Drew Nacino

Humiling ng Temporary Restraining Order sa Korte Suprema ang kampo ng pinatalsik na si Negros Oriental Governor Pryde Penry Peves.

Iginiit ni Atty. Sarah Abraham-Manalo, Legal Counsel ni Teves dapat magkaroon ng due process bago ang proklamasyon sa pagkapanalo bilang gobernador kay Roel Degamo at pagpapaalis sa pwesto kay Teves.

Magugunitang inihayag ng COMELEC na ang pinagbasehan ng proklamasyon kay Degamo ay ang mga nakaraang desisyon ng Supreme Court gaya ng Santos versus COMELEC.

Ito ang naghahalintulad sa nangyari sa kaso ng kalaban ni Teves sa pagka-gobernador na si Degamo.

Umaasa naman ang kampo ni Teves na mapapakinggan ng S.C. ang kanilang petisyon.

Nagulantang ang mga residente ng Baguio City sa flashfloods bunsod ng malakas na pag-ulan nitong weekend.

Trending sa social media ang City of Pines dahil kasabay ng thunderstorm ang pag-ulan naman ng yelo na naranasan ng ilang minuto.

Ayon sa City Public Order and Safety Division, nawasak ang tent at stall sa isang market showcase matapos makaranas ng flashfloods sa session road.

Inanod din ang mga paninda ng vendor sa nasabing lugar.

Ipinaliwanag ng pagasa na ang hail stone o yelo ay bumabagsak galing kasabay ng isang severe thunderstorm.

Makararanas ng water service interruption ang mga customer ng Maynilad simula ngayong araw hanggang Sabado, Oktubre a – 15.

Bunsod ito ng mga scheduled maintenance activities at mababang water elevation sa Ipo dam.

Simula alas-8 mamayang umaga hanggang ala-7 ng gabi ipatutupad ang service interruption sa mga lungsod ng Maynila, Caloocan, Quezon at Malabon.

Kabilang sa mga apektado sa Caloocan ang Barangay Balingasa, 12, 81 hanggang 164; Barangay 80, Concepcion, Dampalit, Potrero at Tugatog, Malabon;

Barangay 157 at 158 sa Quezon City; Barangays 1, 2, 25-33, 95-108 at 587-695 sa Maynila.

Iimbestigahan na ng Land Transportation Office (LTO) ang ulat na may mga bulok na sasakyan ang patuloy na inirerehistro.

Ito, ayon kay LTO chief Teofilo Guadiz, ay upang maparusahan ang mga nasa likod ng pagrerehistro sa mga kakarag-karag nang sasakyan na hindi na ligtas gamitin sa mga kalsada.

Nag-ugat ito sa isang viral video sa social media na isang lumang truck at pinaniniwalaang delikadong pumasada ang sinasabing nakapagparehistro pa sa LTO ngayong taon.

Bukod pa ito sa ilang pampasaherong jeep na naglagay ng iligal na terminal sa bangketa at nagbubuga ng maitim na usok.

Tiniyak naman ni Guadiz sa publiko na mananagot at mapapatalsik sa gobyerno ang mga opisyal na sangkot sa registration ng mga kina-kalawang at inaagiw ng sasakyan.

Hinatulan ng Sandiganbayan ng 128 taong pagkakakulong si dating shariff saydona mustapha, maguindanao mayor datu sajid islam ampatuan.

Napatunayan ng 1^st division ng Anti-Graft Court na si Ampatuan ay “Guilty Beyond Reasonable Doubt” sa four counts ng Graft at four counts ng Complex Crime of Malversation.

Dahil ito sa pamemeke ng dokumento at pinalabas na ginamit ang P79 million na pondo ng gobyerno upang ipambili ng food supplies, gaya ng sardinas, asukal at isda kahit wala naman talagang binili.

Bukod sa pagkakabilanggo, diskwalipikado na rin habambuhay si Ampatuan na tumakbo sa anumang posisyon sa pamahalaan at pinagbabayad din ng P79 million.

Kasalukuyang miyembro si Ampatuan ng Sangguniang Bayan ng Shariff Saydona Mustapha.

Samantala, inihayag naman ni Atty. Glenn Nuestro, Legal Counsel ng dating Alkalde na maghahain sila ng Motion for Reconsideration.

Tatalakayin na ng Comelec en banc ang posibleng pagsuspinde sa paghahain ng Certificates of Candidacy (COC) para sa Barangay at Sangguniang Kabataan Elections (BSKE).

Sa gitna ito ng inaabangang desisyon ni Pangulong Ferdinand “Bongbong” Marcos Jr., kung ipagpapaliban o hindi ang nasabing halalan.

Ayon kay Comelec chairman George Garcia, kung pipirmahan ni PBBM ang pagpapaliban ng 2022 BSKE, dapat ding isulong ng en banc ang suspensyon ng COC filing sa October 22 hanggang 29.

Gayunman, ipinunto ni Garcia na kailangang magpasya nang mas maaga ng en banc upang maiwasan ang mga problema, lalo’t inaabot ng dalawang linggo bago maging batas ang isang panukala at mailathala sa isang pahayagan.

