Drew Nacino

Tinukoy ni Senate Committe on Public Order Chairman Ronald Dela Rosa ang mga ipatatawag kapag sinimulan ang imbestigasyon sa pagkakadawit ng inmate sa New Bilibid Prison (NBP), Muntinlupa sa pagpaslang sa broadcaster na si Percival Mabasa o Percy Lapid.

Ayon kay Dela Rosa, kabilang sa ipatatawag sa hearing ng Senate Committee on Public Order and Dangerous Drugs na kanyang pinamumunuan, ang mga mayor o leader ng mga gang sa Bilibid.

Maaari anyang hingan ang mga ito ng impormasyon sa pagkamatay ng isang Jun Globa Villamor, na itinurong middleman sa pagpaslang kay ka-Percy.

Bilang dating namuno sa Bureau of Corrections, inihayag ni Bato na sa kalakaran sa “Munti”, imposibleng hindi alam ng mga mayor ang nangyari sa kanilang kasamahan.

Sa report ng Department of Justice, namatay si Villamor ilang oras matapos sumuko sa pulisya ang self-confessed gunman na si Joel Escorial.

Bukod naman sa mga mayor, sinabi ng Senador na ipatatawag din sa pagdinig upang magbigay-linaw sina Justice secretary Jesus Crispin Remulla, DILG secretary Benhur Abalos, ang pamunuan ng Philippine National Police at BuCor.

Magsisimula ang hearing sa Nobyembre dahil sa nasabing buwan inaasahang ma-i-refer sa kumite ang resolusyon ni Senator Bong Revilla Jr., na nananawagang imbestigahan ang issue. —ulat mula kay Cely Ortega Bueno (Patrol 19)

Asahan na ngayong araw ang mabigat na daloy ng trapiko sa Taguig City kasabay ng 27th ASEAN Labor Ministers Meeting.

Inabisuhan na ng MMDA ang mga motorista na dumaan na lamang sa mga alternatibong ruta upang makaiwas sa abala, lalo’t magkakaroon ng Re-routing at Road Closure.

Mag-de-deploy naman ang MMDA, ng 186 na personnel upang umalalay sa traffic management, road clearing at emergency response.

Isasagawa ang Labor Ministerial Meeting sa Shangri La Hotel sa Bonifacio Global City, hanggang Sabado, Oktubre a – 29.

Humirit na rin ang Maynilad ng dagdag-singil na target ipatupad simula Enero ng susunod na taon.

Ang nasabing dagdag-singil ay bahagi ng rate-rebasing simula sa nasabing panahon.

Mahigit P3.00 per cubic meter ang hirit na dagdag ng Maynilad sa unang taon subalit may kasunod ito hanggang taong 2027.

Gayunman, nilinaw ni Metropolitan Waterworks and Sewerage System (MWSS) Chief Regulator Patrcik Ty na hindi pa pinal ang hiling ng Maynilad dahil daraan pa ito sa public consultation at ipe-presenta pa sa Board of Trustees para aprubahan.

Ayon naman kay Maynilad Chief Operating Officer Randy Estrellado, tanggap nila na inflation lamang muna ang maaari nilang bawiin sa mga consumer habang inaayos ang kanilang serbisyo.

Ipinunto ni Estrellado na apat na taon nang walang dagdag-singil ang Maynilad.

Hindi naman kailangang doktor ang mangangasiwa sa Department of Health.

Ito ang depensa ni Senator Ronaldo “Bato” Dela Rosa sa  pagtatalaga kay dating PNP chief Camilo Cascolan bilang Unndersecretary ng DOH.

Ayon kay Dela Rosa, hindi naman magpapagaling ng pasyente si Cascolan dahil ang papel nito ay tumulong pangasiwaan ang kagawaran.

Hindi anya makukuwestyon ang abilidad ni Cascolan pagdating sa pamamahala dahil mahusay nitong pinamunuan ang PNP na may mahigit 200,000 tauhan.

Iginiit ni Bato na bakit naman maiinsulto ang mga health expert sa pag-appoint ni Pangulong Bongbong Marcos kay Cascolan sa DOH.

Prerogative anya ito ng Pangulo at hindi ng mga naiinsulto. —ulat mula kay Cely Ortega Bueno (Patrol 19)

Nagmahal na rin ang cremation kasabay ng pagtaas ng presyo ng mga bilihin at serbisyo, dahil sa Oil Price Hike.

Halimbawa na lamang sa Caloocan City, sumampa na sa P40,000 ang halaga ng kada cremation kumpara sa dating P30,000.

Hindi pa rito kasama ang urn, na nasa P2,000 hanggang P13,000 depende sa materyales at disenyo, maging ang gastos sa funeral services.

Sa isang kilalang punerarya sa Quezon City, naglalaro sa P66,000 hanggang P99,000 ang cremation pero posibleng magmahal ito dahil sa taas ng presyo ng krudo, lalo ng diesel.

Karaniwang gamit ng mga funeral service sa cremation ay diesel kaya’t aminado ang mga may-ari at nangangasiwa ng mga punerarya at crematorium na hindi nila maiiwasang magtaas ng presyo.

