DWIZ 882

Kumpiyansa si Department of the Interior and Local Government (DILG) Sec. Eduardo Año na magiging patas sa lahat ang nagpapatuloy na adjudication at validation ng Philippine National Police (PNP) sa kanilang mga kabaro.

Ito’y sa harap na rin ng paglutang ng ilang mga pangalan tulad ni P/Ltc. Jovie Espenido na ibinibilang sa 357 na mga pulis na sangkot umano sa illegal na droga.

Ayon kay Año, bagama’t bunga ng intellegence gathering ang nasabing listahan, mahalaga pa rin na maisailalim ito sa validation at imbestigasyon upang mapatunayan ang mga impormasyong nakapaloob dito.

Kaya tama lang aniya ang pananahimik nila PNP Chief Gen. Archie Francisco Gamboa at Espenido upang mabigyang laya ang gumugulong na imbestigasyon at maiwasan itong mabahiran ng anumang kulay.

Paglilinaw pa ng kalihim, hindi aniya nangangahulugan na nakasama si Espenido sa listahan ay napatunayang guilty na ito sa illegal na droga. — ulat mula kay Jaymark Dagala (Patrol 9)

Nagpapasalamat ang Manila Economic and Cultural Office (MECO) sa pagiging bukas at mabilis na pag-aksyon ng inter-agency task force for the management of infectious disease para muling irekunsidera ang ipinatupad na travel ban sa Taiwan.

Kasunod ito ng naging pasiya ng pamahalaan ng Pilipinas na tanggalin nga travel ban sa Taiwan.

Ayon kay MECO Head Angelito Banayo, mahigpit silang nakipag-ugnayan sa Taipei Economic and Cultural Office (TECO) matapos magbanta ang pamahalaan ng Taiwan na gaganti sa Pilipinas dahil sa ipinatupad na travel ban.

Kabilang na rito ang pagbawi sa umiiral na no visa entry ng mga Filipinong magtutungo ng Taiwan gayundin ang planong pagpapatupad ng deployment ban sa mga OFW’s.

Nag-coordinate din kasi kami din, we really helped each other out at pati yung kanilang ministry of foreign affairs Minister Joseph Wu nag-appela dun sa gabinete ni President Tsai na huwag muna pabigla-bigla ang reaksyon natin hintayin muna natin because efforts were being made both TECO and MECO to reverse the initial decision,” ani Banayo.

Iginiit naman ni Banayo na walang dapat ipag-alala ang pamahalaan ng Pilipinas kaugnay sa kaso ng coronavirus disease (COVID-19) sa Taiwan dahil maganda ang health care system sa nabanggit na bansa.

Sa katunayan, itinuturing pa aniya ang Taiwan bilang nangungunang bansa sa buong mundo na may pinakamagandang health system, daig ang Amerika at Canada.

Yung na su-survey na firm which in 2015 included Davao City as the 9th safest city in the world, if you remember that.  This has his survey on health systems also for 2018 and 2019 it ajudged Taiwan has having to be the best health system in the whole world, ” ani Banayo. — panayam mula sa Sapol ni Jarius Bondoc.

Maaari nang muling makabyahe patungong Taiwan at pabalik ng Pilipinas.

Ito’y matapos alisin ng pamahalaan ang travel ban sa Taiwan ngayong Biyernes, Pebrero 14.

Ayon kay Presidential spokesperson Salvador Panelo, ang desisyon ay ibinase sa naging pasya ng Inter-Agency Task Force for Management of Emerging Infectious Diseases (IATF).

Mayroon naman kasi sila aniyang pinatutupad na strict measures at protocols para mapigilan ang pagkalat ng coronavirus disease 2019 (COVID-19).

Bukod dito, sinabi rin ni Panelo na muling susuriin ng IATF kung posible rin ang pag tanggal ng travel ban sa iba pang mga bansa kabilang ang Macau.

Matatandaang hindi ikinatuwa ng Taiwanese government ang naging hakbang ng Pilipinas sa pagpapatupad ng travel ban dito dahil sa banta ng COVID-19.

Giit ng Malacañang, ang pagpatupad sa travel ban ay para sa kaligtasan ng mga Pilipino at hindi dahil sa anumang usaping politikal.

Natapos na ang quarantine period ng 311 katao na nagkaroon ng close contact sa tatlong kumpirmadong kaso ng coronavirus disease 2019 (COVID-19).

Ayon kay Department of Health Assistant Secretary Dr. Maria Rosario Vergeire, 218 mula sa 277 contacts ng unang dalawang kaso ng COVID–19 sa bansa ang nakakumpleto ng kanilang 14- day quarantine period.

Habang 15 iba pa na naka-close contact ng Chinese couple ay nakasailalim pa sa home quarantine habang ang 44 na iba pa ang naka–admit sa ospital.

Para naman sa ikatlong kaso ng COVID–19, 255 sa 740 na contacts nito ang nahanap na ng DOH kung saan 172 na ang nakapanayam ng DOH at 93 sa mga ito ang nakakumpleto na ng home quarantine.

62 sa mga ito ang nasa home quarantine pa rin habang 17 naman ang nasa pagamutan matapos na makitaan ng sintomas.