Nakapagtala na rin ng isang nasawi dahil sa coronavirus disease 2019 (COVID-19) sa Taytay, Rizal.
Ayon sa Municipal Health Office ng Taytay, isang 80-anyos na lola ang nasawi mula sa Barangay San Juan.
Sa ngayon, mayroon nang tatlong kumpirmadong kaso ng COVID-19 ang Taytay kabilang na ang nasawi habang 13 naman ang persons under investigation (PUIs).
Pinaalalahanan ng Food and Drug Administration (FDA) ang publiko hinggil sa mga umano’y rapid test kit para sa coronavirus disease 2019 (COVID-19).
Ayon sa FDA, wala pang point-of-care test kit o rapid test kit para sa virus na aprubado ng ahensya.
Ang mga rapid test kit ay nagbibigay ng agarang resulta sa loob lamang ng ilang minuto.
Dagdag pa ng FDA, ang mga naunang listahan ng COVID-19 test kits na aprubado nila ay gumagamit ng real time polymerase chain reaction (RT PCR).
Nangangahulugan ito na kinakailangan pa ng PCR machine sa laboratoryo at mga tauhan na may sapat na kaalaman hinggil sa proseso ng paggamit nito.
Samantala, una nang sinabi ng Department of Health na tanging ang RITM lamang ang maaaring magproseso ng mga naturang test kits.
Kinakailangan nang mabigyan ng special powers ng Kongreso si Pangulong Rodrigo Duterte para malabanan ang coronavirus disease 2019 (COVID-19).
Ito ang paniniwala ni House Ways and Means Committee Chairman Joey Salceda upang mapalawig pa ang kakayahan ng pamahalaan para sa agarang pagtugon sa nararanasang public health emergency.
Ito rin aniya ang dahilan ng kanyang panawagan para sa isang virtual session sa Kamara noong nakaraang linggo.
Samantala, kumpiyansa naman si Salceda na makakukuha ng sapat na bilang ng miyembro ang Kamara upang magbalangkas ng batas na magbibigay ng emergency powers sa Pangulong Duterte.
Nanapanatili ng tennis teen sensation, Alex Eala ang kanyang puwesto bilang number 4 sa pinakahuling world ranking na inilabas ng International Tennis Federation.
Bago nakansela ang mga laro ay hawak na ni Eala ang naturang puwesto, tangan ang 1,718.75 points .
Pinakamalaking puntos na nakuha ni Eala ay nang magkampeon ito sa Girls’ Doubles sa grand slam event na 2020 Australian Open nuong Enero sa Melbourne.
Ang tatlong nauna kay Eala ay sina Victoria Jimenez Kasintseva ng Andorra sa unang puwesto, pangalawa si Diane Perry ng France at Daria Snigur ng Ukraine sa number 3
Abala rin ang New People’s Army (NPA) sa pakikipaglaban sa coronavirus disease 2019 (COVID -19).
Ayon kay Communist Party of the Philippines (CPP) Founding Chairman Jose Maria Sison, walang panahon ang npa para umatake sa mga puwersa ng pamahalaan na ngayon ay nasa unilateral ceasefire.
Gayunman, tiniyak ni Sison na handa ang npa na idepensa ang kanilang hanay sakaling magsagawa ng opensiba ang militar.
Una rito, inakusahan ni Presidential Adviser On The Peace Process Carlito Galvez ang NPA na nasa likod ng pagpatay kay Manobo Tribal Chieftain Datu Bernardino Austidillo at dating rebelde na si Zaldy Ibanez sa San Miguel, Surigao Del Sur.
Hinarass rin umano ng NPA ang patrol base ng Citizen Armed Force Geographical Unit (CAFGU) sa Guihulngan City sa Negros Oriental, isang araw matapos magdeklara ng unilateral ceasefire ang pamahalaan.
Nakumpiska ng Philippine National Police- Criminal Investigation and Detection Group (PNP-CIDG) ang mahigit sa P8-M halaga ng surgical masks na ibinebenta ng overpriced sa Pasay City.
Naaresto sa operasyon ng PNP-CIDG ang isang retired Chinese businessman at dalawang kasamahan nito.
Online selling ang modus ng grupo kung saan ang isang kahon na may 50 surgical masks ay ibinebenta ng P1,700 o P34.00 kada isa gayung P1,400 per box o P28.00 per piece ang aprubado ng Department Trade and Industry (DTI) .
Ang mga suspects ay mahaharap sa kasong paglabag sa Price Act at Consumer Act of the Philippines.
Napatunayan ng mga researchers sa University of California na nakapagpapababa ng blood pressure ang paglalakad.
Lumabas sa pag aaral na sa bawat 1,000 hakbang, ay bumababa ng .45 ang systolic blood pressure ng isang tao.
Ibig anilang sabihin, umaabot sa 2.25 points ang nababawas sa blood pressure ng isang tao na nakakagawa ng 10,000 hakbang sa isang araw.
Idinepensa ng Quezon City government ang pagpapauwi ng ilang ospital sa tatlong residente ng Quezon City na may sintomas ng coronavirus disease 2019 (COVID-19).
Ayon kay Doctor Rolando Cruz, hepe ng Epidemiology and Surveillance unit ng Quezon City, sinunod lamang ng mga ospital ang direktiba ng Department of Health (DOH).
Nakasaad anya sa memorandum 2020-0108 ng DOH na pauuwiin ang lahat ng mga mayroong mild symptoms lalo na ang mga bata pa para sa istriktong self- isolation at close monitoring ng health authorities.
Gayunman, bantay sarado na anya ngayon ng uniformed personnel ang bahay ng mga pinauwing may mild symptoms upang matiyak na isolated ang mga ito.
Gumagawa na rin anya ng paraan ang Quezon City government upang makahanap ng lugar kung saan pwedeng ilagay ang mga walang kapasidad na sumailalim sa self-quarantine dahil sa maliit na tahanan.
49 na ang kaso ng COVID-19 sa Quezon City kung saan tatlo rito ang namayapa na.
Posibleng umangkat ng mas maraming karne ng baboy ang pamahalaan ngayong taon dahil sa epekto ng african swine fever (ASF).
Batay ito sa inilabas na pagtaya at datos ng United States Department of Agriculture Foreign Agricultural Service.
Posible umanong umangkat ng 300,000 metriko tonelada ng karne ng baboy ang pilipinas ngayong taon.
55% itong mas mataas sa 240,000 metric tons nuong nakaraang taon.
Batay rin sa pagtaya ng USDA Foreign Agricultural Service mas mababa ng halos 9% ang produksyon ng baboy sa Pilipinas ngayong taon dahil sa ASF.
Kakasuhan ng Department of Interior and Local Government (DILG) ang mga barangay officials na di umanoy nagpapabayad ng quarantine pass sa mga residente ng barangay.
Ayon kay DILG Undersecretary Jonathan Malaya, maliban sa quarantine pass…nakatanggap rin sila ng report na sinisingil rin ng ilang barangay officials ang cargo deliveries na dumadaan sa kanilang checkpoints.
Bagamat ang quarantine pass anya ay sariling panuntunan ng mga LGU’s maituturing anyang pang aabuso kung pababayaran ito sa mga residente.
Samantala, paglabag anya sa direktiba ng pangulo na hindi dapat mabalam ang delivery of goods, kung sisingilin ang mga ito ng barangay officials.
Dalawa lamang anya ang pupuntahan ng mga umaabusong barangay officials, masuspindi o makulong.