Nanindigan ang Bureau of Internal Revenue (BIR) sa desisyon nilang huwag nang palawigin ang April 15 deadline para sa paghahain ng annual income tax return (ITR).
Ayon kay Atty. Arnel Guballa, deputy commissioner ng BIR operations group, walang pagbabago sa nakalatag nang deadline.
Sa halip, maaari anyang mag-apply sa 60-day tentative payment online ang mga hindi makakapagfile ng kanilang annual ITR.
Nag-alok umano ng tulong ang Grab Philippines para ihatid at sunduin ang mga health workers sa kanilang pinapasukang ospital.
Ayon sa Department of Transportation (DOTr), isasapubliko nila ang mapagkakasunduang mga ruta para sa service ng Grab sa sandaling maplantsa na ito.
Batay sa commitment na ibinigay ni Grab Philippines President Brian Cu, libre at walang anumang babayaran ang pasahero na ihahatid nila sa ospital.
Umarangkada na ang 10 bus mula sa Department of Transportation (DOTr) na nagpick-up ng mga health workers at iba pang essential personnel.
DOTr Press Release
18 March 2020DOTr to deploy buses to transport health workers to hospitals amid Enhanced Community Quarantine
Amid the ongoing Luzon-wide enhanced community quarantine, Transportation Secretary Arthur Tugade has..
READ FULL: https://t.co/w0klu2MS8z pic.twitter.com/2DsC52947m
— DOTrPH (@DOTrPH) March 17, 2020
Alas-7 ng umaga nagsimula ang operasyon sa dalawang pick up points, ang Parañaque Integrated Terminal Exchange (PITX) at ang BFCT East Metro Transport Terminal sa Marikina City.
Tatlo ang ruta na dadaanan ng mga bus, ang una na mula sa PITX ay maghahatid sa Makati Medical Center, St. Lukes BGC, Rizal Medical Center, The Medical City-Ortigas, East Avenue Medical Center, Philippine Heart Center, Lung Center of the Philippines at Quezon City General Hospital.
Ang pangalawang ruta ay mula PITX patungo ng Pasay City General, Adventist Medical Center Manila, Philippine General Hospital, Jose Reyes Memorial, Manila Doctors Hospital, UST Hospital, San Lazaro Hospital, Jose Reyes Memorial, at Chinese General Hospital.
Samantala, ang ikatlong ruta ay mula sa BFCT patungo ng Quirino Memorial Medical Center, East Avenue Medical Center, Philippine Heart Center, Lung Center, Providence Hospital, Capitol Medical Center, St. Lukes East Avenue, UST Hospital at San Lazaro Hospital.
Una rito, nagdeploy na rin ng mga sasakyan ang Philippine Coast Guard para maghatid ng mga health workers sa Maynila.
Samantala, nagset up na rin ng operations center ang DOTr para sa motor pool na gagamitin ng mga miyembro ng Inter-Agency Task Force (IATF) for the Management of Emerging Infectious Diseases.
Pansamantalang nag-off air ang CNN Philippines television station.
Itoy upang bigyang daan ang disinfection na isasagawa sa Worldwide Corporate Center sa Shaw Blvd., Mandaluyong City kung saan nabo-broadcast ang CNN Philippines.
Ang disinfection ay kasunod ng kumpirmasyon na mayroong isang nagpositibo sa COVID-19 sa kanilang gusali.
Umaasa ang CNN Philippines na makababalik sila sa himpapawid sa matapos ang disinfection process.
Naglunsad na ng emergency hotlines ang Department of Health (DOH) para sa mga nangangailangan ng patnubay hinggil sa coronavirus disease 2019 (COVID-19).
Ayon sa DOH, maaaring tumawag sa (02) 894-26843 (COVID) at 1555 ang sinumang mayroong katanungan hinggil sa COVID-19.
Dito rin maaaring tumawag ang mga nangangilangan ng ayuda kung nagkaroon ng exposure sa mga kumpirmadong kaso ng COVID-19 o patients under investigation (PUIs).
