Drew Nacino

Hawak na ng PNP ang passbook ng self-confessed gunman na si Joel Escorial kung saan kumpirmadong may nagdeposito sa bank account nito ng P550,000 bilang bayad sa pagpatay sa broadcaster na si Percival Mabasa o Percy Lapid.

Ayon kay Southern Police District Director, Brig. Gen. Kirby Kraft, nakasaad sa bank statements na nagkaroon ng limang deposit transactions mula September 15 hanggang October 4.

Batay sa Extra-Judicial Confession ni Escorial, kinontak siya ni Crisanto Villamor na bilanggo sa New Bilibid Prison at nagsilbing middleman sa pagpatay kay Mabasa noong September 15 upang ipaalam na naideposito na ang downpayment na P100,000 sa kanyang bank account.

Sinundan pa ito ng P100,000 kinabukasan, September 16 at nakita rin sa passbook na nagkaroon ng 20 withdrawal transactions na tig-P10,000 mula September 15 hanggang 29.

Noon namang October 4 o isang araw matapos paslangin si ka Percy, idineposito na ang balanseng P350,000 sa account ni Escorial habang P200,000 ang na-withdraw din noong araw na iyon.

Pinakahuling withdrawal naman ay noong October 11 na aabot sa P170,000.

Hinimok ng Department of Transportation ang mga biyahero na magpa-book na bago ang Undas 2022, sa gitna ng inaasahang pagdagsa ng mga commuter at long weekend.

Ayon kay Transportation Undersecretary Mark Steven Pastor, dapat ngayon pa lamang ay simulan nang maghanda ng mga luluwas ng kani-kanilang probinsya para sa Undas.

Maigi anyang bumili na ng ticket upang maiwasan ang mahabang pila lalo sa Biyernes at tiyaking kaunti lamang ang dalang bagahe upang mas maging komportable.

Inaasahang daragsa ang mga biyahero simula sa Biyernes, Oktubre a – 28 hanggang kinabukasan.

Samantala, sinimulan na rin ng DOTr na inspeksyunin ang iba’t ibang transport terminals.

Inabisuhan naman ni Pastor ang mga transport operators na regular na i-check ang kanilang mga sasakyan upang matiyak ang ligtas na biyahe ng publiko.

Target ng Department of Energy at iba pang ahensya na maglabas ng comprehensive roadmap para sa Electric Vehicle Industry sa unang bahagi ng taong 2023.

Ito’y upang magabayan nang husto ang Electric Vehicle Industry sa layunin ng Electric Vehicle Industry Development Act (EVIDA).

Ang nasabing roadmap ay i-de-develop sa tulong ng partner agencies, gaya ng departments of transportation, trade and industry at science and technology.

Ayon kay Energy secretary Raphael Lotilla, nasa 9k EV na ang rehistrado at tinatayang 300 charging stations na ang idineploy sa buong bansa.

Hinimok naman ni Lotilla ang industry stakeholders na bilisan ang development, commercialization at utilization ng mga e.v. bilang alternatibo para sa transport sector.

Sinibak na sa pwesto ng National Capital Region Police Office (NCRPO) ang 11 pulis na kinasuhan ng National Bureau of Investigation dahil sa pagkawala ng apat na lalaki na nasa kanilang kustodiya noong 2021.

Alinsunod ito sa pagtitiyak ng NCRPO na linisin ang organisasyon.

Ayon kay acting NCRPO Regional Director, Brig. Gen. Jonnel Estomo, kinukundena nila at hindi kinukunsinte ang paglabag ng mga opisyal sa karapatang pantao at batas.

Kinilala ang mga opisyal na sina dating Regional Drug Enforcement Unit chief, Lt. Col Ryan Orapa, Lt. Jesus Menez;

Staff Sergeants Ronald Lanaria, Ronald Montibon, Troy Paragas, Roy Pioquinito, Robert Raz Jr.; Corporals Christal Rosita, Denar Roda, Alric Natividad at Ruscel Solomon.

Pawang nahaharap ang mga ito sa kasong Kidnapping, Serious Illegal Detention, paglabag sa Anti-Enforced o Involuntary Disappearance Act na inihain ng NBI Task Force Against Illegal Drugs noong October 19.

Nag-ugat ang kaso sa pagkawala at pinaghahanap pa ring magkapatid na Gio at Mico Mateo, maging ang mga Online sabungerong sina Garry Matreo Jr., at Ronaldo Añonuevo noong April 13, 2021.

Karagdagang 1,585 Covid-19 cases ang naitala ng Department of Health kahapon dahilan upang lumobo na sa halos apat na milyon ang total caseload.

Ito na ang ikatlong sunod na araw na mas mababa sa dalawanlibo ang daily COVID-19 cases sa bansa.

Tatlumpu’t pito ang nadagdag sa death toll kaya’t umakat sa 63,779 ang mga namatay.

Bahagya namang bumaba sa 23,369 ang aktibong kaso habang umabot na sa mahigit 3.9 million ang recoveries.

