Drew Nacino

Hindi dapat maging hadlang ang sumulpot na sub-variant ng COVID-19 para matuto ang mga mag-aaral at makabalik sa face to face classes.

Ayon kay Senate Minority Leader Koko Pimentel, hindi maaaring mamuhay ang mga mamamayan nang may takot at mahalagang matuto ang lahat na mabuhay kasama ang virus, lalo’t bukod sa COVID-19 ay mayroon pang mahigit 3,000 uri ng virus na naglipana.

Binigyang-diin ni Pimentel na kung hindi papayagan ang mga bata na patuloy na matuto, mag-aalala ang mga magulang sa kinabukasan ng kanilang mga anak kapag dumating ang panahon na sila na ang magpapalakad o mamahala sa ating lipunan.

Ito’y dahil may iba pang pandemic at health emergencies na posibleng mangyari sa mga susunod na panahon kaya’t kailangang bumalik sa mga paaralan ang mga bata para sa mas mahusay nilang edukasyon at trainingupang maging handa sa mga ganitong pagkakataon.

Ipinaalala naman ng senador na hindi na maibabalik ang nagdaang oras at ang mga estudyante ay minsan lang bata kaya’t dapat silang bigyang pagkakataong matuto kasabay ng interaksyon nila sa kanilang mga kapwa mag-aaral. —sa ulat ni Cely Ortega-Bueno (Patrol 19)

Matapos maudlot, nakalusot na rin sa Senate Sub-Committee on Finance ang proposed 5.22 billion peso budget ng Commission on Elections (COMELEC).

Sa ikalawang pagdinig ng kumite na pinangunahan ni Senador Imee Marcos, idinetalye ni COMELEC Chairman George Garcia na ibinaba nila sa 2.7 billion ang 10 billion pesos na hiling nilang dagdag-pondo para sa Barangay at Sangguniang Kabataan Elections.

Makaraang itakda sa October 2023 ang Barangay at SK Polls, humirit ang COMELEC ng dagdag na 10 billion pesos pero kinuwestyun ng mga senador.

Ayon kay Garcia, malaking bahagi ng hinihingi nilang budget increase ay para sa honorarium ng mga gurong magsisilbi sa halalan.

Aabutin anya ng isang milyon ang Board of Election Inspectors na magsisilbi sa nasabing eleksyon.

Samantala, umapela rin ang poll body chief sa senado ng dagdag-pondo para naman sa ipatatayo nilang sariling gusali upang makatipid sila ng 170 million pesos kada taon sa kanilang renta para sa kanilang mga tanggapan. —sa ulat ni Cely Ortega-Bueno (Patrol 19)

Aabot na sa 335 million pesos ang nawala sa kaban ng gobyerno dahil sa mga doble-dobleng pangalan at hindi tugmang listahan ng Pantawid Pamilyang Pilipino Program (4Ps) ng Department of Social Welfare and Development (DSWD).

 Batay ito sa report ng Commission on Audit (COA), na nagrekomendang linisin ang pangalan sa 4Ps database at tanggalin na ang mga duplicate entry o ayusin din ang mga hindi tugma.

 Napansin din ng COA na nagkaroon ng release ng grants sa 25,410 validated at delisted duplicates mula sa 18 rehiyon o katumbas ng 335.4 million pesos.

 Nasilip din sa report na nasa 95,000 ang mga pinaghihinalaang na­dobleng mga pangalan sa database simula pa noong 2017.

 Kabilang na rito ang tinatayang 80,000 cases na naresolba o naayos ng DSWD kaya’t nabawasan ang mga duplicate sa database.

Sinimulan na ng Metropolitan Manila Development Authority (MMDA) ang preparasyon para sa holiday season.

 Kabilang sa inilatag na plano ang moratorium o pagbabawal sa road projects simula November 14 hanggang January 2, 2023, adjustment ng mall hours at deployment ng mas maraming traffic enforcers.

 Nilinaw naman ni MMDA acting Chairman Carlo Dimayuga III na hindi kasama sa pagbabawalan ang flagship projects.

 Sa kabila nito, magbibigay na lamang anya ng schedule para sa mga priority project upang matiyak na hindi masasabay ang mga ito sa mga road reblocking upang hindi magdulot ng mabigat na daloy ng trapiko.

 Kinumpirma rin ni Dimayuga na nakipag-usap na sila sa management ng mga mall kaugnay sa pagtatakda ng sale simula alas-11 ng umaga hanggang alas-11 ng gabi tuwing weekdays.

 Samantala, nasa 2,000 hanggang 2,600 traffic enforcers naman ang ide-deploy sa nasabing panahon.

Bahagyang bumaba sa 23,347 ang aktibong kaso ng COVID-19 sa bansa.

 Ito’y makaraang makapagtala ng karagdagang 1,379 COVID-19 cases ang Department of Health (DOH) kahapon kumpara sa 1,196 noong Martes.

 Dahil dito, aabot na sa 3,987,316 ang total case load kabilang ang 3.9 million recoveries at 63,625 deaths.

 Nangunguna pa rin ang Metro Manila sa mga rehiyong may pinaka-maraming COVID infections na 9,463 cases sa nakalipas na dalawang linggo; sinundan ng Calabarzon, 4,912 at Central Luzon, 2,666 cases.

Sinimulan na ng pamahalaan ang deportation sa mga Chinese na nagtatrabaho sa mga hindi lisensyadong Philippine Offshore Gaming Operator (POGO) firms.

 Kinumpirma ng Department of Justice (DOJ) na umalis ang unang batch ng deportees, na binubuo ng walong Chinese, sakay ng Philippine Airlines (PAL) flight PR-316 patungong Wuhan, China sa Ninoy Aquino International Airport (NAIA) terminal 2, kahapon.

