DWIZ 882

Asahan na magiging maulap na may kalat-kalat na mga pag-ulan, pagkulog at pagkidlat ang Luzon area maliban na lang sa bahagi ng Bicol region.

Maulap naman na may kalat-kalat na pag-ulan sa buong bahagi ng Visayas at Mindanao dahil sa patuloy na lumalapit ang Low Pressure Area (LPA) na posibleng tumama sa silangang bahagi ng Mindanao ngayong araw.

Habang magiging maaliwalas naman ang panahon na may pulu-pulong mga mahihinang pag-ulan sa natitirang bahagi ng Mindanao.

Agwat ng temperatura sa Metro Manila ay maglalaro sa 23 hanggang 31 degrees celsius habang sisikat naman ang haring araw mamayang 6:25 ng umaga at lulubog naman ito mamayang 5:51 ng hapon.— sa panulat ni Angelica Doctolero

Isa-isang sinagot ni Presidential aspirant at dating Sen. Ferdinand Bongbong Marcos Jr ang iba’t ibang tanong na may kinalaman sa kaniyang mga plano sakaling siya ang mahalal na susunod na Pangulo sa Halalan 2022.

Ito’y kasunod ng isinagawang exclusive round table interview ng ALC Media Group sa pangunguna ni ALC Chairman D. Edgard Cabangon sa Makati City nitong Lunes ng umaga (Enero a-24).

Kabilang sa kaniyang mga binigyang diin ay ang pagpabor sa prinsipyo ng No Vaccination, No Ride policy ng DOTr at paglilimita sa galaw ng mga hindi bakunado kontra COVID 19 dahil sa kailangang isipin ang kapakanan ng mas maraming Pilipino upang mapigilan ang pagkalat ng virus.

Sa isyu ng enerhiya, binigyang diin ni Marcos na kailangang pag-aralang maigi ang planong muling buhayin ang Bataan Nuclear powerplant subalit dapat ito’y nakasalig sa agham o siyensiya upang matugunan ang malalang problema ng bansa sa kuryente.

Sa isyu naman ng Freedom of Information, binigyang diin ni Marcos na kailangang matutunan ng lahat ang mga aral ng CORONA impeachment trial nuong 2012 kaya’t kung siya ang tatanungin, dapat isapubliko lang ang Statement of Assets, Liabilities and Networth o SAL-N kung may legal na batayan para gawin ito at hindi para gamitin sa pulitika.

Nanindigan din si Marcos sa muling pagbabalik ng Death Penalty subalit nilinaw niyang dapat itong maging huling baraha para sa mga kriminal na ayaw magbago kaya para sa kaniya ay hindi ito ang solusyon upang masawata ang krimen.

Pakatututukan din ni Marcos sakaling siya ang maupong Pangulo ang kapakanan ng mga Oversease Filipino Worker at lahat ng mga manggagawang Pilipino na mabigyan ng sapat na benepisyo tulad ng pabahay.. kaya kaniyang isinusulong ang pagbuhay muli sa BLISS o Bagong Lipunan Improvement of Sites and Services.

Sa sektor naman ng food security, sinabi ni Marcos na panahon na upang i-overhaul ang sektor ng Agrikultura upang makasabay sa epekto ng global warming kaya’t mainam aniyang tumutok sa pagpapayaman sa Mariculture o Marine Agriculture na siyang sinasabing bagong pag-asa sa sektor.

Sa usapin naman ng Foreign Policy, sinabi ni Marcos na dapat manatili ang Bilateral relations sa pagitan ng Pilipinas, Amerika at China subalit kailangang mas manaig ang interes ng bansa.

Pabor naman si Marcos na pauwiin na si CPP-NPA at NDF Founding Chairman Jose Maria Sison sa bansa matapos na mabinbin ang hirit niyang assylum sa the Netherlands pero kailangang harapin aniya nito ang lahat ng kasong isinampa laban sa kaniya.  - ulat mula kay Jaymark Dagala (Patrol 9) 

Ikinatuwa ng Philippine National Police o PNP ang ginawang pagpuri ng Commission on Human Rights o CHR sa naging pagtrato ng kanilang mga tauhan kay Lolo Nardo Floro.

Si Lolo Narding ang 80 anyos na pinagsilbihan ng Asingan Municipal Police Station ng Warrant of Arrest mula sa Korte dahil sa iligal na pag-ani nito ng humigit kumulang na 10 kilo ng mangga.

Ayon kay PNP Chief P/Gen. Dionardo Carlos, nagpasalamat sila sa CHR sa pagkilala nito sa mabuting ginawa ng mga Pulis na isailalim sa kanilang kostudiya sa halip na ikulong ang pobreng si Lolo Nardo.

Pinuri rin ni CHR Spokesperson Atty. Jackie De Guia ang ginawang pag-aambagan ng mga pulis upang maitustos sa piyansa ni Lolo Nardo na nagkakahalaga ng 6 na libong piso.

Gayunman, sinabi ni Carlos na labas na sa kanilang poder ang mungkahi ng CHR na idaan na lamang sa amicable settlement ang kaso ni Lolo Nardo dahil ito’y kasalukuyan nang dinirinig sa Korte. - ulat mula kay Jaymark Dagala (Patrol 9) 

Kakasuhan ang dalawa pang Returning Overseas Filipino Workers matapos lumabag sa quarantine protocol.

Ayon kay Bureau of Quarantine Deputy Director Doctor Robert Salvador, pinoproseso na nila ang kasong isasampa sa mga nasabing indibidwal dahil sa pamemeke ng quarantine certificate.

Samantala, bahagyang bumaba sa 250 nitong January 22 mula sa 400 noong Disyembre 2021 ang bilang ng nagpopositibo sa COVID-19 sa mahigit 3K Returning OFWs na dumadating sa bansa kada araw. - sa panulat ni Airiam Sancho 

Nadagdagan pa ang bilang ng mga naaaresto ng Philippine National Police o PNP dahil sa paglabag sa umiiral na gun ban para sa Halalan 2022.

Batay sa datos ng PNP ngayong Lunes, Enero a-24 ay nasa 343 na ang kabuuang bilang ng mga nahuling lumabag sa pinaiiiral na gun ban.

Ito’y matapos madagdagan ng 25 bagong nahuli ng Pulisya sa nakalipas na magdamag mula sa 3,688 na inilatag na checkpoint.

Sa nasabing bilang ay nasa 23 rito ang sibilyan at 2 naman ang Security Guard na nahulihan ng baril na labas sa kanilang duty.

Nakumpiska rito ang nasa 16 na mga armas habang nasa 52 naman ang mga nakumpiskang nakamamatay na bagay at mga balagumaling. - ulat mula kay Jaymark Dagala (Patrol 9)

Pumalo na sa 47,334 ang kabuuang bilang ng mga tinamaan ng COVID-19 sa hanay ng Philippine National Police (PNP) makaraang madagdagan ng 169 na bagong kaso ngayong araw.

Ayon sa PNP Health Service, mula sa nasabing bilang ay bumaba na lamang sa 3,016 ang aktibong kaso ng virus sa kanilang hanay.

Gayunman, nadagdagan pa ito ng 304 na bagong gumaling sa sakit kaya’t umakyat na sa 44,192 ang total recoveries habang nananatili naman sa 126 ang kanilang death toll.

Ayon kay PNP Chief P/Gen. Dionardo Carlos, karamihan sa mga tinamaan ng virus ay pawang asymptomatic o di kaya’y mild lamang ang sintomas kaya’t marami sa kanila ang mabilis na gumaling. - ulat mula kay Jaymark Dagala (Patrol 9)