Karagdagang 2,097 na Covid-19 cases ang naitala ng Department of Health kahapon.
Dahil dito, sumampa na sa 3,967,861 ang total case load.
Nakapagtala rin ng karagdagang 34 deaths kaya’t lumobo na sa 63,264 ang fatality.
Nasa 26,357 naman ang aktibong kaso habang umakyat na sa 3,878,240 ang total recoveries.
Sa mga pinaka-bagong infections, 790 rito ay mula sa Metro Manila.
Hindi patas para sa mga bansang walang kakayahang mag-produce ng sariling langis ang pasya ng Organization of Petroleum Exporting Countries (OPEC) na bawasan ang kanilang oil production ng dalawang milyong bariles kada araw.
Ayon kay Senate President Migz Zubiri, tiyak na magdudulot na naman ito nang sunud-sunod na pagtaas ng presyo ng produktong petrolyo na susundan ng pagtaas ng presyo ng iba pang produkto.
Isa anya sa nakikita niyang solusyon ay ang pagkakaisa ng iba’t ibang bansa upang palakasin ang paggamit ng mga alternatibong source of energy upang mabawasan ang pagiging dependent sa oil products.
Inihalimbawa ng senador ang pagpapalakas at pagpapabilis ng pagpapasok sa pilipinas ng mga E-Vehicle kasabay ng pagdevelop ng mga alternative energy tulad ng solar at wind.
Kasabay din nito ang pagsasaayos ng mass transportation ng bansa tulad ng ipinangako ng Department of Transportation na 1,200 kilometer railway line sa Metro Manila patungong Central Luzon.
Nangangamba ang mambabatas na dahil sa desisyon ng opec ay patuloy na tataas ang inflation rate ng bansa. —sa ulat ni Cely Ortega-Bueno (Patrol 19)
Mag-iikot ang Energy Regulatory Commission (ERC) sa mga probinsya upang busisiin ang mga kontratang pinapasok ng mga electric cooperative sa mga power generation company.
Sa gitna ito nang pagtaas ng singil ng kuryente sa mga rehiyon, partikular sa Eastern Visayas at Cordillera na aabot sa 20 pesos per kilowatt hour ang singil.
Gayunman, aminado si ERC Chairperson Monalisa Dimalanta na hindi ura-urada ang solusyon sa taas-singil at puwede pang lumala ang sitwasyon.
Ipinaliwanag ni Dimalanta na hindi “fixed” ang presyo ng mga power supply contract ng mga electric cooperative at power generation companies sa mga probinsya kaya’t hindi napigilan ang rate hike.
Mayorya ng mga pilipino ang nagpahayag na ang pagkontrol sa inflation ang pangunahing national issue na dapat agad aksyunan ng Marcos administration.
Batay ito sa pinakabagong Pulse Asia survey na inilabas kahapon.
Sa September 17 hanggang 21 survey sa 1,200 adult respondents, 66% ng mga pinoy ang nagsabing dapat unahing aksyunan “agad” ng gobyerno ang patuloy na pagtaas ng presyo ng mga pangunahing bilihin.
Pangalawang nais ng mga pinoy na dapat agarang tutukan ng gobyerno ang pagtaas ng sahod ng mga manggagawa, 44%; pangatlo ang job creation, 35% habang 34% ang nais maibsan ang kahirapan.
Nitong Miyerkules lamang nang i-anunsyo ng Philippine Statistics Authority na lumobo ang September inflation rate sa 6.9%, na pinakamataas sa loob ng apat na taon.
Muling binuksan ng Philippine National Railways ang Calamba-Lucena line nito.
Isinagawa ito ilang oras matapos saksihan ni Pangulong Bongbong Marcos ang paglagda sa kontrata ng apat na north-south commuter railway projects.
Umarangkada ang unang biyahe ng rutang Calamba-Lucena ala sais y medya kagabi.
Ayon kay Transportation Secretary Jaime Bautista, hindi lang turismo ang mabibigyang kulay sa muling pag-arangkada ng Calamba-Lucena route.
Mas magiging mabilis at komportable rin anya ang biyahe ng mga galing at patungong Laguna at Quezon kasabay ng mabilis na pag-usad ng ekonomiya ng bansa.
Tuwing alas kwatro singkwenta ng umaga ang unang biyahe mula Lucena station habang ala sais y medya ng gabi ang last trip mula Calamba station.