 Itinurn-over ang walong overstaying na dayuhan ng Pampanga Provincial Police Office sa Bureau of Immigration (BI).

 Personal namang sinaksihan ni Justice Secretary Jesus Crispin “Boying” Remulla at Immigration Commissioner Norman Tansingco ang pag-alis ng mga Chinese POGO worker.

 Kamakailan ay binigyan ng DOJ ang nasa 49,000 Chinese na nagtatrabaho sa mga illegal pogo firm ng 59 na araw upang boluntaryong umalis ng Pilipinas makaraang kanselahin ang kanilang visa.  - mula sa ulat nina Aya Yupangco (Patrol 5) at Raoul Esperas (Patrol 45)

Ikinakasa na ng economic managers ng Marcos Jr. administration ang posibleng pagpapalawig sa mas mababang taripa sa imported pork, rice, corn at coal upang mapabagal ang epekto ng inflation.

 Ayon kay Socioeconomic Planning Secretary Arsenio Balisacan, nagpapatuloy ang problema sa inflation kaya’t dapat matiyak na hindi hahantong sa mas mataas na taripa kasabay ng paglobo ng presyo ng mga bilihin.

 Nitong mayo nang palawigin ni dating Pangulong Rodrigo Duterte hanggang katapusan ng taon ang Executive Order (EO) 171 na nagtatapyas sa import duties ng karne, bigas, mais at uling sa gitna ng russia-ukraine war.

 Sa ilalim ng EO 171, nananatili sa 15% ang tariff rate para sa in-quota, mula sa dating 30% at 25% para sa out-quota pork shipments, mula sa dating 40%.

 Nilinaw naman ni Balisacan na kailangan pang dumaan sa proseso ang posibleng pagpapalawig sa bisa ng nasabing kautusan at pinag-aaralan din kung hanggang kailan ito i-e-extend.

 Sisimulan na rin anya ng Cabinet-Level Committee on Tariff and Related Matters ang consultation process hinggil sa planong extension ng EO 171.

Nagtangkang lumabas ng bansa at pumunta ng Singapore noong Setyembre si Atty. Lloyd Christoppher Lao, dating Executive Director ng procurement service ng Department of Budget and Management.

 Ito ang isiniwalat ni Senate Blue Ribbon Committee Chairman, Francis Tolentino.

 Gayunman, hinarang anya ng Bureau of Immigration (BI) si Lao at hindi pinaalis dahil nananatili ito sa immigration lookout bulletin alinsunod sa rekomendasyon ng senado.

 Bagaman binawi na ng senado ang warrant of arrest laban sa dating PS–DBM official kaugnay sa imbestigasyon sa Pharmally, tumanggi ang mataas na kapulungan ng kongreso sa kanyang hirit na clearance para matanggal na sa immigration lookout bulletin.

 Samantala, inihayag ni Tolentino na mag-i-isyu siya ng kautusan upang bigyan ng mas malaking papel ang mga abogado ng mga testigo o resource persons sa mga pagdinig ng kumite na una sa kasaysayan ng nasabing lupon.  – sa ulat ni Cely Ortega-Bueno (Patrol 19)

Aprubado na ang paglalagay ng exclusive motorcycle lane sa kahabaan ng Commonwealth Avenue, Quezon City.

 Ito ang kinumpirma ni Metropolitan Manila Development Authority (MMDA) acting Chairman Carlo Dimayuga III makaraang magkasundo ang mga alkalde at kinatawan ng iba’t-ibang lungsod sa isinagawang Metro Manila Council meeting.

 Ayon kay Dimayuga, nagkaroon ng ilang pagbabago sa ilalabas na resolusyon, tulad ng mga hindi pantay na lapad ng kalsada habang ilalarga ang dry run sa Nobyembre.

 Aalamin naman ng MMDA sa susunod na linggo kung saan nagkakaroon ng “bottlenecks” o mga bahagi ng kalsada kung saan naiipon ang mga sasakyan dahil sa pagkipot ng daan.

 Sa sandaling ipatupad special lane para sa mga motorsiklo sa Commonwealth, mananatiling bike lane ang outermost lane, katabi ang Public Utility Vehicles (PUV) lane at saka isusunod ang motorcyle lane.

 Pipinturahan ng asul ang linya para sa motorisiklo, dilaw para sa puv, habang berde sa mga bisikleta.

May kaakibat na multang 500 pesos ang mga motorcycle riders na lalabas sa kanilang lane maging ang mga sasakyang papasok sa motorcyle lane.

Nilinaw naman ni Dimayuga na sa Commonwealth muna ipatutupad ang motorcyle lane habang pinag-aaralan kung maaari rin itong ipatupad sa Edsa at Ortigas.

Sumaklolo na ang Department of Social Welfare and Development (DSWD) sa mahigit 4,000 manggagawang nawalan ng trabaho sa Mactan Economic Zone (MEZ) sa Cebu.

 Ayon kay DSWD Undersecretary Alan Tanjusay, aabot sa 2,000 hanggang 5,000 pesos na ang ipinamamahagi nilang financial at food assistance sa mga apektadong manggagawa.

 Aminado si Tanjusay na marami ang nasabing bilang kung ikukumpara sa nakaraang mga taon at ngayon lamang nangyari na ganito karaming manggagawa ang na-retrench sa isang economic zone.

 Kinumpirma naman ni Philippine Economic Zone Authority Director General Theo Panga na ang pagbagal ng global trade at humihinang global economy ang dahilan nang retrenchement sa iba pang economic zone.

 Gayunman, nilinaw ni Panga na sa isang kumpanya lamang nagkaroon ng tanggalan sa trabaho at hindi sa buong eco-zone.