DWIZ 882

Nilinaw ng World Health Organization (WHO) na hindi pa tukoy sa ngayon ang pinagmulan ng corona virus disease 2019 (COVID-19).

Ito’y matapos maglabasan ang iba’t ibang espekulasyon tungkol sa pinanggalingan ng virus.

Ayon kay Dr. Rabindra Abesayinghe, kinatawan ng WHO sa bansa, hangga’t wala pang napatutunayan sa mga isinasagawang pag-aaral ay mananatiling teorya lamang ang mga hinuha kung saan galing ang COVID-19.

Isa sa sinasabing pinagmulan ng sakit ay ang bat soup o sinabawang paniki.

Hindi nangangamba si AFP Chief of Staff General Filemon Santos Jr., sa posibleng maging epekto ng pagtatapos ng visiting forces agreement sa pagitan ng Pilipinas at Estados Unidos.

Ayon kay Santos, tiwala siyang kakayanin ng militar na mag-survive kahit pa wala ng tulong mula sa Amerika.

Aniya may mga kagamitan rin naman ang AFP para idepensa ang bansa laban sa mga kaaway nito.

Kasabay nito, tiniyak ni Santos ang suporta ng militar sa naging desisyon ni Pangulong Rodrigo Duterte.

Inaasahan na ng Malakaniyang ang negatibong reaksyon ng Amerika sa pagkansela ng Pilipinas sa Visiting Forces Agreement (VFA).

Ayon kay Presidential Spokesman Salvador Panelo, alam nilang hindi ikatutuwa ng Amerika ang naturang hakbang.

Ani Panelo matagal na kasing pinakikinabangan ng Amerika ang VFA, ngunit dahil biglang naputol ito, tiyak umanong malaki rin ang epekto nito sa kanilang pandaigdigang depensa.

Giit ni Panelo ‘di hamak na dehado ang pwersa ng gobyerno sa VFA kaya’t dapat aniya ay matagal ng bumitiw dito ang Pilipinas.

Aabot sa P75-B ang halagang nalugi sa mga magsasaka ng palay dahil sa implementasyon ng republic act 11203 o rice liberalization law noong nakaraang taon.

Ito ay batay sa datos ng Anakpawis Partylist, bantay bigas rice watch at Amihan National Federation of Peasant Women.

Ayon sa mga grupo, mula nang naging kasapi ang bansa sa world trade organization noong 1995 ay bumagsak na ang farm gate price ng bigas sa mga baryo.

Dito na rin umano sila nagsimulang malugi at mabaon sa utang.

Lalo pa anilang lumala ang sitwasyon nang maging batas ang ra 11203 na itinututuring ng grupo na “anti-peasant legacy” ni Pangulong Rodrigo Duterte.

Dahil dito nanawagan ang grupo na ibasura ang batas at sa halip ay isulong ang National Rice Industry na siyang iiwanan at magiging pamana sa mga susunod na henerasyon.

Binalaan ni Pangulong Rodrigo Duterte ang mga tinaguriang “ninja cops” o yung mga pulis na sangkot sa illegal na droga.

Sa talumpati sa oath taking ng mga bagong opisyal ng Kapisanan ng mga Brodkaster ng Pilipinas (KBP), na bagama’t nabawasan na ang narco generals pati ang mga sindikato ng ninja cops, wala aniyang ibang patutunguhan ang mga ito kundi mamatay dahil sa kanilang kasalanan sa bayan.

Yung mga generals pati yung ninja cops, they are still around but I reduced to about apat na lang, and they will all die because may kasalanan sila sa bayan,” ani Duterte.

Ayon pa sa Pangulo walang kawala sa kaniya ang mga tiwaling pulis na ito dahil kahit aniya tapos na ang kaniyang termino at nagsanga ang kanilang mga landas ay babarilin pa rin niya ang mga ito.

Ngayon, kung hindi ko sila maabutan pag hindi na ako mayor, babarilin ko pa rin sila pag nakita ko. Same, whether I’m President or ordinary, pag nagkita tayo at alam kong galit ka sa akin dahil sa droga, eh magbabarilan talaga tayo,” ani Duterte.