Nananatiling mura ang cremation kumpara sa karaniwang paglilibing sa mga sementeryo na nangangailangan pa ng lote o lupang bibilhin.

Inaasahang tataas pa hanggang 150,000 mula sa 120,000 ang daily passenger traffic sa Parañaque Integrated Terminal Exchange (PITX), ilang araw bago ang Undas.

Ayon kay PITX Corporate Affairs and Government Relations head Jason Salvador, nakipag-ugnayan na sila sa mga ahensya ng gobyerno upang matiyak ang maayos na biyahe ng mga pasahero.

Kabilang sa kanilang katuwang ang Land Transportation Office at Land Transportation Franchising and Regulatory Board.

Maglalabas anya ang LTFRB ng special permits upang matiyak na sapat ang bilang ng mga Public Utility Vehicle na bibiyahe sa “Long Undas Weekend”.

Nakatutok naman ang LTO sa roadworthiness ng mga PUV maging ang physical at mental condition ng mga driver.

Handa na rin ang Land Transportation Office sa pagdagsa ng mga motorista at biyahero sa Undas.

Sa katunayan ay nakipag-pulong na ang LTO sa mga transport group, mga kinatawan mula sa mga Expressway at Bus terminal, bilang preparasyon sa inaasahang buhos ng mga pasaherong lalabas o papasok ng Metro Manila.

Ayon kay LTO Executive Director Horatio Bona, inaasahan na nilang mas marami ang daragsa ngayong taon dahil sa mas maluwag na COVID-19 restrictions, lalo sa weekend.

Gayunman, kanilang inabisuhan ang mga transport group at transport hub official na ipaalala sa mga pasahero ang palagiang pagsusuot ng face masks sa mga terminal building at dalhin ang vaccine cards sakaling tanungin ng mga otoridad ang kanilang destinasyon.

Samantala, hindi anya papayagan ang mga LTO personnel na mag-leave simula October 7 hanggang November 4 upang matiyak na matutugunan ng ahensya ang mga aberyang maaaring kaharapin ng publiko sa Undas.

Maaari pa ring magsagawa ng autopsy sa labi ng sinasabing middleman sa kaso ng pagpatay sa broadcaster na si Percival Mabasa o Percy Lapid.

Ito, ayon kay Southern Police District Director, Brig. Gen. Kirby Kraft, ay upang malaman ang tunay na ikinamatay ni Jun Villamor sa loob ng New Bilibid Prison sa Muntinlupa City.

Magugunitang namatay si Villamor sa Bilibid noong October 18 kasabay ng paglantad ng self-confessed gunman na si Joel Escorial.

Kahit anya ikinukunsidera na ng PNP na sarado na ang kaso dahil sa pagkaka-aresto kay Escorial, nagpapatuloy naman ang imbestigasyon.

Bukod pa ito sa pagtugis sa iba pang suspek na magkapatid na sina Edmon at Israel Dimaculangan at isang alyas Orly o Orlando.

Aminado naman si Kraft na malaking tulong sa kanila ang pagbibigay ni Escorial ng kanyang passbook na maaaring makapagturo sa mastermind na nag-utos sa pagpatay kay lapid habang kasalukuyan namang inaalam ng Special Investigation Task.

Kasalukuyang inaalam ang pagkakakilanlan ng taong nagdeposito ng pera bilang kabayaran sa trabaho umano nina Escorial na patayin ang broadcaster.

Lumantad na ang kapatid na babae ng namatay na middleman sa Percy Lapid slay case.

Nakausap umano ni alyas Marissa ang kapatid na si Jun Villamor bago ito bawian ng buhay habang nakapiit sa New Bilibid Prison, Muntinlupa.

Ibinulgar ni ‘Marissa’ na binanggit umano ni Jun ang mga pangalang Alldren, Labra at Malfie na sinasabing mga commander ng Sigue-Sigue Sputnik, Batang City Jail at Happy Go Lucky Gang.

Kinontak at kinausap anya ng mga Gang Commander ang kanyang kapatid at nabanggit din ng tatlo kay Jun na nagmula ang utos na patayin si ka-Percy sa isang mataas na opisyal ng Bureau of Corrections.

Gayunman, hindi naman binanggit sa kanya ni Jun ang pangalan ng nasabing BuCor official.

Hawak na ng Department of Justice si Marissa at nakatakdang isailalim sa Witness Protection Program.

Isang masuwerteng mananaya ang nakasungkit ng P188.5 million jackpot sa 6/49 Super Lotto ng Philippine Charity Sweepstakes Office (PCSO).

Ayon sa PCSO, natumbok ng lucky bettor ang winning combination na 9 – 3 – 19 – 13 – 20 – 29 sa draw kagabi.

Nanalo naman ng tig-P50,000 ang 171 mananaya matapos makuha ang second prize para sa 5 winning numbers.

Samantala, wala pa ring nakadagit ng premyo sa 6/58 Ultra Lotto na P152.3 million na binola rin kagabi.

Ito’y makaraang bigong makuha ang winning combination na 39 – 7 – 58 – 37 – 50 – 16.

Gayunman, anim na bettors ang nakasungkit ng second prize na tig-P120,000 makaraang matumbok ang 5 digit combination.