Drew Nacino

Narekober na ang isa sa limang nasawi sa landslide sa bayan ng Malitbog, Bukidnon.

 Positibong kinilala ng kanyang ama ang biktimang si Vincent Jordan Achas, 30 anyos na nalibing sa gumuhong bahagi ng bundok sa Barangay San Luis matapos ang malakas na ulan kamakailan.

 Kinilala naman ng Office of the Civil Defense-Region 10 ang apat pang nawawalang biktimang sina Lucresio, 54 anyos; asawa nitong si Angelita Lauronal, 52;

 Raffy Simprota, 34  at Nerio Talines, 50 anyos.

 Si Achas ay isa sa dalawang manggagawa mula sa municipal engineering office, habang ang tatlo ay pawang residente sa Sitio Mabuhay.

 Ayon kay Malitbog Mayor Gary Casiño, nagkaroon ng clearing operations sa Barangay San Luis nang bigla ng umalingawngaw ang pagsabog sa kabundukan.

 Bukod anya sa lokal na pamahalaan, sumaklolo na rin ang private companies sa retrieval operations.

Pinasasagot ng Korte Suprema ang gobyerno kaugnay sa petisyon na humihiling na ipawalang-bisa ang batas na nagpapaliban sa Barangay at Sangguniang Kabataan Elections.

Sa en banc resolution, inatasan ng korte ang Office of the President at Commission on Elections na maghain ng komento sa Biyernes, Oktubre a – 21.

Itinakda rin ng Supreme Court ang oral argument sa nasabing petsa, alas-3 ng hapon.

Una nang naghain ang Veteran election lawyer na si Romulo Macalintal ng petisyon na humihirit sa SC na atasan ang Office of the President at Comelec na ipatigil ang Republic Act 11935.

Alinsunod sa nasabing batas, i-a-atras ang petsa ng Barangay at Sk polls sa October 2023 sa halip na sa December 5, 2022 na orihinal na petsa.

Humiling ang kapatid ng pinaslang na broadcaster na si Percival “Percy Lapid” Mabasa na magkaroon ng crime scene walkthrough sa confessed gunman na si Joel Escorial.

Ayon sa beteranong mamamahayag na si Roy Mabasa, nais niyang makipagkita kay Escorial upang masubukan ang kredibilidad nito para maalis ang kanilang agam-agam.

Magugunitang itinuro ng suspek ang tatlo pang kasabwat sa krimen na si Edmon at Israel Dimaculangan at isang alyas “Orlando”.

Aminado si Roy na nais nilang isalaysay ni Escorial kung paano isinagawwa ang karumal-dumal na krimen.

Bagama’t nagpapasalamat ang nakababatang Mabasa sa mga pulis na nakabantay sa labas ng bahay ng kanyang kapatid upang protektahan ang kanilang pamilya, iginiit niya ang mas mahigpit na seguridad.

Ito’y dahil hindi pa anya nahuhuli ang mastermind at iba pang suspek sa pagpatay sa kanyang kuya.

Hindi pa dapat isara sa halip dapat ipagpatuloy ang imbestigasyon sa pagpaslang sa broadcaster na si Percy “Lapid” Mabasa kahit pa sumuko na ang self-confessed gunman sa krimen.

Ito ang panawagan ni Senator Ramon Bong Revilla Jr., sa gitna ng pangamba na isara na ng pulisya ang kaso makaraang sumuko sa PNP ang umano’y hitman na si Joel Estorial.

Nakasaad sa PNP manual na ang isang kaso ay ikinukunsiderang solved and closed kapag tukoy na ang suspek; kapag may sapat ng ebidensya para magharap ng kaso;

Kapag nasa kustodiya na ng mga otoridad ang suspek at kapag ang suspek ay naipagharap na ng kaso sa Prosecutor’s Office o’ sa Korte.

Ayon kay Revilla, hindi maaaring ikunsiderang lutas na ang kaso ng pagpaslang kay Mabasa dahil nananatiling at-large ang mga tatlo umanong kasabwat ni Estorial at kailangan pang malaman kung sino ang mastermind.

