Drew Nacino

Nanawagan si Senate Minority Leader Koko Pimentel sa media na itigil ang pagbanggit sa kanya o sa apelyidong Pimentel sa mga balita na may kaugnayan sa pagkaka-aresto sa kanyang dating asawa na si Jewel Lobaton.

Ayon kay Pimentel, matagal nang deklaradong null and void ng korte maging ng simbahan ang kanilang kasal kaya’t wala ng karapatan si Lobaton na gamitin ang apelyidong Pimentel.

Batay sa report, inaresto ang dating beauty queen sa Laoag City, ilocos norte dahil sa kasong Estafa.

Sa ngayon ay ilang taon ng kasal si Senador Pimentel sa kanyang misis na si Kathryna Yu. —sa ulat ni Cely Ortega-Bueno (Patrol 19)

Dapat obligahin ang mga kontratista ng public works projects na kumuha ng liability insurance at pagbawalan na mag-subcontract.

Ito ang iginiit ni Senator Raffy Tulfo sa pagdinig ng senado sa panukalang budget ng Department of Public Works and Highways (DPWH) para sa susunod na taon.

Ipinaliwanag ni Tulfo kapag may nadidisgrasya sa mga ginagawang kalsada, hirap na hirap na kumuha ng danyos ang mga biktima dahil dumaraan pa sa barangay, mayor at DPWH at sa huli, kakarampot ang nakukuha kung mayroon man.

Inihalimbawa pa ng senador ang isang motorista na namatay sa isang construction project pero inalok lang ng 20,000 pesos na napakaliit na halaga.

Dapat na ring matigil ayon sa mambabatas ang gawain ng malalaki at lisensyadong kontratista na matapos manalo sa bidding, kumukuha na ng sub-contractor na kumukuha pa rin ng ibang sub-contractor.

Dahil dito nagiging fixer lang anya ang mga lisensyadong kontratista kaya’t nangungumisyon na lang sila at maliit na lamang na pera ang naiiwan para sa proyekto na nagreresulta sa kalsadang manipis at mabilis masira.

Bagaman sinang-ayunan ni DPWH Secretary Manuel Bonoan si Tulfo sa pagbabawal sa sub-contracting, aminado ang kalihim na kailangan munang amyendahan ang Government Procurement Act na nagpapahintulot dito. —sa ulat ni Cely Ortega-Bueno (Patrol 19)

Pinaiimbestigahan ni Senator Robin Padilla sa Department of Public Works and Highways (DPWH) ang konstruksyon ng mga eskwelahan na madaling nasisira dahil sa posibleng sub-standard ang materyales.

Sa budget hearing, nagpakita si Padilla ng mga litrato ng isang eskwelahan sa Gapan City, Nueva Ecija na bumagsak ang bubong at nawasak ang covered court dahil sa Bagyong Karding noong Setyembre.

Ayon kay Padilla, nakapagtataka na wasak na wasak ang paaralan gayong nakatayo at hindi nasira ng bagyo ang mga bahay na katabi.

Bilang tugon inihayag ni DPWH Secretary Manuel Bonoan na talagang dapat itong imbestigahan dahil may quality standard ang kagawaran sa konstruksyon ng mga eskwelahan na dapat ay matibay sa paghagupit ng bagyo at iba pang kalamidad.

Iginiit naman Senator Cynthia Villar na dapat alamin kung sino ang gumawa ng nawasak na eskwelahan dahil bukod sa DPWH, nagpapagawa rin ng paaralan ang mga lokal na pamahalaan.

Sa pagdinig, inungkat din ni Padilla ang ibinunyag sa senado ni Ombudsman Samuel Martires na sa mga nakalipas na taon ay may mga kalsada na ginawa gamit ang substandard materials.

Gayunman, nilinaw ni Bonoan na maaaring nangyari ito noon pa pero sa mga nagdaang administrasyon ay natutukan na ito at sa katunayan, lahat ng proyekto ay maryoong quality assurance inspection ng DPWH. —sa ulat ni Cely Ortega-Bueno (Patrol 19)

Karagdagang 10 bilyong piso ang kailangan ng Commission on Elections para sa ipinagpalibang Barangay at Sangguniang Kabataan Elections sa pag-arangkada nito sa Oktubre 2023.

Ayon kay COMELEC Chairman George Garcia, kabuuang 17.5 billion pesos para magdaos ng halalan sa susunod na taon mula sa orihinal na schedule na December 2022.

May budget anya na 8.5 billion pesos ang poll body para sa botohan, kung saan 1 billion pesos na ang ginastos.

Gagastos din ng 5.7 billion pesos para sa honoraria ng mga guro na magsisilbing poll supervisor.

Aabot naman sa 900 million pesos ang ilalaan sa pag-imprenta ng karagdagang mga balota dahil inaasahang mas maraming botante ang magpapatala para sa voter registration sa huling bahagi ng Nobyembre.

Bukod pa ito sa 300 million pesos na ilalaan sa pagsasanay ng mga manggagawa sa halalan, kabilang ang pagkain, allowance sa transportasyon, renta sa mga venue at bayad ng COMELEC sa militar, pulis at coast guard sa pagbibigay ng mga tauhan.

Isang mangingisda ang patay habang isa pa ang nawawala sa pananalasa ng bagyong Maymay sa lalawigan ng Cagayan.

 Kinilala ang nasawi na si Marshall Bautista, 52 anyos na narekober sa Bayan ng Buguey habang nawawala ang isa pang mangingisdang si Richard Mangarubang, 47 anyos, residente ng Sta. Ana.

