Drew Nacino

Binaha ang ilang bahagi ng Lungsod ng Maynila dahil sa malakas na ulang dulot ng localized thunderstorms at shearline.

Gutter-deep ang baha sa kanto ng Taft at Pedro Gil Avenues maging sa panulukan ng Taft at United Nations Avenue.

Nagdulot ng pagbabagal ng daloy ng trapiko sa bahagi ng Rizal Avenue ang pagbaha habang ilang pasahero rin ang stranded habang naghihintay ng masasakyan pauwi.

Sa pag-iikot ng DWIZ, nakaranas din ng malakas na ulan sa EDSA at bahagyang pagbigat ng daloy ng trapiko sa Balintawak Area sa Quezon City.

Suspendido ngayong araw ang klase sa ilang lugar sa CALABARZON dahil sa masamang panahon.

Kabilang sa mga nag-kansela ng klase sa lahat ng lebel sa mga pampubliko at pribadong paaralan ang mga lokal na pamahalaan ng Famy, Paete at Siniloan, Laguna.

Wala ring klase sa lahat ng antas sa public at private schools sa lalawigan ng Rizal maging sa Tanza, Cavite.

Sinuspinde rin ang klase sa lahat ng antas sa mga pampubliko at pribadong paaralan at trabaho sa gobyerno sa Ilocos Norte at Abra.

Ito’y upang magbigay-daan naman sa inspeksyon sa mga pinsala sa imprastraktura matapos ang Magnitude 6.4 na lindol sa Northern Luzon, kagabi.

Suportado ng ilang business groups ang “Complete Phaseout” ng mga Philippine Offshore Gaming Operations (POGO) sa bansa.

Kabilang sa nagsulong ng tuluyang pagpapa-alis sa mga POGO ang Foundation for Economic Freedom, Makati Business Club at Management Association of the Philippines.

Bagaman may benepisyo sa ekonomiya ang mga POGO, mas malaki naman ang negatibong epekto nito sa lipunan at seguridad ng bansa.

Ipinunto ng mga business group na nawawala ang kumpiyansa ng mga investor sa bansa sa sandaling makitaan ng bahid ng “Money Laundering” ang Banking System at kung nalalagay sa balag ng alanganin ang kalakalan.

Iniuugnay ang mga pogo activity sa ilang krimen tulad ng Money Laundering, Kidnapping, Bribery, Prostitution, Human at Drug Trafficking na pawang may malaking epekto sa Law and Order maging sa reputasyon ng bansa.

Ngayon lamang buwan ay sinimulan na ng pamahalaan ang pagpapa-deport sa halos 50,000 illegal Chinese pogo workers.

Nananatiling mataas ang presyo ng mga produktong petrolyo para sa mga ordinaryong tsuper at consumer sa kabila ng inilargang rollback noong Martes.

Ayon sa transport group na PISTON, kapiranggot lamang ang ipinatupad na tapyas-presyo ng mga kumpanya ng langis kumpara sa magkasunod na price hike noong nakalipas na dalawang linggo.

Kahit anila dalawang beses nang itinaas ang pasahe sa jeepney ay hindi pa rin sapat ang kinikita ng mga tsuper sa gitna nang nagmamahalang bilihin, lalo ng pagkain.

Dahil dito, iginiit ng PISTON ang agarang pagsuspinde sa Fuel Excise Tax at VAT maging ang pagpasa sa Oil Regulation Bills na naka-tengga sa kongreso bilang solusyon.

Hindi i-a-atras ng mga sardines manufacturer sa ang hirit na dagdag P3.00 sa kanilang mga produkto kahit may inilatag ang gobyerno na solusyon sa kakulangan ng supply.

Ipinunto ni Canned Sardines Association of the Philippines (CSAP) Executive Director Francisco Buencamino na bahagi lamang ang hakbang ng gobyerno ng mas malaking problema sa produksyon na kinakaharap ng canners.

Nilinaw ni Buencamino na ang petisyon na taasan ng tres pesos ang Suggested Retail Price para sa canned sardines ay noong Hulyo pa inihain ng CSAP, ilang buwan bago ang kanilang babala na magkakaroon ng raw material shortage sa huling bahagi ng taon.

Kung tutuusin anya ay maliit lamang ang hinihiling nilang dagdag kahit pa dalawang taon nang hindi gumagalaw ang presyo ng kanilang produkto.

