Mamimigay ang Department of Transportation (DOTr) ng “malasakit help kits” sa mga pasahero ngayong araw ng mga puso.
Ayon sa DOTr mapagkakalooban nito ang mga pasahero sa iba’t-ibang istasyon ng LRT-2 at MRT-3.
Ang nilalaman umano ng malasakit help kits na ito ay bulaklak customized mugs, chocolates, alcohol at tubig.
Nais umano nilang bigyan ng ngiti ngayong Valentine’s Day ang mga pasaherong pagod sa araw-araw na byahe.
Inihayag ng Makabayan Bloc na dapat panindigan ng pamahalaan ang pagputol nito sa Visiting Forces Agreement (VFA) sa Estados Unidos.
Ayon kay Gabriela Rep. Arlene Brosas, dapat nang isapinal ng gobyerno ang nasabing hakbang.
Inaasahan umano nilang hindi na makikipag-usap pa ang bansa sa Amerika para bawiin ang pagputol nito sa VFA.
Giit ni Brosas, tanging ang Estados Unidos lamang ang nakinabang sa nasabing kasunduan.
Itinalaga ni Pangulong Rodrigo Duterte bilang pinuno ng Government Service Insurance System (GSIS) si dating Supreme Court Chief Justice Lucas Bersamin.
Ito ang kinumpirma ni SEN. Christopher BONG GO kaugnay sa bagong posisyon ni Bersamin.
Ani Go nakapanumpa na rin si Bersamin sa Pangulo noon pang nakaraang linggo.
Magugunitang tumayong officer in charge ng GSIS si Rolando Macasaet matapos magbitiw sa pwesto si Jesus Clint Aranas.
Naging kwestyunable ang pamamalakad ni Aranas sa GSIS kaya’t nawalan ng kumpiyansa ang Pangulo rito.
Tuluyan nang tinuldukan ng Commission on Elections (Comelec) ang ambisyon ni dating Duterte Youth Chairman Ronald Cardema na maging kinatawan ng nasabing partido.
Ito ang kinumpirma ni Comelec Commissioner Rowena Guanzon makaraang paboran ng Comelec En Banc ang naunang desisyon ng Comelec 1st division na nagsasabing hindi kwalipikado si Cardema ba naging kinatawan ng partido dahil sa edad nito.
Si Cardema ay 34 anyos na nang tumakbo sa eleksyon bilang 1st nominee ng Duterte Youth Partylist.
Taliwas ito sa nakasaad sa party list system kung saan ang nominado ng isang youth sector ay hindi dapat lalagpas sa 30.
Nagpasalamat ang ABS-CBN sa lahat ng mga sumusuporta sa gitna ng isyu sa kanilang prangkisa.
Nakasaad sa inilabas na pahayag ng media network na nagsisilbing inspirasyon sa kanila ngayon ang natatanggap na suporta mula sa iba’t-ibang grupo, kumpanya, organisasyon at indibidwal.
Lalo umano nilang pagsisikapang makapag hatid ng balita, kasiyahan at serbisyo-publiko sa taumbayan.
Kaya’t ipinapanalangin umano ng pamununan ng ABS-CBN na magkaroon ng linaw ang lahat ng tungkol sa isyung kanilang kinakakaharap.
Magpapatupad ng preventive measure kontra COVID-19 ang ilang establisyemento sa inaasahang pagdagsa ng mga tao ngayong araw ng mga puso.
Gaya na lamang ng idaraos na dalawang Valentine’s concert sa Cultural Center of the Philippines (CCP) sa kabila ng banta ng COVID-19.
Ayon kay Rosario Tala, nangangasiwa sa venue operations ng CCP magkakaroon sila ng thermal scanning upang masuri ang body temperature ng bawat papasok sa venue.
Ani tala ang sinomang rerehistro ng 38-plus body temperature ay hindi papayagang pumasok.
Maliban sa thermal scanners, naglagay din ang CCP ng mga hand sanitizers at alcohol sa lugar at may mga face mask na suot ang mga CCP staff.