 Ayon kay Provincial Disaster Risk Reduction and Management Office (PDRRMO) Chief Rueli Rapsing, nasa 14,000 residente naman ang apektado ng pagbaha bunsod ng malakas na pag-ulan dala ng bagyo.

 Karamihan anya sa mga apektado ay nakatira sa mga mababang lugar at tabing-dagat sa Northeastern portion ng lalawigan, partikular sa mga bayan ng Pamplona, Lal-Lo at Camalaniugan.

Mahigit 800,000 passport appointment slots na ang binuksan ng Department of Foreign Affairs (DFA) upang mapabilis at maging konbinyente ang passport application at renewal.

 Tiniyak ni DFA Secretary Enrique Manalo na ikinakasa na rin nila ang pagbubukas ng halos 300,000 pang online appointment slots bago magtapos ang taon.

 Inihayag naman ni DFA Assistant Secretary for Consular Affairs Henry Bensurto Jr. na magkakaroon na ng mas maraming “choice” ang publiko pagdating sa schedule at application site para na rin maiwasan ang fixers.

 Magiging accessible na rin para sa lahat ang mga pasilidad ng DFA Consular Affairs sa Aseana, Parañaque matapos pangunahan ni manalo ang pagbubukas ng mga bagong lagay at repair na elevators at escalators.

 Mas komportableng serbisyo na anya ang aasahan ng mga kliyente, lalo ng mga senior citizen, persons with disabilities at mga buntis sa pagbubukas ng mga bagong pasilidad.

 Kasabay nito, siniguro rin ng kalihim ang mas maayos na paglilingkod ng kagawaran dahil sa mga ipinatupad na pagbabago, tulad ng online appointment system upang mapabilis ang passport at authentication application.

Hindi pa nakapag-pasya ang Malakanyang kung ipagbabawal na o papayagan pa ang patuloy na operasyon sa bansa ng Philippine Offshore Gaming Operators (POGO).

 Ito ang kinumpirma ni Executive Secretary Lucas Bersamin sa pagdinig ng senado sa panukalang budget ng Office of the President (OP) para sa susunod na taon.

 Ayon kay Bersamin, pinag-uusapan na sa palasyo ang issue sa pogo pero hihintayin nila na matapos ang imbestigasyon ng senado.

 Iginagalang anya ng ehekutibo ang isinasagawang imbestigasyon ng mataas na kapulungan ng kongreso.

 Sa oras naman na matapos ang pagdinig at nagkaroon na ng findings ay tiniyak ni Bersamin na maaari silang makipagtulungan sa pagtugon at pagdedesisyon sa issue ng POGO.  – sa ulat ni Cely Ortega-Bueno

 Kinansela na ng gobyerno ang mga visa ng mahigit 1,400 dayuhang nagtatrabaho sa mga iligal na Philippine Offshore Gaming Operators (POGO).

 Kinumpirma ni Department of Justice (DOJ) Spokesman Mico Clavano na 370 sa mga dayuhang may cancelled visas ang inaasahang ipade-deport na sa China sa loob ng dalawang linggo.

 Ayon kay Clavano, ang mahigit 1,400 dayuhan ay bahagi ng nasa 48,000 Chinese na nasa Pilipinas at employed pa rin sa illegal POGOs.

 60 araw anya o hanggang unang linggo ng Disyembre ang ibinigay nilang palugit para sa mga dayuhan upang umalis ng bansa.

Naglatag na ang Regional Disaster Risk Reduction and Management Council-Bicol at Office of Civil Defense (OCD) Region 5  ng preparedness plan sakaling itaas pa ang alert level status ng bulkang Mayon sa Albay.

 Ayon kay OCD Bicol Director Claudio Yucot, nagsagawa na sila ng pre-disaster risk assessment para sa maayos na evacuation ng mga apektadong residente.

 Inihayag naman ni Albay Public Safety and Emergency Management Office Chief Cedric Daep na sakaling itaas ang level 3, agad ililikas ang mga residente at alagang hayop mula sa 8 kilometer extended danger zone.

 Patuloy din ang kanilang pakikipag-ugnayan sa PHIVOLCS habang nananawagan ang mga nasabing opisyal sa mga residente na makipagtulungan lalo sa sandaling sumabog muli ang bulkan.

 Simula September 26 hanggang October 9, na-monitor ng PHIVOLCS ang patuloy na pamamaga ng lava dome at mahinang crater glow sa mga nakalipas na araw.

 Noon lamang Biyernes, Oktubre a – syete itinaas ng PHIVOLCS ang alert level 2 sa bulkan bunsod ng increasing unrest.

Tinatawaran ng Department of Trade and Industry (DTI) ang hiling ng mga magtitinapay na dagdag-presyo sa Pinoy tasty at pandesal.

Kwatro pesos ang hirit na dagdag-presyo ng mga manufacturer ng Pinoy tasty at pandesal pero inihayag ni Trade Undersecretary Ruth Castelo na magkakaroon pa ng negosasyon kung magkano ang increase.

Maaari anyang hatiin ang 4 pesos o isang beses lang na 2 pesos 50 centavos o gawing tres pesos na isang bagsakan sa kondisyong hindi magtataas ng presyo ang mga manufacturer sa loob ng isang taon.

Pero nilinaw ni Castelo na kailangan pang aprubahan ni Trade Secretary Alfredo Pascual ang hirit na price increase.

Panahon pa ni dating Pangulong Rodrigo Duterte humiling ng dagdag-presyo ang mga panadero dahil sa pagsipa ng presyo ng harina at asukal.