Kabilang sa mga nagtulak sa CSAP na humirit ng price hike ang sumisipang presyo ng materyales, tulad ng lata at tomato paste, maging ng krudo bunsod ng humihinang halaga ng piso at epekto ng Ukraine-Russia War.

Sinuspinde ng Land Transportation Office ang panghuhuli ng mga pasaway na motorista sa Undas.

Ayon kay LTO Chief Teofilo Guadiz, wala munang huhulihin na motorista ang kanilang mga operatiba sa panahon ng paggunita sa araw ng mga patay bagkus tututukan nila ang pag-alalay sa mga motorista.

Gayunman, kung may mabigat anyang paglabag sa batas trapiko tulad ng makikitang depektibong headlights at kalbong gulong ng mga sasakyan ay hindi papayagan ng LTO na makabiyahe ang mga motorista.

Hanggang Nobyembre a – 4 nakakalat ang mga operatiba ng LTO sa NCR at mga lalawigan upang alalayan ang mga motorista kaugnay ng ‘Oplan Biyaheng Ayos Undas 2022’.

Sa ilalim nito, babantayan ng ahensya ang mga aktibidad sa mga pangunahing lansangan at transport terminals sa Metro Manila at mga lalawigan.

Hindi pa gaanong dagsa ang mga pasahero sa Araneta Bus Terminal sa Cubao, Quezon City, ilang araw bago mag-Undas.

Ipinaliwanag ni Araneta Bus Terminal Manager Ramon Legaspi na nabawasan ang mga pasahero sa Araneta dahil lumipat ang ilang Bus Company sa Integrated Terminal sa Metro Manila.

Gayunman, maaaring sa Biyernes pa anya magsimulang magdatingan ang mga biyahero lalo’t long weekend.

Idinagdag ni Legaspi na sa oras din na sumahod na ang mga manggagawa ay hudyat naman ito ng inaasahang pagdagsa ng mga biyahero.

Tatlo hanggang limang preso ang namamatay kada araw sa mga bilangguang pinangangasiwaan ng Bureau of Corrections (BuCor) sa bansa.

Ito ang nilinaw ng BuCor sa gitna ng agam-agam sa sanhi pagkamatay sa New Bilibid Prison, Muntinlupa ng sinasabing middleman sa Percy Lapid slay case.

Ayon kay BuCor spokesman Gabriel Chaclag, natural cause, gaya ng katandaan at sakit ang karaniwang dahilan ng pagkamatay ng mga bilanggo.

Aabot anya sa halos 49K ang Persons Deprived of Liberty ang nasa iba’t ibang prison facilities sa bansa.

Ipinaliwanag din ni Chaclag na kahit naman bago pa magkaroon ng Covid-19 pandemic, hanggang tatlong bilanggo ang namamatay sa BuCor facilities kada araw.

Aminado ang BuCor official na sa katunayan isa sa kanilang problema ang malaking bilang ng mga bangkay ng mga PDL sa mga accredited funeral parlors na walang umaako.

Sumampa na sa P594 million ang halaga ng pinsala sa agrikultura matapos ang magkasunod na bagyong Maymay at Neneng.

Ayon sa Department of Agriculture-Disaster Risk Reduction and Management Operations Center, umakyat na rin sa halos 37,000 metric tons ang production loss.

Nasa 22,000 hectares naman ng lupang sakahan ang napinsala dahilan para maapektuhan ang mahigit 22,000 magsasaka at mangingisda sa Cordillera, Ilocos at Cagayan Valley Regions.

Pinakamalaki ang pinsalang dulot sa mga palayan na aabot sa kalahating bilyong piso.

Samantala, tiniyak ng D.A. ang tulong sa mga apektadong magsasaka.

Isinailalim na sa Witness Protection Program (WPP) ng Department of Justice ang kapatid na babae ng New Bilibid Prison inmate na nag-ayos umano ng transaksyon upang patayin ang broadcaster na si Percy Lapid.

Ito ang kinumpirma ni Justice secretary Boying Remulla makaraang lumantad si alyas Marissa, kapatid ng namatay na middleman na si Jun Villamor.

Ayon kay Remulla, sasailalim pa sa evaluation si Marissa bago tuluyang mapasailalim sa WPP.

Hinatid anya ni Social Welfare secretary Erwin Tulfo ang kapatid ni Villamor sa DOJ matapos magpasaklolo.

Hawak umano ni Marissa ang ilang impormasyon na mahalaga sa kaso, partikular kung sino ang nag-utos na ipapatay si ka Percy.