Drew Nacino

Naglaan na ang Department of Labor and Employment-Central Luzon ng P476 million para sa emergency employment program sa rehiyon matapos ang pananalasa ng bagyong Karding.

Inihayag ni DOLE-Region 3 Regional Director Geraldine Panlilio na nasa apatnapu’t dalawanlibong manggagawa ang kasalukuyang nagtatrabaho nang hindi bababa sa sampung araw upang tumulong sa clearing operations at rehabilitation activities sa kanilang komunidad.

Partikular anya nilang inilunsad ang tulong panghanapbuhay sa ating disadvantaged/displaced workers o tupad para sa mga biktima ng bagyo.

Ang tupad ay isang institutionalized program na ipinapatupad lalo na sa panahon ng kalamidad, gaya ng bagyo at lindol.

Karagdagang 2,562 covid-19 cases ang naitala ng Department of Health kahapon kaya’t sumampa na sa halos apat na milyon o 3,961,349 ang total caseload.

Umakyat din sa 63,149 ang death toll matapos madagdagan ng 38 habang lumobo na sa 3,871,820 ang recoveries.

Bahagya namang tumaas sa 26,380 ang aktibong kaso kahapon kumpara sa 25,733 noong Miyerkules.

Samantala, sa mga pinaka-bagong kaso, pinakamarami rito 1,174 ay mula sa Metro Manila.

Ibinabala ni Vaccine Expert Panel Chief Dr. Nina Gloriani na posibleng magkaroon ng covid-19 breakthrough infections sa mga indibidwal na hindi pa natuturukan ng booster.

Ito’y dahil sa humihina nilang immunity at increased mobility habang papalapit ang christmas season.

Ayon kay Gloriani, nananatiling mabagal ang pagtuturok ng booster doses sa bansa, kung saan 25% lamang ng target population ang nabigyan.

Mahalaga anyang maintindihan ng publiko, lalo ng mga senior citizen at may mga sakit na ang booster ay nagpapataas muli ng proteksyon laban sa mga variant ng covid-19.

Batay sa national covid-19 vaccination dashboard ng DOH, umabot na sa 73.2 million individuals ang fully vaccinated na sa bansa.

Magsisimula na ngayong araw ang ultimatum ng Bureau of Immigration sa mahigit 48,000 foreign workers ng Philippine Offshore Gaming Operators (POGO) na kanselado ang visa.

Ayon kay BI Spokesperson Dana Sandoval, 59 na araw ang ibinigay nilang palugit sa mga foreign POGO worker, na karamiha’y Chinese, para umalis ng Pilipinas.

Tangi anyang mga foreign worker sa mga POGO company na may “revoked license” ang binigyan ng ultimatum.

Gayunman, binalaan ni Sandoval ang nga POGO company na tatangging pauwiin ang mga nasabing manggagawa.

Tataas ng hanggang 10% ang presyo ng imported goods sa gitna ng patuloy na paghina ng halaga ng piso kontra US Dollar.

Ibinabala ni Federation of Filipino Chinese Chambers of Commerce and Industry Incorporated Vice President Cecilio Pedro na sa oras na maubos ang inventories, asahan na ang mas mahal na imported products.

Ayon kay Pedro, pangulo at owner ng Lamoiyan Corporation, ang patuloy na pagtaas ng presyo ng mga imported na produkto ay isang malaking oportunidad para sa mga local goods manufacturer.

Panahon na anya upang tangkilikin ang mga lokal na produkto, pero dapat ayusin at pagandahin ng mga manufacturer ang kalidad ng kanilang mga produkto o pantayan ang kanilang imported counterparts.

Samantala, pinapurihan ng nasabing grupo ng mga negosyante ang public-private partnership program ng gobyerno na susi sa pagiging self-sufficient sa harap ng patuloy na pagmahal ng imported goods.