Ipinaliwanag din ng poll body chief na kailangan ding maghanda ang Comelec nang mas maaga.

Una nang inihayag ni Executive secretary Lucas Bersamin na maaaring lagdaan ni Pangulong Marcos bilang batas ang mga panukala para sa pagpapaliban ng 2022 Barangay at SK polls.

Setyembre a – 27 nang ipasa ng Senado sa huling pagbasa ang Senate Bill 1306 na magpapaliban sa 2022 BSKE sa ikalawang Lunes ng disyembre 2023 habang inaprubahan din ng kamara ang bersyon nito noong Setyembre a – 20.

Pinagtibay ng Commission on Elections en banc ang desisyon ng first division nito na nagbasura sa Disqualification Case laban kay Pangulong Bongbong Marcos noong Abril.

Ibinasura sa ruling ang Partial Motion for Reconsideration na una nang kumuwestyon sa findings ng first division na nagpahintulot kay Marcos na tumakbo sa pagka-Pangulo noong May 2022 elections.

Ipinunto ng Comelec na walang basehan ang mga petitioner na ideklarang “insufficient” at labag sa batas ang mga rason ng first division.

Nilagdaan sa promulgasyon noong October 7 ang resolusyon nina Commissioners Socorro Inting, Marlon Casquejo, Aimee Ferolino at Rey Bulay.

Nag-inhibit naman sa proceedings si Comelec chairman George Garcia dahil dati nitong kliyente si PBBM.

Samantala, inihayag ni Comelec spokesman, Atty. John Rex Laudiangco na pinal na ang resolusyon ng en banc pero kung nais umapela ng mga petitioner ay maaaring magtungo ang mga ito sa Supreme Court at maghain ng Petition for Certiorari.

Kabilang sa mga naghain ng D.Q. case sina Margarita Salonga Salandanan, Crisanto Ducusin Palabay at Mario Flores Ben.

Posibleng sumampa sa 4,000 hanggang 8,000 ang Covid-19 cases sa katapusan ng Oktubre kung patuloy na bababa ang bilang ng mga tumatalima sa public health safeguards, gaya ng pagsusuot ng facemask.

Ayon kay DOH – Epidemiology Bureau Director Alethea de Guzman, ang projection ay base sa datos ng kanilang web application na FASSSTER.

Lumabas anya sa datos ng FASSSTER hanggang nitong kalagitnaan ng Setyembre ay asahan na ang patuloy at mabagal na downward trend ng cases.

Batay din sa scenario ay aabot ng 1,204 cases kada araw ang maitatala kada araw pagsapit ng katapusan ng buwan.

Gayunman, maaaring sumirit sa 4,055 hanggang 8,670 ang Covid cases sa nasabing panahon kung darami ang lalabag sa minimum public health standards.

Ikinukunsidera na ng Department of Transportation na gumamit ng Q.R. codes, A.T.M. at credit cards o cellphones bilang alternatibo sa beep cards o stored-value cards para sa cashless fare payments sa mga tren at iba pang public transportation.

Ito, ayon kay Transportation Undersecretary Timothy John Batan, ay bilang tugon sa global shortage ng microchips na ginagamit para sa mga nasabing card.

Maglulunsad anya sila ng Fare Collection National Standards nangangahulugan na maliban sa beep card ay maaari na ring magkaroon ng ibang payment technology sa mga tren, bus at mga jeepney, gaya ng QR code at ATM o credit card na pwedeng ipambayad sa pasahe.

Bukod pa ito sa ikakasang near field communication system para naman sa mga Smartwatch o mga cellphone na puwede na ring gamitin bilang payment mode sa transportasyon.

Nilinaw naman ni batan na maaari pa ring gamitin ng mga commuter ang kanilang beep cards.

Nailibing na ang tatlong Abu Sayyaf detainees na nagtangkang tumakas mula sa PNP-Custodial Center sa Kampo Crame.

Dinala ang mga labi nina Idang Susukan, Feliciano Sulayao Jr., at Ariel Cabintoy sa Blue Mosque and Cultural Center sa Maharlika Village, Taguig City upang ihimlay alinsunod sa tradisyon ng Islam.

Ayon sa National Commission on Muslim Filipinos (NCMF-NCR), pawang Balik Islam ang tatlong ASG member.

Una nang hiniling ni PNP chaplain, Pastoral Outreach Division chief, Col. Zainalabiden Ismael ang tulong ni NCMF-NCR Regional Director Adzhar Albani upang mailibing ang mga nasabing bilanggo sa Taguig.

Nahaharap ang tatlo sa patung-patong na kaso ng Murder, Kidnapping, Arson at Illegal Firearms Possession sa Mindanao, partikular sa Sulu at Zamboanga del Norte.

Sina Susukan at Cabintoy ang unang pinagbabaril matapos pagsasaksakin ang isang pulis na maghahatid ng almusal sa loob ng Custodial Center noong linggo napatay si Sulayao makaraang i-hostage si dating Senador Leila De Lima.