Drew Nacino

Ikinukunsidera na ng Department of Transportation (DOTR) na isapribado ang operasyon ng Edsa Bus Carousel, sa harap ng inaasahang pagtatapos ng Libreng Sakay Program sa December 31 ngayong taon.

Plano ng DOTR na ilapit muna ito sa public-private partnership center upang lubusang mapag-aralan.

Ayon kay DOTR Undersecretary Mark Steven Pastor, maaaring magkaroon ng feasibility study na magiging basehan ng gobyerno upang magkaroon ng improvement sa Edsa Busay.

Nasa 30 grupo, kabilang ang Management Association of the Philippines (MAP), ang nananawagan na isapribado ang operasyon ng Bus Carousel pero kaakibat nito ang singilan ng pasahe.

Gayunman, nilinaw ni MAP Transportation and Infrastructure Chairperson Eduardo Yap na dapat kapantay lamang o mas mababa sa MRT at LRT ang pamasahe sa busway.

Bukas din ang Philippine Chamber of Commerce and Industry sa ideyang privatization subalit dapat anilang ayusin muna ang ilang sistema sa busway at tiyaking hindi ito magiging dagdag-pahirap sa mga commuter.

 Inaprubahan na ng Senate Committee on Finance ang panukalang budget ng Office of the President (OOP) na 8.9 billion pesos maging ang panukalang budget ng Office of the Presidential Management Staff na 863.7 million pesos.

 Sa budget hearing kahapon, dinepensahan din ni Executive Secretary Lucas Bersamin ang confidential at intelligence funds na nakapaloob sa budget ng OP na anya’y ginaya lang ng ehekutibo sa nakaraang administrasyon.

 Ito ang ikinatwiran ni Bersamin makaraang may kumuwestyon sa 4.5 billion pesos na panukalang confidential at intelligence funds ng tanggapan ng pangulo para sa taong 2023.

 Kailangan din anya ng OP na maging flexible sa budget upang makatugon sa mga pangangailangan at requirement para sa international at domestic security.

 Tugon ito ng palace official sa tanong ni Senate Minority Leader Koko Pimentel kung bakit kailangan ng pangulo ng ganito kalaking confidential at intelligence funds gayong ang layunin ng marcos administration ay mga programa para ibangon ang ekonomiya.

 Partikular na tinukoy ni Pimentel ang medium-term fiscal framework ng administrasyon hinggil sa mga programa para sa pagbangon ng bansa mula 2022 hanggang 2028.

 Sa patakaran ng Commission on Audit (COA), ang Intel fund ay para sa pagkalap ng intelligence information na kailangan para sa national security habang ang confidential funds ay para sa surveillance activities sa civilian agencies upang suportahan ang kanilang mandato o operasyon. –  sa ulat ni Cely Ortega-Bueno (Patrol 19)

Naniniwala si Senator Nancy Binay na isang uncontrolled virus ang fake news.

Ayon kay Binay, kung walang magsasalita upang itama ang mga maling impormasyong natatanggap ng publiko ay tiyak na mananaig ang kasinungalingan.

Ngayong hindi na nasusuri at nabeberipika ang mga lumalabas na impormasyon, marami na anyang naniniwala sa tsismis at maling istorya.

Gayunman, naniniwala ang senador na hindi kailangang magpasa pa ng batas laban sa fake news.

Ito’y dahil ginagarantiyahan sa konstitusyon ang free speech kaya’t kabalintunaan kung i-re-regulate o lilimitahan ang pagsasalita sa rasong magkakaiba lamang ng opinyon o pananaw ang bawat isa.

Idinagdag pa ng mambabatas na ang kailangan ay mga tao at non-government watchdogs na kayang pabulaanan sa publiko ang mga fake news. –Mula sa ulat ni Cely Ortega-Bueno (Patrol 19)

Pina-plantsa na ng Department of Information and Communications Technology (DICT) ang isyu na naka-aapekto sa vaccine certificate system ng bansa na vaxcertph.

Tiniyak ni DICT Secretary Ivan John Uy na nakikipag-ugnayan na sila sa Department of Health na katuwang nila sa paglalabas ng vaccination certificates sa covid-19.

Orihinal na nakaatang sa DICT ang pagtutok sa naturang sistema pero nakatakdang ipasa sa DOH ang operation at maintenance nito.

Gayunman, inabisuhan ni DOH officer-in-charge Maria Rosario Vergeire ang DICT na hindi pa handa ang mga kawani ng kagawaran ng kalusugan na patakbuhin ito.

Dahil dito, hiniling ni Vergeire sa DICT na ipagpatuloy muna nito ang pagpapatakbo sa programa hanggang sa makapaghanda na ang Department of Health.

45 pasahero na sa Luzon ang stranded dahil sa bagyong Maymay.

Ayon sa Philippine Coast Guard, labing-pitong rolling cargoes, anim na vessels at sampung motorbancas ang hindi rin nakabiyahe.

Kabilang sa mga apektado ang Real Port, Burdeos Port, Dinahican Port at Polillo Port sa lalawigan ng Quezon.

Inabisuhan naman ng PCG ang mga mangingisda na iwasan nang pumalaot upang makaiwas sa anumang disgrasya.