Labis ding ikinabahala ng Senador ang ibinunyag ni Estorial na nanggaling sa loob ng New Bilibid Prisons ang utos na pagpatay sa broadcaster.

Ito ang dahilan kaya’t naghain ang mambabatas ng resolution 264 na nagsusulong na imbestigahan ng Senate Committee on Public Order and Dangerous Drugs kung paanong nakagawa ng krimen ang mga nasa loob ng Bilibid at pagpaliwanagin ang Bureau of Corrections. —ulat mula kay Cely Ortega Bueno (Patrol 19)

Pinababantayan ni Senador Raffy Tulfo sa Department of Agriculture ang apat na indibidwal na sangkot umano sa agricultural smuggling.

Tinukoy ni Tulfo sina Michael Yang, Andrew Chang, Lea Cruz at Manuel Tan na matagal na umanong sangkot sa pagpupuslit ng mga gulay sa bansa.

Ayon sa Senador, batay sa kanyang impormasyon ay may mga ‘kaibigan’ ang apat sa D.A. kaya’t malaya ang mga ito na makapag-smuggle ng mga gulay.

Tila nagka-dementia o amnesia na anya ang mga opisyal ng D.A. nang kanyang tanungin ang mga ito kung kilala ang apat.

Iginiit ni Tulfo na dapat bantayang mabuti ang shipment at consignees ng apat lalo’t magiging madalas na ang importasyon ng gulay ngayong malapit nang mag-Pasko.

Pinatitiyak din ni Senator Tulfo sa D.A. na hindi “moro-moro” ang kanilang operasyon lalo’t papalapit na Pasko at inaasahang daragsa pa ang smuggled vegetables sa bansa.

Siniguro naman ng Bureau of Plant Industry na patuloy nilang tututukan ang pangharang sa smuggled vegetables katuwang ang Bureau of Customs. —ulat mula kay Cely Ortega Bueno (Patrol 19)

Kinuwestyun ni Senate Agriculture and Food Committee chairperson Cynthia Villar ang P15.4 billion na inilaan ng Department of Agriculture para sa importasyon ng chemical fertilizer habang P1 billion lamang para sa composting.

Sa gitna ng pagtalakay sa panukalang budget ng kagawaran para sa taong 2023 na P163.8 billion, aminado si Villar na nagtataka siya kung anong mayroon sa importation bakit lagi itong gustong gawin ng D.A. na tinatawag na niyang Department of Importation.

Dapat tinuturuan anya ang mga magsasaka na mag-composting kung saan sila na mismo ang gagawa ng pataba pero ayaw turuan ng D.A. sa halip ay nag-i-import lagi ng chemical fertilizer na nagreresulta sa degradation o paghina ng kalidad ng lupa sa matagal na paggamit.

Iginiit ng Senador na kahit sa hybrid seedlings, nais ng kagawaran na mag-import nito kahit mas malaki ang gastos at kakaunting magsasaka ang makikinabang dahil mahal ang farm inputs na kailangan dito.

Mas dapat umanong pagtuunan ang inbred seeds o locally produced na punla ng palay para ang lokal at mas maraming magsasaka ang makikinabang.

Ipinunto ng mambabatas na mas dapat tulungan ang local farmers para lumaki naman ang kanilang kita at maging middle class o lower middle class. —ulat mula kay Cely Ortega Bueno (Patrol 19)

Hindi pa kailangang ibalik ang mas mahigpit na border restrictions sa gitna ng pagpasok sa bansa ng 81 kaso ng XBB Omicron sub-variant at 190 XBC variant.

Nilinaw ni DOH officer-in-charge Maria Rosario Vergeire na handa naman ang health care system ng bansa kung tataas pa ang mga kaso ng bagong variant.

Ayon kay Vergeire, kahit may mga bagong variant ay napapangasiwaan nang maayos ang hospital admissions at hindi naman napupuno ang mga pagamutan.