Kinse pesos ang minimum fare mula Lucena hanggang san pablo habang bente pesos kung hanggang Calamba.
Patay ang isang lalaking construction worker matapos tunggain ang isang bote ng alak sa bayan ng Villanueva, Misamis Oriental.
Kinilala ni Villanueva Municipal Police Chief, Maj. Renz Marrion Serrano ang nasawing si Richie Elleso Dumalaon, bente nwebe anyos, residente ng Purok 4, Barangay Looc.
Pumayag ang biktima sa “laklak challenge” ng kanyang kaibigan na ubusin ang isang long-neck na alak sa loob lamang ng dalawampung segundo kapalit ang premyong P20,000.
Bagaman sinimot ni Dumalaon ang alak, isinugod naman ito sa ospital at namatay makalipas ang ilang oras.
Batay sa imbestigasyon, mayroon nang sakit sa puso ang biktima.
Kumasa umano sa hamon si Richie para may pampa-check-up sa kanyang ama at makaipon para sa kasal nito sa Disyembre.
Patuloy ang imbestigasyon ng pulisya kaugnay sa insidente.
Nagpaabot na ng pakikiramay ang Pilipinas sa Thailand matapos ang mass shooting incident na ikinasawi ng halos apatnapung katao.
Ayon kay Philippine Ambassador to Thailand Millicent Cruz-Paredes, nakikiisa ang Pilipinas sa pagdadalamhati ng mga mamamayan ng Thailand matapos ang madugong trahedya.
Nakikiramay din anya sila sa pamilya ng mga biktima at umaasang hindi na lumala ang sitwasyon.
Nanawagan naman si Paredes sa mga kapwa pinoy sa thailand na makipag-ugnayan sa embahada kung mayroong impormasyon hinggil sa insidente.
Inaalam na ng pulisya kung ano ang nag-udyok sa suspek na si Panya Khamrab na isagawa ang isa sa pinaka-madugong mass shooting incident sa Thailand.
Nananatiling ligtas ang mga pinoy sa Thailand matapos ang mass shooting incident kung saan tatlumpu’t walo ang patay.
Kinumpirma ni Philippine Ambassador to Thailand Millicent Cruz-Paredes na wala silang natanggap na mga ulat na may mga pinoy na nadamay sa pamamaril sa Nong Bua Lam Phu Province.
Patuloy anya nilang mino-monitor ang sitwasyon at naghihintay ng karagdagang impormasyon mula sa royal thai police.
Batay sa imbestigasyon, dalawampu’t dalawa sa mga patay ay bata matapos salakayin ng suspek na si Panya Khamrab, ang isang daycare center gamit ang shotgun, handgun at kutsilyo.
Matapos ang pamamaril sa daycare center, pinaslang din ng suspek ang kanyang mag-ina tsaka nagpakamatay.
Napag-alamang dating pulis si Khamrab na sinibak sa serbisyo dahil sa kasong may kaugnayan sa illegal drugs noong isang taon.
Naglaan na ang Department of Labor and Employment-Central Luzon ng P476 million para sa emergency employment program sa rehiyon matapos ang pananalasa ng bagyong Karding.
Inihayag ni DOLE-Region 3 Regional Director Geraldine Panlilio na nasa apatnapu’t dalawanlibong manggagawa ang kasalukuyang nagtatrabaho nang hindi bababa sa sampung araw upang tumulong sa clearing operations at rehabilitation activities sa kanilang komunidad.
Partikular anya nilang inilunsad ang tulong panghanapbuhay sa ating disadvantaged/displaced workers o tupad para sa mga biktima ng bagyo.
Ang tupad ay isang institutionalized program na ipinapatupad lalo na sa panahon ng kalamidad, gaya ng bagyo at lindol.
Karagdagang 2,562 covid-19 cases ang naitala ng Department of Health kahapon kaya’t sumampa na sa halos apat na milyon o 3,961,349 ang total caseload.
Umakyat din sa 63,149 ang death toll matapos madagdagan ng 38 habang lumobo na sa 3,871,820 ang recoveries.
Bahagya namang tumaas sa 26,380 ang aktibong kaso kahapon kumpara sa 25,733 noong Miyerkules.
Samantala, sa mga pinaka-bagong kaso, pinakamarami rito 1,174 ay mula sa Metro Manila.