DWIZ 882

Nangako si Pasig City Mayor Vico Sotto na magbibigay ng tulong pinansyal sa mga tindero, jeepney at tricycle driver at iba pang residente na apektado ang kabuhayan ng enhanced community quarantine.

Ayon kay Sotto, mahirap ang sitwasyon ngayon ng maraming manggagawa lalo na ang mga hindi makapagtrabaho dahil sa community quarantine.

Ani Sotto, nauunawan naman ng marami na kailangan itong gawin upang maiwasan ang pagkalat ng sakit ngunit problema na aniya ito sa oras na magutom na ang kani-kanilang pamilya dahil sa kawalan ng kita.

Dahil dito, bukod umano sa mga food packs na ipapamahagi ay magkakaloob din ang Pasig City Government ng financial assistance bilang dagdag ayuda sa mga hindi makapagtinda at makapamasadang residente ng lungsod.

Isa na namang Pilipino ang nagpositibo sa coronavirus disease 2019 (COVID-19) sa Hong Kong.

Ayon sa Philippine Consulate General Office sa Hong Kong, kinumpirma ito ng Hong Kong health department na may isang Pinoy sa mga bagong kaso ng COVID-19.

Dahil dito, umakyat na sa tatlo ang kaso ng COVID-19 sa nasabing bansa.

Kasabay nito, tiniyak ng konsulada na handa silang umayuda sa anumang pangangailangan ng pasyente.

Humingi ng paumanhin ang Department of Transportation (DOTr) kaugnay sa social media post ng ahensya na isang tula na nagpapasalamat sa coronavirus disease 2019 (COVID-19).

pic.twitter.com/i8BMAk0DxB

— DOTrPH (@DOTrPH) March 23, 2020

Paliwanag ng DOTr, layon lamang ng naturang ‘thank you post’ ng ahensya na mabigyan ng positibong perspektibo ang publiko sa gitna ng nararanasang pagkalat ng sakit sa buong mundo.

Nauunawaan umano ng ahensya na hindi lahat ay sumasang-ayon sa naging hatid ng mensahe ng kanilang binuong tula ukol sa COVID-19.

Itinanggi ni Health Sec. Francisco Duque III na pinalitan si Research Institute for Tropical Medicine (RITM) Dir. Celia Carlos.

Ito’y matapos mapaulat ang umano’y VIP testing ng ilang pulitiko para sa COVID-19.

Nilinaw ni Duque na itinalaga si Assistant Secretary Ernesto Santiago bilang tagapamahala ng mga accredited testing facilities ng RITM at hindi para palitan si Carlos bilang director.

Ani Duque, nagkamali lang sa paglagay ng designation sa department order at inako naman ng kaniyang head executive assistant ang pagkakamaling iyon.

Dagdag pa ni Duque, inilagay niya si Santiago para makatulong ni Carlos dahil sa naging manipis na rin ang pwersa sa RITM.

Tinawag na ‘bayani’ ni Health Sec. Francisco Duque III ang tatlong doktor na nasawi matapos magpositibo sa coronavirus disease 2019 (COVID-19).

Ayon kay Duque, nasawi ang tatlong doktor sa pakikipaglaban sa sakit para makapagligtas ng maraming buhay.

Maituturing aniya ang mga ito na bayani dahil binuwis nila ang kanilang buhay para mapangalagaan ang kanilang kapwa mamamayan.

Kasabay nito, ipinaabot ni Duque ang kaniyang taos pusong pakikiramay sa mga naulila ng tatlong doktor.

Nagpaalala ang Commission on Human Rights (CHR) hinggil sa karapatan ng publiko sa kasagsagan ng umiiral na Luzon-wide community quarantine.

Ayon kay Jacqueline De Guia, tagapagsalita ng CHR, kailangang maging maalam ang publiko sa karapatan nito at maging alerto laban sa posibleng pang-aabuso sa gitna ng quarantine.

Sa kabila aniya ng mga paghihigpit na ipinatutupad ng gobyerno bilang bahagi ng enhanced community quarantine sa Luzon, kinakailangan pa rin aniyang maging sentro ang kapakanan at karapatan ng mga mamamayan.

Binigyang-diin din ni De Guia na dapat ay magkaroon ng pantay-pantay na suporta ang gobyerno hanggang sa pinakamahihirap na komunidad, at walang sinuman ang dapat aniyang mapag-iwanan sa paglaban sa COVID-19.

Makaaapekto sa malaking bahagi ng bansa ang umiiral na easterlies o warm winds na nanggagaling sa Dagat Pasipiko ngayong araw.

Dahil dito, ayon sa PAGASA, asahan na ang maalinsangang panahon ngayong maghapon sa bahagi ng Luzon.

Makararanas naman ng magandang lagay ng panahon ang mga lugar sa Ilocos Region, Cordillera Administrative Region at Cagayan Valley ngunit may maliit pa rin na tiyansa ng pag-ulan.

Asahan naman ang mainit na panahon sa Tuguegarao City kung saan posibleng umabot sa 36°C ang temperatura.

Sa Baguio City naman, inaasahang papalo mula 16°C hanggang sa 25°C ang temperatura.

Samantala, maalinsangang panahon din ang mararanasan sa Metro Manila at nalalabing bahagi ng Luzon lalo na sa tanghali, habang may posibilidad naman ng pag-ulan sa hapon at gabi.

Iikot naman sa 24°C hanggang 34°C ang temperatura sa Metro Manila.

Wala ring inaasahang anumang sama ng panahong papasok sa bansa sa susunod na dalawa hanggang tatlong araw.