DWIZ 882

Tiniyak ni Health Sec. Francisco Duque III na siya nasa maayos na kalagayan ngayong naka sailalim ang kalihim sa home quarantine at habang naghihintay ng resulta sa COVID test.

Sa isang panayam kay Duque, sinabi nito na tuloy pa rin ang kaniyang trabaho habang naka quarantine.

Binabantayan lang niya umano ang kaniyang asthma at hypertension dahil ito aniya ay mga pre-disposing factors.

Sa ngayon umano ay wala naman siyang nararamdamang iba pang sintomas o sakit.

Isinailalim sa quarantine si Duque matapos umanong makasalamuha ang isang opisyal ng DOH na nagpositibo sa COVID-19.

Umapela ang Department of Interior and Local Government (DILG) sa mga Local Chief Executives na kumilos at ipakita ang kanilang husay sa pamumuno sa gitna ng enhanced community quarantine sa buong Luzon.

Ayon kay DILG Undersecretary Jonathan Malaya, ngayong may krisis na kinakaharap ang bansa makikita kung papaano magiging epektibo sa kani-kanilang posisyon ang mga lokal na opisyal.

Ani Malaya, layon ng enchanced community quarantine na panatilihin ang mga tao sa loob ng kani-kanilang bahay upang maiwasan ang pagkalat pa ng COVID-19.

Ngunit mayroon umano silang natatanggap na ulat na isang LGU ang namigay ng pagkain ngunit pinapila ang mga tao dahilan para hindi ma obserba ang social distancing.

Bumaba ang antas ng tubig sa Angat dam sa magdamag.

Batay sa huling pagtaya ng PAGASA hydro metrology division kaninang 6:00 ng umaga, nasa 199.38 ang lebel ng tubig sa Angat.

Mas mababa ito sa 199. 61 na naitalang antas ng tubig kahapon sa nasabing dam.

Samantala, nananatili naman ang lebel ng tubig sa Ipo dam sa 101.00 meters habang bahagyang nadagdagan naman ang antas ng tubig ng La Mesa dam sa 76. 89 meters.

Bahagya ring nadagdagan ang antas ng tubig sa Magat dam.

Asahang mararanasan ang mas mahabang araw ngayong buwan.

Ayon sa PAGASA, ito ay dahil sa tinatawag na vernal equinox o spring exquinox.

Sa vernal exquinox, mararanasan ng bansa ang magkaparehong haba ng araw at gabi dahil na rin sa mas magiging maaga ang bukang-liwayway.

Ito ay isa umanong phenomenon na nangyayari kada taon bilang hudyat na simula na ang spring season sa Northern hemisphere at autumn naman sa Southern hemisphere.

Asahan din umano na makakaranas ng matinding init ng panahon sa vernal exquinox.

Makakatanggap pa rin ng isang buong buwang sahod at 13th month pay ang mga empleyado ng Jollibee Foods Corporation.

Ito’y sa gitna ng umiiral na enhanced community quarantine sa buong Luzon dahil sa COVID-19.

Ayon sa pamunuan ng Jollibee, naglaan sila ng P1-B para mabayaran pa rin ang kanilang empleyado na apektado ng quarantine.

Sakop umano ng nasabing emergency response fund ang lahat ng empleyado mula sa mga opisina, stores, commissaries at logistics centers.

Kabilang din dito umano ang mga senior citizen at PWD na kanilang empleyado sa ilalim ng joint employment program katuwang ang LGU.

Nanawagan ng tulong ang motorcycle-ride hailing app na Angkas para sa kanilang mga drivers sa Metro Manila na apektado ng Luzon-wide community quarantine.

Sa isang tweet ng Angkas, sinabi nito na kulang pa rin ang kanilang ibinibigay na tulong para sa halos 23,000 nilang drivers na napigilang bumiyahe dahil sa pagsuspinde ng mga transport vehicle services dala ng banta ng COVID-19.

Dahil dito ay nanawagan ng cash o in-kind donations ang Angkas para sa cash donation, maaaring magpadala sa pamamagitan ng bank deposits o online transfer sa accounts ng DBDOYC Inc. Sa BDO na may account number na OOO 380 256 339.

Maaaring ding magdeposito sa Unionbank sa account number na 001 550 001 088 at ipadala lamang ang proof of donation sa email address na alaga@angkas.com.

Maaari din magbigay ng inkind donations gaya ng canned goods, bigas, mga gamot, tubig, alcohol, sabon, face masks at hand sanitizers na maaaring ipadala sa pamamagitan ng Angkas padala.