DWIZ 882

Ikinokonsidera ng World Health Organization (WHO) ang pagde deklara ng Public Health Emergency of International Concern (PHEIC) sa gitna ng 2019 novel coronavirus outbreak.

Tinukoy sa 2015 International Heath Regulations na maaring magdeklara ng PHEIC kapag mayroong severe disease na maaring maglagay sa panganib sa kalusugan ng publiko.

Kapag naideklara ang public health emergency, maaring magpatupad ang mga bansa ng ban laban sa mga dayuhan na mula sa bansang pinagmulan ng outbreak.

Una nang idineklara ang PHEIC nuong april 2009 dahil sa swine flu, nuong 2014 dahil sa wild poliovirus, 2014 hanggang 2016 at nuong 2018 dahil sa ebola outbreak at nuong 2015 hanggang 2016 dahil sa zika virus.

Ang 2019 novel corona virus ay nagmula sa Wuhan, China at kumalat na sa mahigit 20 bansa sa mundo.

Naniniwala si Senador Ralph Recto na panahon na para pansamantalang hindi papasukin sa bansa ang mga bisita mula sa China.

Kasunod ito ng naitalang kauna unahang kaso ng novel coronavirus sa bansa.

Ayon kay Recto, maari namang ipaliwanag na hindi tuluyang isinasara ng bansa ang pinto nito sa China.

Paliwanag ng senador hindi ito permanente tulad ng Great Wall of China kundi ngayon lamang habang mayroong banta ng nCoV.

Hindi makikialam ang Malakanyang sa ginawang raid ng Federal Bureau of Investigation sa simbahan ng Kingdom of Jesus Christ sa Amerika.

Ayon kay Presidential Spokesman Salvador Panelo, kung mapapatunayang nagkasala ang 3 inarestong lider ng simbahan ay dapat lamang na sumunod at irespeto ng mga ito sa batas.

Hindi naman aniya maaring mag reklamo ang Pilipinas sa naturang raid lalo na’t lehitimo ang isinagawang raid.

Ang Kingdom of Jesus Christ ay pinamumunuan ni Pastor Apollo Quiboloy na kilalang matalik na kaibigan ni Pangulong Rodrigo Duterte.

Kinalma ng Malakanyang ang publiko na huwag mag–panic at manatiling kalmado kasunod ng unang naitalang kaso ng 2019 novel coronavirus sa bansa.

Ayon kay Presidential Communications Secretary Martin Andanar, on the top of the situation ang gobyerno lalo na ang Department of Health.

Tiniyak nitong magtutulungan ang mga health, research at law enforcement agencies para maiwasan ang pagkalat ng nCoV.

Bukod dito ay nakikipag tulungan na rin ang DOH sa health at research authorities sa Australia, Japan at China kung paano ang gagawing aksyon sa virus.

Patuloy naman ang gagawing stringent customs, immigration at quarantine measures sa mga pasaherong magmumula sa China para hindi kumalat ang virus sa bansa.

Nakikipag ugnayan na rin ang pamahalaan sa mga otoridad sa China para sa posibleng repatriation ng mga Overseas Filipino Workers (OFW) kung kinakailangan.

Kinumpirma ng Department of Health na nanatili sa isang pampublikong ospital sa Maynila ang Chinese national na nagpositibo sa novel corona virus.

Ayon kay DOH Spokesperson Eric Domingo, kasalukuyang nasa San Lazaro Hospital ang dayuhan at naka–isolate.

Nagpositibo ang babaeng chinese sa naging resulta ng confirmatory test mula sa Australia.

Sa ngayon ay wala na aniyang nakikitang anomang sintomas ng nCoV sa babae.

Siniguro ni Domingo na palalabasin lamang ang pasyente kapag nag negatibo na ito sa naturang virus.

Inirekomenda ng Department of Health (DOH) ang pagpapatupad ng temporary ban papunta at galing sa Hubei province sa China kasunod ng naitalang kauna–unahang kaso ng nCoV sa bansa.

Ayon kay Health Secretary Francisco Duque III, posibleng lumawak pa ang mga lugar na sakop ng ban ngunit nakadepende pa ito sa magiging assessment ng World Health Organization.

Samantala, kinalma naman ng DOH ang publiko kaugnay sa naturang sakit.

Ayon kay Duque, dapat na maging bigilante sa lahat ng oras, patuloy na maging malinis sa pangangatawan at magkaroon ng healthy lifestyle.

Siniguro ng Department of Health (DOH) na naka handa ang lahat ng pagamutan ng pamahalaan na tanggapin ang mga taong pinangangambahang mayroong novel corona virus.

Kasunod ito ng kumpirmadong kauna unahang kaso ng nCoV sa bansa.

Ayon kay Health Secretary Francisco Duque III, sapat ang pasilidad ng gobyerno para kalingain ang mga pasyenteng hinihila at positibo sa nCoV.

Nanatili namang naka high alert ang Bureau of Quarantine sa istriktong surveillance sa mga papasok sa mga pantalan at paliparan sa buong bansa.

Samantala, ngayong araw ay inaasahang magkakaroon ng high level meeting ang interagency task force on emerging infectious disease kaugnay sa nCoV.