ng travel ban ay dapat na sakupin nito hindi lamang ang mga Chinese bagkus maging ang mga ibang lahi na nagmumula sa China ay pagbawalan din.
Sakali aniyang lumala pa ang sitwasyon ay hindi na dapat papasukin sa bansa ang mga banyagang magmumula sa mga bansang may kaso ng novel corona virus.
Kanselado ang opening parade ng ika–25 taong Baguio flower festival bukas, Pebrero 1 kasunod ng kumpirmasyon ng kauna–unahang kaso ng novel corona virus sa bansa.
Ayon kay Baguio City Mayor Benjamin Magalong, bukod sa opening parade ay kanselado na rin ang lahat ng crowd-drawing activities hanggang sa ikatlong linggo ng Pebrero kabilang dito ang Cordillera Administrative Region Athletic Association na dapat na magsisimula sa February 16.
Ipinauubaya naman ni Magalong sa pamunuan ng Philippine Military Academy Alumni Association kung itutuloy nito ang annual homecoming sa February 13.
Ngunit paglilinaw ni Magalong hindi nakasailalim sa lockdown ang syudad at maari pa ring bumisita ang mga turista sa summer capital.
Lumobo ang presyo ng mga memorabilia ni NBA Legend Kobe Bryant.
Ayon sa isa sa mga sikat na online auction website sa Estados Unidos, aabot ng halos $3-M ang presyo ng bola na may pirma ni Bryant.
Ilan pa sa mga memorabilia na aabot sa milyon ang halaga ay ang mga jersey at sapatos na pirmado rin ng NBA legend.
Magugunitang umabot din ng milyon ang halaga ng mga memorabilia ng ilan sa pinaka kilalang pangalan tulad nina Michael Jackson, Marilyn Monroe at US President John F. Kennedy.
Magpapatupad na ng two-way traffic scheme ang Kennon Road sa Baguio City.
Ito ay dahil sa inaasahang pagdami ng mga turistang pupunta rito.
Mula bukas ay inaasahang magdadatiungan na ang mga pupunta sa Panagbenga Festival at Philippine Military Academy Alumni Home Coming.
Ipapatupad ang two-way traffic scheme simula ngayong araw hanggang sa ika-6 ng gabi sa Lunes, Pebrero 3.
Ipinag-utos na ng Department of Interior and Local Government (DILG) sa mga Local Government Unit (LGU) ang pagbuo ng novel coronavirus task force.
Ayon kay DILG Spokesperson Undersecretary Jonathan Malaya, ipinag-utos ni DILG Secretary Eduardo Año na maging handa ang lahat ng LGU para sa nCoV.
Kailangang sigaruduhin ng naturang local task force na sapat ang kagamitan na meron ang lungsod tulad ng face masks.
Magugunitang kinumpirma kahapon ang kauna-unahang kaso ng nCoV sa bansa.
Mas malaki ang posibilidad na dumami at mabuhay ang novel coronavirus sa malalamig na lugar.
Ayon kay Health Secretary Francisco Duque III, ito ang isa sa maaaring dahilan kung bakit unang nakita ang virus sa mga malalamig na lugar.
Aniya, madali lang ma-control ang virus sa mga maiinit na bansa tulad ng Pilipinas.
Magugunitang mayroong incubation period na 10 hanggang 14 na araw.
Patuloy na nagbubuga ng abo ang Bulkang Taal ilang araw matapos ibaba ang alert level nito.
Ayon sa Philippine Institute of Volcanology and Seismology (PHIVOLCS), 500 hanggang 700 metro ang taas ng ibinubuga nitong puting usok.
Sa ngayon ay nananatili sa alert level 3 ang alerto ng bulkan.
Hihintayin pa ng Department of Health (DOH) ang pinakahuling risk assessment ng World Health Organization (WHO) bago tuluyang ipatupad ang total ban sa mga bumiyahe galing mainland China.
Ayon kay Health Secretary Francisco Duque III, tanging mga byahe mula sa Hubei province ang nasa ilalim ng travel restrictions.
Inirekomenda naman ni Duque ang pagpapatupad ng temporary restriction sa mga babyahe mula Maynila papuntang Hubei.
Magugunitang ipinag-utos na ni Pangulong Rodrigo Duterte ang pagpapatupad ng travel ban sa mga byahe mula Hubei province.
Inihahanda na ng ilang ospital sa Maynila ang kani-kanilang mga quarantine at isolation area.
Ito ay kasunod pa rin ng banta ng novel coronavirus.
Itinayo na ng Manila Doctors Hospital ang kanilang quarantine area sa labas ng kanilang pasilidad.
Magugunitang kinumpirma na ng Department of Health (DOH) ang unang kaso ng sakit sa bansa kahapon.