Drew Nacino

Nakapagtala ang Department of Health ng karagdagang 14,333 Covid-19 cases sa nakalipas na isang linggo.

Katumbas ito ng average 2,048 daily Covid cases simula Oktubre a – 3 hanggang a – 9 o 10% mababa kumpara noong huling linggo ng Setyembre.

Ayon sa DOH, sa mga bagong infections noong nakaraang linggo, lima o .04% ang severe at critical.

Hanggang noong linggo, Oktubre a – 9, 669 o 9.2% ng Covid-19 admissions ang severe at critical condition.

Samantala, additional 2,106 Covid cases din ang naitala ng kagawaran kahapon dahilan upang sumampa na sa 3,969,987 ang total caseload.

Karagdagang 33 deaths ang naitala kaya’t halos 63,300 na ang fatalities habang bahagyang umakyat sa mahigit 26,000 ang active cases at nasa 3,880,000 na ang recoveries.

Sa mga pinakabagong infections, karamihan o 837 ay mula sa Metro Manila.

Patay ang alkalde ng Marilao, Bulacan makaraang ma-aksidente sa Clark Freeport Zone, Pampanga, kahapon.

Minamaneho ni Mayor Ricky Silvestre ang kanyang SUV nang bumangga sa poste ng kuryente sa Prince Balagtas Avenue, dakong ala-5:30 ng hapon.

Itinakbo pa sa ospital si Silvestre pero binawian din ng buhay.

Kasalukuyang nasa ikalawang termino na si Silvestre bilang alkalde ng Marilao.

Inaasahan na ng World Health Organization (WHO) ang pagtaas ng mga bagong kaso dahil sa papalapit na taglamig sa Europe, North America at ilang bahagi ng Asya.

Ayon kay WHO Director-General Tedros Ghebreyesus, ilang bansa na sa Europa ang nag-uulat ng pagtaas ng mga kaso ng COVID-19 na humantong din sa mas maraming hospital admission.

Bagaman may sinusubaybayan pa rin na mahigit 300 sub-variants, ang Omicron pa rin anya ang nangungunang sanhi ng pagkalat ng sakit.

Samantala, hinimok naman ni Infectious Diseases Specialist, Dr. Rontgene Solante ang publiko na magpa-booster na dahil karamihan sa mga pasyente na na-ospital ay walang booster.

Bumababa na aniya ang immunity ng mga naturukan ng COVID-19 vaccine lalo sa mga nagpaturok sa nakalipas na anim na buwan kaya dapat na maging maingat at magsuot ng face mask.

Nakatakda nang i-convene mamaya ni Pangulong Bongbong Marcos ang unang Legislative-Executive Development Advisory Council (LEDAC) sa ilalim ng kanyang administrasyon.

Ito’y upang mapabilis ang pagsasabatas ng priority measures, kabilang ang mga panukalang batas na binanggit ng pangulo sa kanyang unang State of the Nation Address noong July 25.

Ayon sa Malakanyang, kabilang sa priority measures na inaasahang tatalakayin sa LEDAC ang National Government Rightsizing Program; Budget Modernization Bill;

Government Financial Institutions Unified Initiatives to Distressed Enterprises for Economic Recovery at Unified System of Separation, Retirement and Pension.

Kabilang naman sa economic bills na inaasahan ding tatalakayin ang E-Governance Act; National Land Use Act; Tax Package 3: Valuation Reform Bill; Passive Income and Financial Intermediary Taxation Act at Internet Transaction Act o E-Commerce Law.

Idinagdag pa ng palasyo na sa aspeto naman ng national security, pag-uusapin din sa LEDAC ang National Defense Act; Mandatory Reserve Officers’ Training Corps and National Service Training Program;

Pagtatatag ng Medical Reserve Corps, National Disease Prevention Management Authority, Virology Institute of the Philippines at Department of Water Resources;

Pagpapatupad ng enabling law para sa natural gas industry; amendments sa Republic Act 9136 o Electric Power Industry Reform Act (EPIRA) at amendments sa Build-Operate-Transfer Law maging ang posibleng amendments sa RA 11525 o COVID-19 Vaccination Program Act.

Dapat direktang tugunan ni Pangulong Bongbong Marcos ang mga issue sa food at energy inflation.

Ito ang panawagan ng Trade Union Congress of the Philippines (TUCP) sa unang 100 araw sa pwesto ni Pangulong Marcos.

Ayon kay TUCP Vice President Luis Corral, maituturing na “perfect storm” ang nagbabadya sa ekonomiya ng bansa, sa gitna nang kinakaharap na problema sa pagkain, tumataas na presyo ng enerhiya, maging ang unemployment at underemployment rates.

Dapat anyang mag-doble o triple-kayod ang pamahalaan at maglatag ng agarang mga solusyon sa lalong madaling panahon.

Kabilang sa mga tinukoy ng TUCP na dapat kumayod nang husto ang Department of Trade and Industry (DTI), National Economic Development Authority (NEDA) at Department of Finance (DOF).

