Drew Nacino

Pinagpapaliwanag na ng Metropolitan Waterworks and Sewerage System Regulatory Office (MWSS-RO) ang Maynilad kaugnay sa nagpapatuloy na service interruptions sa ilang lugar sa West Zone.

Kinumpirma ni MWSS-RO Chief Regulator Patrick Ty na nagpadala na sila ng formal notice to explain sa Maynilad.

Kamakailan ay inanunsyo ng nasabing water concessionaire na makararanas ng service interruption ilang barangay sa Maynila, Caloocan, Quezon City, Cavite at Bulacan simula October 17 hanggang 25.

Bunsod ito ng mataas na water demand sa Bagbag Reservoir.

Nilinaw ng Land Transportation Franchising and Regulatory Board na ang napaulat na pagkaantala sa bayad sa bus consortiums na kalahok sa EDSA carousel ay dahil sa transition process sa administrasyon.

Kinumpirma ni LTFRB officer-in-charge Riza Marie Paches na kasalukuyang inililipat nila ang lumang pondo sa bagong pondo sa EDSA Carousel.

Ayon kay Paches, nagkaroon ng additional na pondo na magagamit hanggang katapusan ng taon.

Ipinunto ng LTFRB official may transition ang paglipat nila sa kabilang pondo na nagamit na papunta sa bagong source ng budget.

Sinusuri na rin anya ng ahensya ang delay at tutuparin ang pangakong bayaran ang consortiums sa tamang oras.

Nakikipag-ugnayan na ang Department of Agriculture (DA) sa Bureau of Customs (BOC) upang matukoy ang mga posibleng kaso ng smuggling ng puti o dilaw na sibuyas na ibinebenta sa mga palengke.

 Ito’y sa kabila ng kawalan o kakulangan umano ng lokal na supply simula noong Hulyo maging ng imported onion.

 Tiniyak ni DA Spokesperson at Assistant Secretary for Consumer Affairs Kristine Evangelista na sa pamamagitan ng Bureau of Plant Industry (BPI), ay nagsasagawa na sila ng imbestigasyon.

 Nakapagtataka anyang naibebenta sa mga pamilihan ang mga white o yellow onion gayong wala namang importation permits.

Patuloy ding iinspeksyunin ng BPI ang mga palengke upang matunton ang mga smuggled na sibuyas.

Patay na nang matagpuan ang isang dalagita matapos mawala noong Martes sa bayan ng Claveria, Masbate.

 Duguan ang ulo nang marekober ang bangkay ng 14 anyos na grade 10 student sa Sitio Punta, Barangay Cawayan noong Miyerkules ng umaga.

 Ayon kay Maj. Niño Aquiatan, Hepe ng Claveria Municipal Police Station, agad namang naaresto ang 58 anyos na suspek.

 Batay sa imbestigasyon, pumunta umano sa bundok ang biktima upang manguha ng mga panggatong na kahoy.

 Lumalabas din na posibleng pinukpok ng bato sa ulo ang dalagita habang hindi inaalis ang posibilidad na ginahasa ito bago pinaslang.

 Katiwala umano ng pamilya ng biktima ang suspek na nakatakda namang sampahan ng kasong murder.

Posibleng magbuhos ng maraming ulan sa Northern Luzon ang tropical depression Neneng simula bukas.

 Ayon sa PAGASA, tinutumbok ng nasabing sama ng panahon ang dulong-hilagang Luzon at maaaring mag-landfall o dumaan lamang sa Babuyan Islands o Batanes.

 Posible ring itaas ang tropical cyclone signal number 1 ngayong umaga o mamayang hapon sa silangang bahagi ng Northern Luzon bilang paghahanda sa malakas na hanging dala ng bagyo.

 Dahil dito, muling binalaan ng pagasa ang mga residente sa Northern Luzon, partikular ang mga nasa tabing-dagat, bulubundukin at mga mababang lugar na maghanda sa posibleng flashfloods at landslides.

Nakatakda na muling buksan sa undas ang Manila North Cemetery, ang unang beses simula nang tumama ang COVID-19 pandemic.

 Bukas sa publiko ang norte simula Oktubre a–29 hanggang Nobyembre a–2 o sa mismong araw ng mga patay.

