DWIZ 882

Magpapatuloy ang operasyon ng paliparan para sa mga international flights.

Ito ang napagkasunduan ng mga miyembro ng Inter-Agency Task Force (IATF)  kahit pa matapos ang 72-hour window mula nang ideklara ang enhance community quarantine sa Luzon.

Dahil dito, maaari pa ring makabiyahe palabas ng bansa ang lahat ng pasahero, anuman ang lahi, maliban lamang sa mga turistang Pinoy.

Papayagan ding makapasok sa bansa ang mga inbound international passengers ngunit kailangang dumaan sa mahigpit na Immigration at quarantine protocols.

Kailangan namang magpakita ng medical certificates of good health ang mga pasaherong magmumula sa Italy at Iran na validated ng kanilang embahada.

Papayagan din naman ang mga sweeper flights sa mga dayuhan.

Samantala, isa lang ang pahihintulutang maghatid sa bawat pasahero sa airport at kinakailangang agad din itong umalis matapos maibaba ang pasahero sa departure area.

Kailangan ding mayroong kopya ang driver ng airline ticket ng kanyang pasaherong ihahatid.

Nagbabala ang Philippine Red Cross (PRC) kaugnay sa mga kumakalat na e-mail na namimigay umano sila ng libreng face masks at hand sanitizers sa publiko.

Ayon sa Red Cross, hindi totoo ang anila’y posibleng ‘modus operandi’ lamang na nanghihingi umano ng personal na impormasyon gaya ng pangalan, address at contact number sa mga nais magrequest ng supplies.

Payo ng Red Cross, huwag basta-basta magbigay ng anumang personal na impormasyon sa mga ito at agad na ipag-bigay alam sa mga otoridad kung makatatanggap ng ganitong uri ng e-mail.

Magpapatuloy na ang trading sa Philippine Stock Exchange (PSE), Bukas Marso 19.

Ito ay matapos ng dalawang araw na pagsasara kasabay ng pagasailalim sa community quarantine ng Metro Manila at pagpapatupad ng enhanced community sa buong Luzon.

Ayon sa PSE, magbubukas ang trading alinsunod sa regular na oras ng pagbubukas nito na 9:00 a.m. ng umaga.

Gayunman maaga itong magsasara ng 1:00 p.m. ng hapon.

Hindi rin anila papayagang makapasok sa trading floor ang mga participants.

Ang Pilipinas ang unang bansa na nagsara ng trading market sa buong mundo dahil sa problema sa coronavirus disease 2019 (COVID-19).

Umabot sa halos 600 Public Utility Vehicle (PUV) ang nasita ng mga awtoridad matapos lumabag sa unang araw ng pagpapatupad ng enhanced community quarantine sa Luzon.

Ayon kay Police National Police (PNP) Highway Patrol Group Director Police Brig. Gen. Eliseo Cruz, nagkasa sila ng operasyon para bantayan ang mga pampublikong sasakyan na bibiyahe pa rin sa kabila ng ipinag-utos na suspensyon sa mass transport sa buong luzon.

Alinsunod na rin aniya ito sa naging kautusan ni PNP Chief General Archie Gamboa.

Sinabi ni Cruz, kanila lamang binalaan ang mga nahuling taxi dirvers at pinalaya rin habang pinaalalahanan naman ang operators sa umiiral na suspensyon ng mass public transportation.

Samantala, nagbabala naman si PNP Spokesperson Brig. General Bernard Banac na maghihigpit na sila sa pagsita sa mga lalabag sa stict home quarantine at hindi na tatanggapin ang anumang dahilan sa mga susunod sa araw.

Iginiit ng Department of Health (DOH) ang pangangailangan para sa mahigpit na pagpapatupad ng mga hakbang tulad ng

community quarantine para mapababa at mapigil ang pagdami ng kaso ng coronavirus disease 2019 (COVID-19) sa bansa.

Ayon kay Health Undersecretary Maria Rosario Vergeire, posible kasing ng pumalo sa 70,000 hanggang 75,000 ang kaso ng COVID-19 sa Pilipinas sa susunod na tatlong buwan.

Ito aniya ay sa oras na maabot ng Pilipinas ang pandemic peak sa COVID-19.

Gayunman, binigyang diin ni Vergeire na halimbawa pa lamang ito ng kanilang pagtantiya para makabuo ng kinakailangan aksyon para makatugunan ng maayos ang problema.

Una ang isinailalim ni Pangulong Rodrigo Duterte sa state of calamity ang buong Pilipinas para sa mabilis at mas maayos na pagtugon ng pamahalaan sa mabilis na pagkalat ng COVID-19.

Pinalawig pa ng ng Inter-Agency Task Force (IATF) ang ibinigay na 72 oras na deadline sa mga media company para makakuha ng accreditation id’s sa Presidential Communications Operations Office (PCOO)  hanggang Marso 21.

Ito ay upang matiyak ang patuloy na operasyon ng mga media companies sa panahon ng pagpapatupad ng enhanced community quarantine sa buong Luzon.

Ayon kay IATF Spokesperson at Cabinet Secretary Karlo Nograles, hindi na nila papayagan ang mga media personnel na makalabas ng tahanan at makapag-cover sa buong luzon kung hindi makakuha ng accreditation ID matapos ang Marso 21.

Dagdag ni nograles, hanggang sa nabanggit na araw lamang din aniya kikilalanin ng mga pulis at iba pang law enforcement agency ang mga media id’s na hindi sinisita sa mga checkpoints.

Samantala, ipinauubaya naman ng IATF sa mga media companies ang pagbibigay ng transport service sa kani-kanilang mga empleyado.

Suspendido muna ang pagpapatupad ng oplan tokhang o operasyon kontra iligal na droga ng Philippine National Police (PNP).

Ito ang kinumpirma ni NCRPO Director, Police Major General Debold Sinas sa gitna na rin aniya ng umiiral na enhanced community quarantine sa Luzon at pagsasailalim sa state of calamity sa buong Pilipinas.

Ayon kay Sinas, kasalukuyang nakatutok ang pulisya sa mga hakbang para mapigilan ang pagkalat ng coronavirus disease 2019 (COVID-19) partikular ang pagpapatupad ng strict home quarantine ng lahat.

Dagdag ni Sinas, wala rin aniyang makukuhang suplay ng iligal na droga ang mga drug suspect kung matitiyak na nananatili lamang sa loob ng mga tahanan ang lahat.

Una na ring sinabi ng Department of Interior and Local Government (DILG) na magsisilbi rin ang mga pulis at opisyal ng barangay bilang mga tiga-saway ng mga estudyanteng nagpapagala-gala.