Ang hotline ay inilunsad sa pagtutulungan ng DOH, national emergency hotline ng Department of the Interior and Local Government DILG at PLDT, Inc..
Nakatakda nang ipamahagi ng Mandaluyong City ang 13th month pay ng mga empleyado ng City Hall.
Ipinag-utos na ni Mayor Menchi Abalos ang pagpapalabas ng pondo upang matulungan ang kanilang mga empleyado na maka-agapay sa epekto ng Luzon-wide community quarantine.
Gumagawa na rin umano ng hakbang ang mandaluyong upang mabigyan rin ng benepisyo ang kanilang casual at job order employees.
Dahil dito, umaasa si Mayor Abalos na mananatili sa kani-kanilang tahanan ang mga empleyado ng City Hall hanggang sa matapos ang quarantine period.
Tatanggap ng tig-$1000 na bonus ang 45,000 empleyado ng Facebook.
Layon umano ng bonus na matulungan ang mga empleyado na magta-trabaho sa bahay o sa labas ng kumpanya na kailangang mag-set up ng home office.
Gayunman, nilinaw umano sa memo ni Facebook CEO Mark Zuckerberg na tanging ang mga full time employees lamang ang tatanggap ng bonus at hindi kasama ang mga contractors.
Una nang ini-anunsyo ng Facebook na kumpleto pa rin ang orasang pasahod nila sa kanilang hourly workers tulad ng janitors at cafeteria workers kahit pa binawasan ang oras ng kanilang trabaho.
Maglalabas ng P30-bilyong advance payment ang PhilHealth sa mga miyembro nitong ospital.
Layon nito na may magamit na pondo ang mga ospital para makatugon sa pagdagsa ng mga pasyente na maaaring may impeksyon ng coronavirus disease 2019 (COVID-19).
Ang halaga na ipagkakaloob sa bawat ospital ay katumbas ng kanilang tatlong buwang singilin sa PhilHealth, batay sa mga nagdaang datos.
Sa ilalim ito ng Interim Reimbursement Mechanism (IRM) kung saan ibabawas na lamang sa future claims ng ospital ang matatanggap nilang pondo.
Mainit na temperatura ang naranasan ng mga residente sa Cotabato City, kahapon, ika-17 ng Marso.
Ayon sa PAGASA, naitala sa 37.2°C ang pinakamainit na temperatura sa Cotabato City, kahapon.
Nakapagtala rin ng mainit na temperatura sa ilang lugar sa bansa, kabilang dito ang;
Bahagya namang lumamig ang panahon sa Metro Manila kung saan umabot lamang sa 30.4°C ang pinakamataas na temperatura na naitala sa PAGASA Science Garden sa Quezon City.
Samantala, umabot naman sa 34°C ang heat index o init na naramdaman sa katawan ng tao kahapon nang tanghali.
Ngayon ang magandang pagkakataon para magsagawa ng full maintenance ng MRT-3 at lahat ng linya ng LRT.
Ito ang iginiit ni House Transportation Committee Chairman Edgar Mary Sarmiento sa Department of Transportation (DOTr) sa gitna ng umiiral na enhanced community quarantine dahil sa banta ng coronavirus disease 2019 (COVID-19).
Ayon kay Sarmiento, maituturing itong “virtual reset button” para sa mga lumang mass transport system sa bansa, partikular na sa mga tren na madalas na nakararanas ng aberya.
Dapat din aniyang samantalahin na ang ganitong pagkakataon para maglatag ng mga kinakailangang imprastraktura at pagsasapinal sa panukalang centralized at synchronized bus dispatch system.
Malaki aniyang kaginahawahan ito sa publiko sa oras na bumalik na sa normal ang pamumuhay.
Dagdag ni Sarmiento, maaaring magpatupad ng pinaigting na biohazard protocols para sa mga manggagawang kakailanganin sa repair at maintenance works para maiwasan ang paglahat ng COVID-19. —ulat mula kay Jill Resontoc (Patrol 7)