Samantala gumamit naman ng mga disinfectant ang ilang restaurant managers’ para linisin ang kanilang mga gamit.
Nakahanda din ang mga alcohol sakaling humingi ang mga kustomer.
Wala ng visa extension para sa mga Pilipinong naabutan ng implementasyon ng travel ban sa Taiwan dahil sa banta ng COVID-19.
Ito ang inanunsyo ng Manila Economic and Cultural Office (MECO) matapos panindigan ng pamahaalan ang travel ban sa Taiwan.
Ayon kay MECO Chairman Lito Banayo, kinakailangan nang makapag-book ng pinakamaagang byahe pabalik ng Pilipinas ang mga na-stranded na mga Pinoy sa Taiwan.
Hindi na kasi aniya papayagan pa silang manatili sa bansa matapos ang kanilang 14-day visa free stay.
Tinatayang aabot sa 100 Pinoy ang bi-byahe sana patungong Pilipinas ngunit na-stranded matapos abutan ng travel ban.
Aabot naman sa 200 pasahero na patungo sanang Taiwan ang stranded ngayon sa Ninoy Aquino International Airport (NAIA).
Dapat idiretso na sa bilibid ang sundalong Amerika na nakakulong ngayon sa Camp Aguinaldo sa sandaling mawalang bisa na ang Visiting Forces Agreement (VFA).
Pahayag ito ni Atty. Harry Roque, dating abogado ng pamilya ni Jennifer Laude, ang transgender na napatay ni Lance Corporal Joseph Scott Pemberton.
Bagamat naipadala na sa US embassy ang notice of termination para sa VFA, mga anim na buwan pa ang hihintayin bago ito tuluyang mawalan ng bisa.
Nakikiusap ako sa BuCor at buong sandatahan bantayan niyo yan si Pemberton, ang aking freelance prediction itatakas yan ng mga Amerikano,” ani Roque.
Tiniyak ng Pangulong Rodrigo Duterte patuloy na poprotektahan ng kanyang administrasyon ang kalayaan sa pamamahayag.
Sa oath taking ceremony ng mga bagong opisyal ng Kapisanan ng mga Broadcasters sa Pilipinas (KBP), binigyang diin ng Pangulo na titiyakin nya ang kaligtasan ng mga mamamahayag sa pagganap ng kanilang tungkulin.
Sinabihan ng Pangulo ang media na huwag magdalawang isip na ibalita kahit ang mga isyu na maaaring makasira sa kanya basta’t totoo.
Sa kabila nito, sinabi ng Pangulo na hindi rin naman nya kukunsintihin ang anumang pang-aabuso sa hanay ng media.
Our constitution upholds the freedom of the press, the function of broadcast and its privilege granted by government. It is viewed with the best interest of the nation and our people, we will not tolerate any abuse of the privilege. Ako, ang aking hinihingi is simply the truth, if the truth will destroy me so be it. ‘Wag kayo mag isip- isip pa ng kung ano, if the truth, masisira ako that’s a price of being in public service,” ani Duterte.
Hiniling ni Labor Secretary Silvestre Bello lll sa Department of Health (DOH) na tanggalin na ang travel ban sa Taiwan para sa kapakanan ng mga OFW’s na babalik sa kanilang trabaho.
Nagpahayag ng pangamba si Bello na maapektuhan ang trabaho ng mga Pinoy sa Taiwan.
Hindi rin anya itinatago ng mga OFW’s na babalik na sana taiwan subalit naabutan ng ban na maibigay sa iba ang kanilang trabaho.
Una rito, hindi itinago ng Taiwan ang pagkadismaya nang isama sila sa travel ban na ipinatupad laban sa China dahil sa pagkalat ng coronavirus disease (COVID-19).
Binigyang diin ng Taipei Economic and Cultural Office na ang Taiwan ay isang malayang bansa na hiwalay sa Peoples Republic of China.
Nilinaw naman ng Malakanyang na walang kinalaman sa One China Policy ang pagsama nila sa Taiwan sa travel ban.