 Ayon kay Roselle Castañeda, Direktor ng Manila North Cemetery, kailangang magpakita lamang ng COVID-19 vaccination card ang mga bibisita habang hindi papayagang pumasok ang mga batang edad dose pababa.

 Nananatiling bawal ang pagdadala ng alak, matutulis na bagay at anumang armas.

 Magugunitang isinara ang Cementerio del Norte at iba pang himlayan sa Metro Manila at buong bansa noong undas 2020 at 2021 dahil sa pagkalat ng COVID-19 virus.

Isinailalim na sa state of calamity ang Bayan ng Allacapan, Cagayan matapos ang pinsalang idinulot ng bagyong Maymay sa agrikultura at imprastraktura.

 Ayon sa local government ng Allacapan, mahigit 1,000 pamilya o halos 4,000 katao ang apektado ng pagbaha sa 22 barangay.

 44 na pamilya o halos 150 katao naman ang nanunuluyan sa evacuation centers.

 Kabilang sa mga apektadong barangay ang Binubongan, Bulo, Burot, Cataratan, Capanickian Norte, Capanickian Sur, Centro East at Centro West.

Tiniyak naman ni Mayor Harry Florida ang tulong sa mga apektadong residente at magsasaka.

9 sa bawat 10 pamilya o nasa 90% ng mga benepisyaryo ng Pantawid Pamilyang Pilipino Program (4Ps) ang nananatiling mahirap kahit pitong taon na silang sinusuportahan ng programa.

 Sa performance report ng Commission on Audit (COA) aabot sa 3.8 million ng 4.2 million active household-beneficiaries ay miyembro na ng 4Ps sa loob ng 7 hanggang 13 taon.

 Katumbas ito ng kabuuang 537.39 billion peso cash grant na ipinamahagi simula June 30, 2021, nangangahulugang nasa below poverty threshold pa rin ang 4Ps members sa kabila ng mahabang panahon.

 Magugunitang inamin ni Department of Social Welfare and Development (DSWD) Secretary Erwin Tulfo sa kanyang pagharap sa pagdinig sa senado noong Miyerkules na kailangang repasuhin ang 4ps law na pinirmahan ni dating Pangulong Rodrigo Duterte.

 Nakasaad sa batas na binibigyan ng seven-year limit ang mahihirap na pamilya na manatili sa 4Ps program.

 Ang 4Ps ay sinimulan sa panahon ni dating Pangulong Gloria Macapagal-Arroyo habang noon lamang 2019 ay nagkaroon ng bagong batas para sa institutionalized program nito.

Mahigit dalawa’t kalahating toneladang puting sibuyas na pinaniniwalaang ipinuslit sa bansa ang nasabat ng Department of Agriculture (DA) sa Zamboanga City.

 Kinumpirma ng DA – Region 9 na isang cargo van na naglalaman ng kahong-kahong sibuyas ang nadiskubre sa Zamboanga City airport cargo terminal at nakatakda nang ibiyahe sa Maynila.

 Agad namang dinala sa Sitio San Ramon, Barangay Talisayan ang mga kontrabado upang i-dispose sa pamamagitan ng isang shredder at tractor.

 Walang dokumento ang nasabing shipment na nagpapatunay na ibinyahe ito nang ligal sa Zamboanga City.

 Nahaharap naman sa kasong paglabag sa Plant Quarantine Law ang consignee ng naturang kargamento.

Magsasagawa na ng special elections sa 7^th Congressional District ng Cavite upang punan ang nabakanteng puwesto ni Justice Secretary Jesus Crispin Remulla sa Pebrero 2023.

Inihayag ni Commission on Elections (COMELEC) Chairman George Garcia na magiging automated ang nasabing halalan upang mabawasan ang gastos ng COMELEC.

Gagamitin ng poll body ang vote-counting machines na ginamit noong May 9, 2022 elections.

Ang iba pa anyang aktibidad tulad ng Filing ng Candidacy ay planong gawin sa Disyembre ngayong taon.

Idinagdag pa ni Garcia na kung isang aspirant lamang ang maghahain ng Certificate of Candidacy ay otomatiko itong ipo-proklama na panalo upang hindi na matuloy ang espesyal na halalan.

Alinsunod ito sa Section 2 ng Republic Act 8295 o isang batas na nagtatakda para sa proklamasyon ng naging kandidato para sa anumang elective office sa isang espesyal na halalan.