Hindi naman anya maaaring magbukas-sara ng borders ngayong panahon lalo’t dalawang taon ng may Covid-19 pandemic sa halip ay dapat masanay nang mamuhay kasama ang virus at marunong mag-adopt kung anuman ang sitwasyon.

Aminado naman ang DOH official na inaasahan na nilang tataas muli ang Covid-19 cases sa pagpasok ng XBB at XBC variants.

Bagaman wala pang indikasyon na mas peligroso o nakahahawa ang mga bagong variant, binigyang-diin naman ni Vergeire ang kahalagahan ng patuloy na pagsunod ng publiko sa minimum health protocols.

Sinimulan na ng Department of Health ang imbestigasyon sa mga kaso ng Hand, Foot and Mouth Disease (HFMD) sa Bayan ng San Pascual at iba pang bahagi ng lalawigan ng Batangas.

Ayon kay Health Officer-in-Charge Maria Rosario Vergeire, ang HFMD na dala ng Coxsackievirus ay maaaring i-transmit sa pamamagitan ng droplets.

Ang secretions gaya ng laway at pawis anya ng isang tao ay maaaring mahawa pa ang isang tao na posibleng magresulta sa lesion o sugat o pantal sa bibig, kamay at paa.

Ibinabala rin ni Vergeire na maaari ring mailipat ang sakit sa pamamagitan ng dumi ng tao.

Bagaman karaniwang tinatamaan ng HFMD ay mga batang edad 5 hanggang 7, maaari pa ring mahawa ang sinuman.

Isa sa mga sintomas nito ay nagsisimula sa lagnat, ubo, sipon na sasabayan ng mga sugat sa dila, gilagid at bibig maging mga pantal sa palad at talampakan.

Kadalasan namang kusang nawawala ang nasabing sakit at mayroon ding lunas pero maaaring magkaroon ng mga kumplikasyon kung hindi gagamutin.

Samantala, nagpakalat na ang DOH ng disinfection materials sa mga apektadong lugar habang binigyang-diin ng kagawaran ang kahalagahan ng hand hygiene upang maiwasan ang pagkalat ng HFMD.

Karagdagang 1,196 Covid-19 cases ang naitala ng Department of Health kahapon kaya’t lumobo na sa halos apat na milyon o 3,986,000 ang total case load.

Nasa 25,000 naman ang aktibong kaso habang umabot na sa halos 3.9 million ang recoveries.

Inihayag din ng DOH na mayroong 34 additional deaths dahilan upang bahagyang tumaas sa 63,581 ang fatalities.

Sa mga bagong naitalang infections, 401 ay mula sa Metro Manila.

Samantala, kinumpirma kahapon ng kagawaran na nakapasok na sa bansa ang 81 unang kaso ng Omicron XBB subvariant at 193 XBC variant.

Posibleng sumipa hanggang 18,000 ang daily Covid-19 cases pagsapit ng Nobyembre a – 15.

Ito, ayon kay DOH officer-in-charge Maria Rosario Vergeire, ay batay sa October 11 projection, kung saan hindi pa kasama ang pagkakadiskubre sa Omicron XBB subvariant at XBC variant.

Pinaka-mababa na anyang maitatala kada araw ay 2,400 pero kung darami ang susuway sa minimum public health standards, ay maaaring humantong sa 18,000 cases per day pagsapit ng November 15.

Sa kabila nito, ipinunto ni vergeire na “manageable” ang Covid-19 situation sa bansa dahil matagal nang nakapaghanda ang gobyerno.

Idinagdag ni Vergeire na sa susunod na taon naman ay inaasahan nilang mayroon pa ring mga kaso pero umaasang hindi na darami ang mga ma-o-ospital dahil patuloy ang pagbabakuna.

Hanggang nitong October 17, mahigit 73.4 million individuals na ang fully vaccinated laban sa Covid-19, kabilang ang nasa 20.3 million na nakatanggap ng first booster dose at 3.2 million na tinurukan ng second booster.