Sa mga pinakabagong infections, 465 ay mula sa Metro Manila.

Iniimbestigahan na ng mga otoridad ang isa pang may apelyidong villamor na nakakulong sa New Bilibid Prison, Muntinlupa City.

Ito ang kinumpirma ni Bureau of Corrections Deputy Director General Gabriel Chaclag matapos ibunyag ng self-confessed killer ni Percy Lapid na si Joel Escorial, na isang Palana Villamor mula NBP ang kumuha sa kaniya para patayin ang broadcaster.

Kinilala ni Chaclag ang dalawang bilanggong sina Jun Globa Villamor at Jose Palana Villamor, na napag-alamang mag-pinsan.

Una nang namatay si Jun sa NBP Hospital noong October 18 habang si Jose ay inilipat na sa Custodial Center ng PNP noong October 20.

Inihayag naman ni Justice secretary Jesus Crispin Remulla na mahigpit na ring binabantayan ang isang Christopher Bacoto alyas Jerry Sandoval na nakakulong sa Bureau of Jail Management and Penology.

Si Bacoto ay itinuro rin ni Escorial na kumausap umano sa iba pa niyang kasabwat sa pagpaslang kay Ka-Percy o Percival Mabasa.

Makararanas muli ng water interruption ang malaking bahagi ng Caloocan City at iba pang lugar sa Metro Manila at lalawigan ng Cavite, simula bukas hanggang linggo, Oktubre a – 30.

Ito, Ayon sa Maynilad, ay bilang bahagi ng kanilang isasagawang weekly maintenance activities para mapahusay ang water services sa West Zone Area.

Partikular na makararanas ng service interruption ang mga Barangay 8, 28, 31 86, 88, 90, 91, 112, 121 hanggang 125, 126, 127, 128, 129, 130 at 131 sa South Caloocan;

Barangay 18 at 20, 260 hanggang 267, 654, 655, 657, 658, 666 at 659-a sa Maynila; Barangay Sta. Monica, Nagkaisang Nayon, Sangandaan, Santo Domingo, Apolonio Samson, Bagbag, San Bartolome, Nova Proper, Pag-Ibig Sa Nayon at San Jose sa Quezon City;

Niog 2, Alima, Banalo, Digman at Poblacion sa Bacoor City at Bucandala 1, 3 at Carsadang Bago 2 sa Imus City, Cavite.

Hinimok naman ng Maynilad ang mga costumer nito na mag-imbak ng sapat na tubig upang magamit habang hindi natatapos ang maintenance activities.

Isang eroplano ang sumadsad sa madamong bahagi ng Mactan Cebu International Airport.

Kinumpirma ni Eric Apolonio, spokesman ng Civil Aviation Authority of the Philippines na pasado alas-11 kagabi nang mag-overshoot ang Airbuss 333 Aircraft ng Korean Airlines Flight KE631.

Ayon kay Apolonio, pansamantalang sinuspinde ang lahat ng flights matapos isara ang runway sa naturang paliparan.

Agad naman anyang nagpadala ng Cebu Fire and Rescue Teams at Medical personnel sa crash site.

Inaalam na rin ng Aircraft and Accident Investigation Board ng CAAP ang sanhi ng pagsadsad ng eroplano. —ulat mula kay Raoul Esperas (Patrol 45)

Hindi lamang isa kundi dalawa ang umano’y middleman na nag-hire sa mga gunman na pumatay sa broadcaster na si Percy Lapid o Percival Mabasa.

Ito ang nilinaw ng Southern Police District (SPD) matapos ang pagkamatay sa loob ng New Bilibid Prison ng presong si Crisanto Villamor Junior, na isa sa sinasabing middleman.

Ayon kay SPD District Director, Brig. Gen. Kirby Kraft, sinecure na nila ang isa pa umanong middleman na nasa Bureau of Jail Management and Penelogy.

Magugunitang inamin anya ng self-confessed gunman na si Joel Escorial na naka-trabaho niya ang anim na iba pang kasabwat sa pagpatay kay Ka Percy.

Patuloy ding pinaghahanap ang iba pang itinurong kasabwat ni Escorial na sina Israel at Edmon Dimaculangan at isang alyas Orly o Orlando.

Nanghinayang din si Interior Secretary Benhur Abalos sa pagkamatay ng bilanggo ng New Bilibid Prison na nagsilbi umanong middleman sa pagpatay sa broadcaster na si Percy Lapid.

Aminado si Abalos na galit na galit sila at iginigiit na dapat ay may managot sa nangyari.

Unang araw pa lamang anya ay nag-alok na sila ng reward at halos araw-araw pinagpaguran ng Task Force Lapid at mga pulis ang pagtunton sa mga suspek.

Nagbabala naman ang kalihim na sakaling mapatunayan sa autopsy report na nagkaroon ng foul play sa pagkamatay ng middleman na si Crisanto Villamor Junior, mananagot ang sinumang responsable.