Karagdagang 1,623 covid-19 cases ang naitala ng Department of Health kahapon dahilan upang lumobo pa sa 3,973,091 ang total caseload.

Kabilang sa nadagdag ang 34 deaths kaya’t sumampa na sa 63,363 ang fatalities habang 3,885,445 na ang recoveries.

Bumaba naman sa 24,283 ang aktibong kaso, ang pinaka-mababa simula noong September 14.

Sa mga bagong infection, 581 ay mula sa National Capital Region, na nangunguna pa ring rehiyon sa may pinaka-maraming kaso sa nakalipas na dalawang linggo.

Muling itinaas ng Phivolcs ang alert level 1 sa bulkang Bulusan sa Sorsogon dahil sa “low-level unrest.”

Batay sa bulletin ng Phivolcs kahapon, nakapagtala na ng isandaan dalawampu’t anim na mahina at mababaw na volcanic earthquakes simula noong martes, Oktubre a – onse.

Karamihan sa mga pagyanig ay naganap sa northwestern sector at summit area ng bulkan.

Bukod sa mga volcanic earthquakes, na-monitor din ang ilan pang parameters, indikasyon na mayroong increased hydrothermal activity at “overall unrest”.

Napaulat din ang masangsang na amoy sa sitio talistison, barangay mapaso sa irosin at barangay San Roque sa bayan ng Bulusan.

Inabisuhan naman ng Phivolcs ang lokal na pamahalaan na pagbawalan ang publiko na pumasok sa idineklarang four-kilometer radius permanent danger zone.

Itinanggi ng Chinese embassy sa inilagay ng China ang Pilipinas sa blacklist nito para sa turismo dahil sa issue ng Philippine Offshore Gaming Operators (POGO).

Nilinaw ng embahada na “misinformation” lamang ang ulat na “tourist blacklist” taliwas sa naunang pahayag ni Senate President Migs Zubiri matapos ang pag-uusap nila ni Ambassador Huang Xilian.

Aminado naman si Zubiri na maaaring nagkaroon lamang ng hindi pagkaka-unawaan o “lost in translation”.

Marahil ang nais anyang iparating ng embahador ay “posibleng ilagay ang Pilipinas sa blacklisted country” na nag-e-engganyo sa mga Tsino na magsugal.

Magugunitang nagpulong sina Zubiri kasama sina Senate Ways and Means Committee chairman Sherwin Gatchalian at Senador Robin Padilla kasama si Huang kamakailan.

Bagaman tinalakay ng mga Senador at Embahador ang issue ng POGO, hindi na idinetalye pa ang ibang napag-usapan.

Hindi pa nakatungtong sa 50% ng mga batang edad 5 hanggang 11 ang nababakunahan kontra Covid-19.

Inihayag ni DOH-OIC, Undersecretary Maria Rosario Vergeire na nasa 46% accomplishment para sa nasabing age group.

Sa datos ng DOH kahapon, nasa 5.1 million na bata na kabilang sa naturang age group ang nabakunahan noong Lunes, October 10.

Isa sa mga itinurong dahilan ni Vergeire ang pag-aatubili ng mga magulang na mapabakunahan ang kanilang mga anak.

Dahil dito, hinikayat ng DOH official ang mga magulang na pabakunahan na ang mga bata lalo’t magsisimula na ang “full implementation” ng “face-to-face classes” sa Nobyembre a – 2.

Pinili ni Negros Oriental Governor Henry Pryde Tevez na magpaubaya na sa Department of Interior and Local Government upang maiwasan ang pagka-antala ng paghahatid ng serbisyo sa publiko at pagkakaroon ng mga hindi kanais-nais na kaganapan sa kanilang lalawigan.

Ito’y matapos na hindi agad maglabas ang Korte Suprema ng Temporary Restraining Order laban sa desisyon ng Commission on Elections na nagpapawalang bisa sa pagkapanalo ni Teves sa Gubernatorial race noong May 9 elections.

Ayon sa Gobernador, hindi niya nais masakripisyo ang mga empleyado at serbisyo ng pamahalaan sa mga taga-Negros Oriental.

Naniniwala si Teves na kung hindi siya magpaparaya, kahit na siya ang duly elected na gobernador ng lalawigan ay maaaring magdulot ito ng karagdagang tensyon o pagka-paralisa ng government service sa buong lalawigan.

Sa ginanap na deliberasyon sa Supreme Court, hindi sila naglabas ng TRO, sa halip ay pinagkomento ang magkabilang panig sa loob ng maximum na 15 days bago mag-desisyon sa hirit na tro.

Gayunman, inihayag ni Atty. Ferdinand Topacio, abogado ni Teves, ligal na manatili sa pwesto ang kanyang kliyente dahil wala namang denial sa TRO petition.

Naniniwala si Topacio na dapat ay manatili sa posisyon ang kanyang kliyente habang wala pang final ruling ang s.c. sa kaso.

Labis rin ang pagkabigla ni Topacio sa ginawa ni Teves, dahil nagpupulong pa anya sila ng mga abogado nang biglaan itong magdesisyon na magparaya.