DWIZ 882

Bago naman mag hating gabi ay inaprubahan na rin sa special session ng Senado sa botong 12-0  ang panukalang magdeklara ng national emergency at bigyan ng dagdag na kapangyarihan ang pangulo para tugunan ang coronavirus disease 2019 (COVID-19) outbreak.

Kabilang sa mga probisyon ng bersyon ng senado ang kapangyarihan ng Pangulo na i-reshuffle ang savings ng executive department sa ilalim ng 2020 budget.

Binibigyan ng kapangyarihan ang pangulo na mag allocate ng cash, investments, at mga hindi pa nagamit na subsidies sa government corporations para tugunan ang COVID-19emergencies.

Nais rin ng Senado na gamitin sa paglaban sa covid 19 ang hindi pa nagagamit na special purpose funds.

Ayon kay senador pia cayetano, tinatayang nasa dalawandaang bilyong piso ang magagamit sa loob ng dalawang buwan upang mabigyan ng mula  lima hanggang walong libong piso ang  may labing walong milyong pamilya upang maka agapay sa epekto ng krisis dahil sa COVID-19.

Aprubado na sa  House of Representatives ang panukalang bigyan ng karagdagang kapangyarihan ang Pangulong Rodrigo Duterte upang tugunan ang coronavirus disease 2019 (COVID-19) outbreak sa bansa.

Sa botong 284, syam ang kumontra at walang abstentions, inaprubahan sa special session ng Kongreso ang panukalang bayanihan to heal as one act para sa deklarasyon ng national emergency sa harap ng COVID-19 outbreak.

Sakaling maging batas, tatlong buwan lamang ang magiging epektibo ang emergency powers ng pangulo maliban na lamang kung palalawigin ito ng kongreso o maaari rin namang putulin ng mas maaga.

Kabilang sa maraming probisyon ng panukala ang kapangyarihan ng pangulo na gamitin sa ibang bagay ang mga nakalaang alokasyon sa 2020 national budget tulad ng pagbili ng mahahalagang medical supplies tulad ng personal protective equipment.

Binibigyan rin ang Pangulo ng kapangyarihang mapabilis ang covid testing sa mga persons under investigation, regulasyon ng public at private transport, regulasyon ng traffic sa lahat ng kalsada at tiyakin na sumusunod ang lahat ng LGU’s sa community quarantine standards.

Hinikayat ni Senador Francis Tolentino ang Professional Regulations Commission (PRC) na ibale wala na ang boards natitira pang dalawang araw para sa licensure examination ng mga doktor.

Marso 8 at 9; Marso 15 at 16 ang physician licensure examination subalit inabutan ng pagpapatupad ng Luzon-wide community quarantine ang huling dalawang araw.

Ayon kay Tolentino, hindi naman ordinaryo ang sitwasyon ngayon nasa giyera tayo kontra sa coronavirus disease 2019 (COVID-19).

Maaari na anyang i deploy ang mga bagong doktor bilang reinforcement sa harap ng pagkakasakit na rin ng maraming health workers.

Itinanggi ng Deparment of Health (DOH)  ang pagsibak kay Dr. Celia Carlos bilang Direktor ng  Research Institute for Tropical Medicine (RITM).

Ayon kay Health Secretary Francisco Duque, mananatiling direktor ng RITM si Carlos.

Reaksyon ito ni Duque matapos kumalat sa social media ang kanyang department order na nagtatalaga kay Health Asst. secretary Nestor Santiago bilang officer in charge ng RITM.

Ipinaliwanag ni Duque na nagkaruon lamang ng oversight ang kanyang assistant na naghanda ng department order.

Ang kanyang direktiba anya ay italaga si Santiago upang asistihan si Carlos sa pagpapalawak ng testing capabilities ng RITM sa coronavirus disease 2019 (COVID-19).

Una rito, sinasabing sinibak si Carlos dahil sa pagtanggi nito na bigyan ng prayoridad ang COVID testing ng mga VIP’s.

Naglalatag na ng one time cash transfer program ang pamahalaan bilang ayuda sa mga apektado ng Luzon-wide community quarantine.

Bagamat wala pang kumpirmasyon,  tig P3,000 di umano ang inihahanda ng Department of Social Welfare and Development (DSWD) para sa individual beneficiaries at P15,000 para sa small and medium enterprises.

Kabilang sa mga inaasahang makikinabang sa one time cash transfer ang mga senior citizens, persons with disabilities, mga buntis, solo parents, mga katutubo, ride sharing drivers at mga walang tahanang pamilya.

Naglunsad ng online consultation ang Lung Center of the Philippines (LCP) para sa lahat ng katanungan higgil sa coronavirus disease 2019 (COVID-19).

Tinawag na COVID askforce ang proyekto kung saan 200 volunteer doctors ang sasagot sa lahat ng katanungan hinggil sa COVID-19.

Sa pamamagitan ng COVID askforce, umaasa ang lung center na mababawasan ang mga magtutungo pa sa ospital para lamang sa konsultasyon.

Maaaring kumunsulta sa Facebook page ng COVID askforce, (facebook.com/covidaskforce).

Ang online consultation ay bukas mula lunes hanggang sabado, mula 8:00 a.m. ng umaga hanggang 11:00 a.m. ng umaga at 7:00 p.m. ng gabi hanggang 10:00 p.m. ng gabi.

Umapela sa Deparment of Health (DOH)  ang lokal na pamahalaan ng Marikina na bilisan ang proseso ng assessment sa kanilang molecular biology laboratory.

Ayonk ay Mayor Marcelino Teodoro, handang handa ang laboratoryo para mag operate at kulang na lamang ang go signal ng DOH.

Kumpleto na anya ang mga makina at nabisita na rin anya ito ng world health organization kasama ang mga tiga Research Institute for Tropical Medicine (RITM).

Binigyang diin ni Teodoro na hindi sila dapat itrato ng DOH na normal na aplikante ng license to operate dahil may umiiral na krisis.

Sa pamamagitan ng molecular lab mas mapapabilis na ang testing sa mga pinaghihinalaang may coronavirus disease 2019 (COVID-19).

Tiniyak ng Deparment Of Health (DOH) ang suporta sa molecular biology laboratory ng Marikina City.

Ayon kay Health Undersecretary Maria Rosario Vergeire, inaantay na lamang nila ang go signal mula sa kanilang assessment team bago payagan ang paggamit sa molecular lab ng Marikina.

Binigyang diin ni Vergeire na hindi kinokontra ng doh ang ganitong klase ng initiative ng local government units dahil malaking tulong ito sa kinakaharap na krisis ngayon na dala ng coronavirus disease 2019 (COVID-19).

Gayunman, kailangan lamang anya nila ng pag iingat at mailagay sa konteksto at proseso sa paggamit ng laboratoryo.