Hinimok naman ni Corral ang mga nasabing ahensya na magbigay ng financial at technical assistance sa medium and small-scale enterprises, dahil 63% ng workforce ng bansa ay kabilang sa nabanggit na sektor.

Samantala, ipinanawagan din ng TUCP kay PBBM na magtalaga na ng “full-time secretary ng agriculture”.

Sinimulan na ng Commission on Human Rights (CHR) ang motu proprio investigation nito sa paghostage kay dating Senador Leila De Lima at pagkakapatay sa tatlong hostage taker na nagtangkang tumakas sa Camp Crame.

Ayon sa CHR, layunin ng imbestigasyon na matukoy ang katotohanan at sino ang mga dapat managot.

Nangangamba rin ang komisyon para sa kaligtasan ni De Lima, na nagsilbing chairperson nito noong 2008 hanggang 2010.

Naganap ang insidente kahapon habang naghahatid ng pagkain ang duty personnel na si Corporal Roger Agustin sa mga persons under police custody sa maximum security compound.

Pinagsasaksak si Agustin ng mga hostage-taker gamit ang improvised na kutsilyo subalit nakaligtas at sa gitna ng komosyon ay hinostage ng isa sa mga bilanggo si De Lima.

Gayunman, nakaligtas ang dating mambabatas habang napatay ng mga pulis ang tatlo na napag-alamang pawang miyembro ng teroristang grupong Abu Sayyaf.

Pinuri ng isang consumer group ang pakikipag-sanib pwersa ng Grab Philippines sa motorcycle taxi firm na Move-It dahil makatutulong umano ito upang maibsan ang hirap sa pagbiyahe ng mga commuter, lalo sa Metro Manila.

Ayon kay Professor Louie Montemar, Convenor ng Bantay Konsyumer, Kalsada, Kuryente (BK3), ang kasunduan sa pagitan ng Grab at Move It ay isang magandang balita para sa mga motorcycle taxi driver na nakadepende ang kabuhayan sa iba’t ibang ride-hailing apps.

Ang motorcycle taxis anya ay nasa proseso na ng pagsasaligal bilang isang uri ng public transportation at ang operasyon ng mga ito sa kasalukuyan ay isang pilot study pa lamang.

Naniniwala si Montemar na ang naturang kasunduan ay magreresulta sa pagkakaroon ng karagdagang 6,000 partner-riders mula sa tinatayang 1,000 Moveit riders sa ngayon.

Isa rin umano itong pagpapamalas ng tunay na malasakit sa taumbayan na araw-araw sumasakay sa mga pampublikong transportasyon.

Nasa ligtas nang kondisyon ang 74 anyos na tigawalis o street sweeper na sinagasaan ng SUV sa Barangay BF Homes, Parañaque City noong September 24.

Magugunitang dalawang beses nag-agaw-buhay si Doreen Bacus nang isugod sa ospital dahil sa tinamong pinsala sa dibdib at iba’t ibang bahagi ng katawan.

Bagaman naaresto ang suspek at Mitsubishi Pajero driver na si Raymond Zaparain, nakalaya ito matapos magpiyansa.

Kamakailan naman ay inoperahan ang biktimang senior citizen dahil sa natamo nitong pinsala sa ulo, natanggal na kaliwang tainga, natapyas na kanang pisngi at nabaling dalawang daliri sa kaliwang kamay.

Makaraan ang ilang araw ay nakarekober at tuluyan nang nailayo sa kapamahakan ang biktimang empleyado ng City Environment and Natural Resources Office.

Samantala, nagpaabot na rin ng tulong si Parañaque City Mayor Edwin Olivarez Kay Bacus.

Nangangailangan ng mas maraming English Language Teacher ang Taiwan.

Hinikayat ng Taipei Economic and Cultural Office ang mga Pinoy na lumahok sa Foreign English Teacher Program sa pamamagitan ni TECO Representative Peiyung Hsu.

Ayon kay Hsu, ngayong taon lamang ay 77 guro at 11 teaching assistants ang nakapasok sa programa mula sa 6K aplikante.

Bumuo na anya ang Ministry of Education ng Taiwan ng programang magpapaunlad ng english proficiency ng mga Taiwanese student.

Isang Filipino-American senior citizen sa Highland Park, California sa Amerika ang patay matapos hampasin sa ulo ng mga kabataan gamit ang electric scooter.

Kinilala ang biktimang si Steven Reyes, 69-anyos na humabol sa mga kabataang nagnakaw ng anim na pack ng beer sa kanyang pinagtatrabahuhang convenience store.

Ayon sa Los Angeles Police Department, matapos ang krimen ay agad tumakas ang apat na suspek habang naisugod pa sa ospital si Reyes kung saan ito binawian ng buhay.

Hawak na ng LAPD ang C.C.T.V. footage upang matukoy ang mga nasa likod ng krimen at nakikipagtulungan na rin ang mga testigo.

Nananawagan naman ng hustisya ang pamilya ni Reyes sa lalong madaling panahon.