DWIZ 882

Kinumpirma ng Malakanyang na kasama sa kahilingan nilang dagdag na kapangyarihan para sa Pangulong Rodrigo Duterte ang pag take over sa mga pribadong kumpanya kabilang ang telecommunication companies.

Gayunman, sinabi ni Executive Secretary Salvador Medialdea na tinanggal na nila ang salitang take over sa kanilang panukala matapos ng ginawa nilang konsultasyon sa mga mambabatas.

Ipinaliwanag ni Medialdea na standby power lamang sana ng pangulo ang pagtake over sa mga pribadong kumpanya kung sakaling tumindi pa ang krisis sa coronavirus disease 2019 (COVID-19) at wala nang ibang paraan kundi patakbuhin na ng gobyerno ang mga public utilities tulad ng mga hotels, public transportation,mga pribadong ospital at telecommunications companies.

Sinabi ni Medialdea na maaga lamang sana nila itong hinihingi sa Kongreso dahil hindi nila alam kung gaano kabilis maaaring mag convene ang kongreso sakaling dumating na sa punto na kailangan na ng drastic action mula sa gobyerno.

Nangangamba ang Medical City na tuluyang bumagsak ang kanilang health care system.

Ibinabala ito ni Medical City President At Chief Executive Officer Dr. Eugenio Ramos.

Sa isang statement, sinabi ni Ramos na lampas na sa kapasidad ng kanilang ospital ang bilang ng mga pasyente.

Mayroon anya silang 18 positive cases ng coronavirus disease 2019 (COVID-19) at 64 na persons under investigation (PUI).

Maliban pa ito sa 11 pasyente sa emergency deparment na nag hihintay na may mabakanteng kwarto at anim sa mechanical ventilators kung saan lima anya ang nasa kritikal na kundisyon.

Pinaka masaklap anya ay ang 137 nilang healthcare workers na naka-quarantine matapos magkaruon ng kontak sa isang COVID-19 positive.

Itinanggi House Speaker Allan Peter Cayetano na inihahanaynila ang kanilang mga sarili sa mga frontliners ng coronavirus disease 2019 (COVID-19).

Ayon kay Cayetano, malayo naman ang mga mambabatas sa frontliners na anyay araw araw sumusuong sa panganib na mahawa ng COVID-19.

Naging creative lamang anya sila sa kanilang panawagan sa mga mamamayan na manatili sa loob ng bahay.

Sinabi ni Cayetano na kaya nyang magkulong lang sa bahay pero hindi nya ito magagawa dahil may mga constituents siya na dapat nyang pangalagaan.

Inulan ng batikos sa social media si House Speaker Allan Peter Cayetano matapos na tila ikumpara nito sa mga frontliners ang mga mambabatas na dumalo sa special session ng Kongreso.

Bago kasi nagsimula ang special session ay nagpakuha muna ng litrato si Cayetano kasama sina Executive Secretary Salvador Medialdea at iba pang opisyal.

Hawak ni Cayetano at Medialdea ang manila paper kung saan nakasulat ang mga katagang “together with doctors and frontliners, we went to work for you, so please stay home for us”.

Ayon sa netizens, walang karapatan si Cayetano na ikumpara ang pagpasok nya sa trabaho ng isang araw lamang sa panganib na sinusuong ng araw araw na pagharap ng frontliners sa panganib na mahawa sa coronavirus disease 2019 (COVID-19).

Sumailalim sina Metropolitan Manila Development Authority (MMDA) Spokesperson Celine Pialago at General Manager Jojo Garcia sa self-quarantine matapos nitong direktang makasalamuha ang isang nagpositibo sa coronavirus disease 2019 (COVID-19).

Naunang sumailalim si Garcia sa self-quarantine, at kinalauna’y hinimok si Pialago dahil parehas itong dumalo sa isang pagpupulong kasama ng nagpositibo sa COVID-19.

Hinimok din ni Pialago ang iba na nakasalamuha ng pasyente na mag-self quarantine rin alinsunod sa protocol para mapigilan ang pagkalat pa ng virus.

Samantala, binigyang diin ni Pialago ang kahalagahan ng proper hygiene kontra COVID-19.

Sa panulat ni Ace Cruz.

Hindi kailangan ng accreditation mula Department of Health (DOH) ng mga health workers sa pagganap nito ng tungkulin sa kabila ng umiiral na Luzon-wide enhanced community quarantine dahil sa COVID-19.

Ayon kay Cabinet Secretary Karlo Nograles, medical license o ID na inisyu ng kani-kanilang mga kompanya lamang ang kailangang ipakita sa mga awtoridad.

Dagdag pa nito, ang ating mga health workers ay siyang tunay na bayani ng sambayanan at nagpapasalamat aniya ang pamahalaan sa kanilang sakripisyo’t serbisyo publiko.

Magugunitang, naglatag ng mga libreng shuttle service para hindi na mahirapan ang mga health workers na pupunta sa kani-kanilang trabaho sa kabila ng suspendidong mass transportation dahil sa umiiral ng quarantine sa Luzon.

Sa panulat ni Ace Cruz.

Pinabulaanan ng Department of Interior and Local Government (DILG) na walang ‘window hour’ na ipinatutupad sa gitna ng umiiral na Luzon-wide enhanced community quarantine.

Ayon kay Usec. Jonathan Malaya, tagapagsalita ng DILG, fake news aniya ang post na kumakalat online na may logo ng iba’t-ibang ahenysa ng gobyerno at nagsasaad sa ‘window hour’ na pinatutupad at ang oras nito.

Ang paglilinaw na ito ay bunsod ng patuloy ng paglabas ng mga residente sa kani-kanilang mga bahay kahit na bawal ito alinsunod sa quarantine.

Samantala, inabisuhan naman ng DILG ang pamunuan ng pambansang pulisya na huwag mang-aresto sa halip na himukin na lamang ang mga residente na manatili sa kani-kanilang mga tahanan. Lalo na kapag hindi mahalaga ang kanilang gagawin alinsunod sa inilabas na panuntunan ng pamahalaan.

Sa panulat ni Ace Cruz.

Ipinaalala ng Inter-Agency Task Force (IATF) on Emerging and Infectious Disease na libre ang quarantine pass.

Ito ang ginawang paglilinaw ng IATF matapos mapaulat na pinababayaran sa ilang lugar sa Luzon ang naturang ID.

Ayon kay IATF spokesman at Cabinet Sec. Karlo Alexi Nograles, hindi dapat pabayaran ang quarantine pass at abusuhin ng LGUs ang kalamidad na nararanasan ng bansa.

Giit ni Nograles, walang sinuman ang dapat magbayad o magbigay ng kahit anomang halaga kapalit ng nasabing passes.