Nagpositibo sa coronavirus disease 2019 (COVID-19) ang dalawa pang Pilipino sa Hong Kong.
Ito ang kinumpirma ng Consulate General of the Philippines sa Hong Kong.
Dahil dito, umakyat na sa lima ang bilang ng Pinoy na nagpositibo sa sakit sa naturang bansa.
Kasabay nito, tiniyak ng konsulada ang pagtutok sa kondisyon ng mga pasyenteng Pinoy sa Hong Kong.
Pumalo na sa 501 ang kabuuang bilang ng kaso ng coronavirus disease 2019 (COVID-19) sa bansa.
Ito ang kinumpirma ni Health Undersecretary Maria Rosario Vergeire matapos maitala ang 39 na panibagong kaso.
Nananatili naman umano sa 33 ang bilang ng mga nasawi dahil sa sakit.
Nasa 19 naman umano ang bilang ng mga gumaling sa COVID-19.
Nagbabala ang environmental group na Ecowaste Coalition sa publiko laban sa mga hindi rehistradong rubbing alcohol at hand sanitizers product na naglalabasan sa merkado, maging sa mga online stores.
Ayon sa Ecowaste Coalition, kailangang maging alerto ang mga consumers sa pagbili ng mga alcohol at sanitizers sa gitna ng nararanasang public health crisis dala ng coronavirus disease 2019 (COVID-19).
Maaari anilang magbigay ng hindi sapat na seguridad ang mga hindi beripikadong produkto dahil sa kwestiyonable nitong bisa.
Maaari ding magbase sa abiso ng Food and Drug Administration hinggil sa listahan ng mga produktong hindi rehistrado ng ahensya.
Nakatakdang mamahagi ng libreng binhi at punla ng gulay ang city government ng Los Baños at Cabuyao sa Laguna sa kanilang mga residente.
Ayon kay Municipal Agriculturist Cheryll Laviña-Gonzales, isang regular na programa ng kanilang tanggapan ang naturang hakbang.
Kanila din aniyang pina-igting ang pamimigay ng mga ito upang makatulong sa pagtitiyak na magiging supisyente at may mapagkukunan ng pagkain ang kanilang mga residente sa mga susunod na araw.
Maaaring magpalista ang lahat ng mga residente ng Los Baños na nais makatanggap ng binhi o punla at ipadala lamang ang listahan sa Facebook page ng Municipal Agriculture Office.
Kabilang sa kanilang mga ipamamahagi ay binhi ng pechay, mustasa, okra, kamatis, patola, at sitaw.
Samantala, isang “Harvest on the Go” program naman ang inilunsad ng City Government ng Cabuyao kung saan, kanilang bibilhin ang mga ani ng local farmers sa kanilang lugar at ipamamahagi sa kanilang mga residente.
Isinailalim na sa extreme enhanced community quarantine ang buong lalawigan ng Pangasinan.
Ito ay makaraang makapagtala na ng apat na kumpirmadong kaso ng coronavirus disease 2019 (COVID-19) sa lugar, kung saan dalawa sa mga ito ay pumanaw na.
Sa ipinalabas na executive order ni Pangasinan Governor Amado Espino III, nakasaad na ang dalawang pasyenteng nasawi ay mula sa bayan ng Bayambang at Rosales habang ang nalalabing dalawa ay kapwa mula sa bayan ng Malasiqui.
Epektibo naman alas-8 kagabi, March 23, hanggang hatinggabi ng katapusan ng March (March 31), wala nang papayagang makapasok at makalabas sa naturang lalawigan.
Samantala, umiiral din ang enhanced community quarantine sa barangay Bayambang at Malasiqui –nangangahulugan ito na walang residente ang pupwedeng makalabas sa kanilang mga tahanan.
Pansamantala munang magsasara ang lahat ng stores ng coffee company na Starbucks sa buong bansa.
Ito ay gitna pa rin ng paglaganap ng coronavirus disease 2019 (COVID-19).
Sa anunsiyo ng Starbucks Philippines sa kanilang Facebook page, isasara na rin maging ang kanilang mga stores sa Visayas at Mindanao batay na rin sa guidelines ng mga lokal na otoridad.
Nananatili rin anila sa kanilang prayoridad ang kaligtasan at kalusugan ng kanilang mga empleyado at customers.
Magugunitang una nang nagsuspinde ng operasyon ang Starbucks sa kanilang mga stores sa Luzon makaraang ideklara ang Luzon-wide community quarantine, epektibo noong Marso 17.
Malungkot na inianunsyo ng Philippine Heart Association (PHA) ang pagpanaw ng isa sa kanilang tanyag na cardiologist na nakipagtunggali rin sa coronavirus disease 2019 (COVID-19).
Kabilang si Doctor Raul Diaz Jara, dating pangulo ng PHA at isa rin sa mga itinuturing na haligi ng Philippine Cardiology, sa mga frontliners na nakipaglaban sa paglaganap ng COVID-19.
Lubos naman ang pagdadalamhati ng PHA sa naturang pangyayari.
Ang pagkasawi ni Doctor Jara ay naganap ilang araw lamang matapos ang pagkasawi rin ng isang young cadiologist ng PHA.
Direktang nakipag-ugnayan sa Research Institute for Tropical Medicine (RITM) ang ilang ‘VIPs’ upang humiling na makapagpa-test para sa coronavirus disease 2019 (COVID-19).
Ito ang inamin ni Health Secretary Francisco Duque III sa kabila ng kakulangan ng testing kits para sa COVID-19 sa bansa.
Gayunman, depensa naman ni Duque, pasok ang mga naturang VIP sa guidelines ng Department of Health (DOH) sa kung sinu-sino ang mga kwalipikado upang magpa-test – gaya ng mga indibiduwal na may exposure sa COVID-19 patient at may travel history sa mga bansang nakapagtala na ng local transmission ng virus.
Dagdag pa ni Duque, posibleng magkaroon ng pagbabago sa testing criteria ng ahensya dahil sa karagdagang 100,000 testing kits mula sa China.
Samantala, nasa 34 na opisyal na gobyerno, na walang sintomas ng COVID-19, ang nag-demand umano sa RITM na gawing prayoridad para sa COVID-19 testing pati na ang kanilang pamilya.
Ginarantiyahan ng Deparment of Interior and Local Government (DILG) ang pagkilala sa karapatang pantao ng mamamayan sa harap ng umiiral na enhanced community quarantine.
Tiniyak ito ni DILG Undersecretary Jonathan Malaya sa harap ng pahayag ng isa pang undersecretary ng DILG na walang karapatang pantao ngayon dahil nasa ilalim tayo ng state of emergency.
Binigyang diin ni malaya na umiiral pa rin ang bill of rights dahil hindi naman martial law ang public health emergency at enhanced community quarantine sa Luzon.
Maaari na ring magpa-deliver ng pagkain sa Angkas.
Sa kanilang Twitter account, sinabi ng angkas na para ito sa kanilang bikers at sa publiko at hindi sila tatanggap ng komisyon.
Tiniyak rin ng angkas na ipatutupad angno touch policy sa pag-deliver ng pagkain.
Iiwan anila sa upuan ng motorsiklo ang produkto kung saan ito kukunin ng kliyente.