DWIZ 882

Plano ng Department of Health (DOH) na maglagay din ng dedicated hospital sa mga rehiyon para sa mga kaso ng coronavirus disease 2019 (COVID-19).

Ayon kay Health Secretary Francisco Duque III, kapag naging epektibo ang ganitong sistema sa Metro Manila ay palalawigin nila ito sa iba’t ibang rehiyon sa bansa.

Target anya nila na maging operations sa susunod na linggo ang UP-PGH at Jose Rodriguez Memorial Center bilang dedicated hospitals para sa COVID-19.

Tinututukan ngayon ng National Bureau of Investigation (NBI) ang mga nag-foforward at nagse-share ng ‘fake news’ sa social media.

Ayon kay NBI officer-in-charge Eric Distor, hindi nila ta tantanan ang pagtukoy kung saan galing ang fake news hinggil sa di umano’y looting at mob rule na nangyayari dahil sa laganap na taggutom na resulta ng lockdown.

Hindi anya nakakatulong sa sitwasyon ngayon ang magdagdag sa panic at distress na nararamdaman ngayon ng sambayanan.

Mahigpit na paiiralin ang social distancing sa isasagawang special session sa kongreso.

Ito’y ayon kay House Speaker Alan Peter Cayetano, ay upang matiyak ang kaligtasan at seguridad ng mga miyembro ng kongreso na dadalo sa naturang sesyon.

Kailangan din aniya nilang magtipon-tipon sa lalong madaling panahon upang makapagsumite ng mga hakbang at maipasa ang supplemental budget na makapapawi sa krisis na dala ng coronavirus disease (COVID-19).

Mag-aareglo din aniya ang pamunuan ng kongreso para naman sa kanilang mga miyembro na nag-uwian sa kanilang mga distrito upang makalahok sa kanilang special session.

Samantala, magugunitang nagpatawag ng special session sa kongreso si Pangulong Rodrigo Duterte para sa agarang pagpasa ng kinakailangang supplemental budget ng pamahalaan upang magamit laban sa pagkalat ng COVID-19.

Bumaba ang konsumo sa kuryente sa Luzon, kabilang na ang Metro Manila.

Ito ay ayon sa Department of Energy (DOE) kung saan, natapyasan ng 30%  ang nagagamit na kuryente sa Luzon.

Maaari umano itong maging sukatan ng lawak ng epekto sa mga negosyo ng umiiral na enhanced community quarantine.

Ayon pa kay Energy Secretary  Alfonso Cusi, malaking abala na ang Luzon-wide quarantine sa Luzon sa mga proyekto ng ahensya dahil sa mga foreign investors at mga manggagawa na hindi makabiyahe.

Paglilinaw naman ng kalihim, bagaman apektado ang sektor ng enerhiya sa bansa, prayoridad pa rin ng pamahalaan kung paano tuluyang matutuldukan ang krisis na dulot ng COVID-19.

Nilinaw ng Department of Health (DOH) na hindi maaaring bilhin at gamitin ng ordinaryong mamamayan ang testing kits sa coronavirus disease 2019 (COVID-19) kahit pa commercially available na ito.

Ayon kay Health Undersecretary Maria Rosario Vergeire, kailangan pa rin ng molecular laboratory para maproseso ang test sa COVID-19.

Ibig sabihin, kailangang ospital pa rin o doktor na may molecular lab ang kailangang magsagawa ng COVID-19 test.

Ang maganda lamang anya ngayon, mas maraming ospital na ang magkakaroon na ng kakayahang magsagawa ng testing.

Hindi na maaaring maglabas-masok ang publiko sa lungsod ng Bacoor sa Cavite.

Ito’y makaraang ideklara na sa naturang lungsod ang extreme enhanced community quarantine matapos makapagtala ng unang kaso ng corona virus disease (COVID-19) sa lugar.

Sa panayam ng DWIZ kay Bacoor City Mayor Lani Mercado, sinabi nito na mas pina-igting na nila ang checkpoint sa kanilang lungsod at bawal na ring makapasok rito lalo’t kung hindi naman residente ng kanilang lugar.

Tinukoy din ng Alkalde ang dalawang barangay na itinuturing nilang nasa containment zone.

Barangay Digman at barangay Tatlong Dagat, bawal na pumasok ang tao dyan, lumabas at pumasok,” ani Mercado.

Samantala, ayon pa kay Mercado, isang 48 anyos na government employee at walang travel history ang kanilang residente na nagpositibo sa virus.

Posibleng nahawahan umano ito ng virus sa kanyang trabaho na may kinalaman sa transportasyon.

Sa ngayon aniya ay isinailalim na sa home quarantine ang pamilya ng pasyente.

Pinayuhan naman ni Mercado ang mga residente ng Bacoor na manatili na lamang sa kanilang bahay upang maiwasan ang pagkalat pa ng virus.

Actually ang buong barangay advice namin, sa lahat ng mamamayan doon na to stay home, lahat naman ng kabuuan ng mga mamamayan sa Bacoor to stay home at ‘wag pakalat-kalat kasi meron ng community transfer nung COVID,” ani Mercado. — panayam mula sa Ratsada Balita.

Tumanggi ang Department of the Interior and Local Government (DILG) na tukuyin ang mga local government units (LGs) na lumalabag sa guidelines ng Inter-Agency Task Force hinggil sa enhanced community quarantine.

Ayon kay DILG Secretary Eduardo Año, nagpadala na sila ng komunikasyon sa mga LGUs.

Ito’y bilang pagsunod sa direktiba ng Pangulong Rodrigo Duterte na kastiguhin ang mga LGUs na hindi na sumusunod sa guidelines.

Tinukoy ni Año ang mga LGUs na nagsara ng kanilang borders at ayaw magpadaan ng mga kargo kahit pa pagkain ito o mahahalagang gamit para sa ibang lalawigan.

Iginiit ni Año na hindi dapat maantala o harangin ang mga cargo lalo na kung ito ay pagkain.

Nakiusap naman si Cabinet Secretary Karlo Nograles sa media na huwag nang igiit na pangalanan ang mga LGUs na mayroong paglabag upang hindi na lumaki pa ang isyu.

Dapat anyang isaisip ng lahat na walang nangyayaring away sa pagitan ng mga opisyal ng gobyerno dahil sama-sama dapat nating labanan ang tunay na kaaway –ang COVID-19.

Tinatayang 30,000 hanggang 60,000 manggagawang Pilipino ang nanganganib na mawalan ng trabaho dahil sa coronavirus disease 2019 (COVID-19) pandemic.

Ayon sa International Labor Organization (ILO), nakapaloob ito sa mula 5-milyon hanggang 25-milyong trabaho na posibleng mawala sa buong mundo dahil sa pagsasara ng maraming negosyo.

Batay sa pagtaya ng ILO, nasa $860-billion hanggang $3.4-trillion ang mawawalang kita ng mga manggagawa sa buong mundo ngayong 2020.