Drew Nacino

Dapat ipagpatuloy ang pagsusuot ng facemask sa loob ng mga paaralan sa kabila ng pahayag ni Tourism Secretary Christina Frasco na magiging boluntaryo na lamang ang pagsusuot ng facemask sa indoor areas.

Ito ang panawagan ng DOH Technical Advisory Group- Pediatric Infectious Diseases halos isang linggo bago ang full implementation ng face to face classes.

Ayon kay Dr. Anna Ong-Lim, miyembro ng DOH Technical Working Group, wala namang mawawala kung magsusuot pa rin ng facemask ang mga estudyante, lalo’t magkukumpulan muli ang mga ito simula sa November 2.

Karaniwan anyang tumataas ang COVID-19 kapag nababago ang mga scenario o kung luluwagan ang protocols kahit mayroon pa ring pandemya.

Una nang inihayag ng Department of Education na magiging optional para sa mga mag-aaral ang pagsusuot ng face masks sa outdoor settings alinsunod sa umiiral na polisiya ng gobyerno.

Tanging mga hindi bakunado laban sa COVID-19, may comorbidities at senior citizens ang hinihikayat na magsuot pa rin ng facemasks.

Sisimulan na ang rebate o balik-bayad sa tinatayang 140,000 costumer ng Maynilad sa Las Piñas, Muntinlupa at Parañaque cities na naapektuhan ng mahigit isang buwang service interruption.

Sa public consultation ng Metropolitan Waterworks and Sewerage System (MWSS) Regulatory Office, inanunsiyo ni Chief Regulator Patrick Ty na ang 65 peso rebate ay mararamdaman sa November billing.

Ang kabuuang halaga na mahigit 9.2 milyong piso ay hinati anya sa mga naapektuhang customer kaya’t 65 pesos ang naging balik-bayad.

Nito lamang Setyembre ay pinatawan ng MWSS ang Maynilad ng 9.2 million peso penalty na ikakaltas naman sa bill ng mga customer na naapektuhan ng service interruption noong Mayo hanggang Hulyo.

Nagbabala naman si Ty na hindi sila magdadalawang-isip na magpataw ng panibagong multa kung mauulit ang mahabang water interruption.

Hawak na ng NBI-Manila sa Taft Avenue ang apat pang bilanggo na posibleng may kinalaman sa pagpatay sa broadcaster na si Percival Mabasa o Percy Lapid.

Kabilang sa dumating sa NBI headquarters mula sa Bureau of Corrections ang tatlong mayor ng mga gang at druglord na si German Agojo mula sa New Bilibid Prison, Muntinlupa.

Kinumpirma rin ni Justice Secretary Boying Remulla na kasama sa nauna nang itinurn-over sa kanila ang mga presong sina Christopher Bacoto at Jose Palana Villamor.

Gayunman, hindi pa malinaw kung magiging testigo ang anim sa imbestigasyon sa kaso ng pagpatay kay Ka Percy.

Binigyan na ng clearance ng Department of Justice ang n.b.i. na kunan ng salaysay ang anim na persons deprived of liberty hinggil sa nalalaman nila sa pagkamatay ng middleman na si Jun Villamor.

Inaasahan na sisimulan ang interview sa mga bilanggo ngayong umaga upang magawan sila ng mga sinumpaang salaysay. —sa ulat ni Aya Yupangco (Patrol 5)

Bawal na ang paglilinis ng puntod sa Manila North Cemetery matapos ang deadline na ibinigay ng pamunuan ng sementeryo.

Ayon kay Manila North Cemetery Administrator Roselle Castañeda, hanggang October 25 lang talaga ang paglilinis habang ang paglilibing at cremation ay pinapayagan hanggang bukas.

Tangi anyang mga dadalaw para magdasal at magtirik ng kandila ang papayagang pumasok sa Cementerio Del Norte.

Gayunman, mayroong ilang restriksyon na ipatutupad ang Norte para sa mga bibisita.

Inihayag ni Department of Interior and Local Government (DILG) Secretary Benhur Abalos na kanilang palalakasin ang Disaster Preparedness at Response Capabilities ng mga barangay hinggil sa pagtugon sa panahon ng mga emergency at kalamidad.

Ayon kay Abalos, ito’y bilang tugon sa naging panawagan ni Pangulong Ferdinand “Bongbong” Marcos Jr., hinggil sa naturang usapin.

Layunin ng hensya na masigurong hindi na mauulit ang pagkasawi ng mga idibidwal at pagkawasak ng mga ari-arian sa gitna ng ibat-ibang uri ng sakuna partikular na ang bagyo.

Iginiit ng kalihim na ang ugnayan ng pamahalaan, pribado, multi-sectoral organizations, at maging ang komunidad, ang pinaka-mahalaga upang malampasan ang natural disasters, emergencies, at mga kalamidad.

Isinailalim na sa State of Calamity ang Lalawigan ng Cagayan dahil sa epekto ng magkakasunod na mga bagyo sa mga nakalipas na buwan.

Alinsunod ito sa inaprubahang resolusyon ng Sangguniang Panlalawigan.

Batay sa datos ng provincial disaster risk reduction and Management Office, mahigit 232,000 katao ang naapektuhan ng mga Bagyong Florita, Maymay, Neneng at Obet.

Tinaya naman sa P565 million ang pinsala sa agrikultura habang P78.4 million sa imprastraktura.

Sumadsad pa sa 963 ang Covid-19 cases na naitala ng Department of Health kahapon maging ang active infections sa 21,924.

Mababa ito sa mga nakalipas na linggo o simula October 17 hanggang 23, na 1,714.

Dahil dito, tumungtong na sa 3,996,000 ang total case load, kabilang ang 3,911,000 recoveries at 63,846 deaths.

Gayunman, ang mababang daily Covid-19 case ay repleksyon ng kaunting tests noong linggo.

Nangunguna pa rin ang Metro Manila sa may pinaka-maraming kaso sa nakalipas na dalawang linggo na 6,939; sinundan ng CALABARZON, 3,866 at Central Luzon at 2,295.

Mahalaga at matibay na ebidensya ang “text messages” na ipinakita ng kapatid ni Jun Globa Villamor, ang nasawing “middleman” sa kaso ng pagpatay sa broadcaster na si Percival Mabasa.

Ayon kay Justice Secretary Jesus Crispin Remulla, mababasa sa mga “text message” na ipinakita ni alyas ‘Marissa’ ang mga huling sinabi ng kanyang kapatid bago bawian ng buhay.

Maituturing aniya itong “dying declaration” o alam ng tao na siya ay pwedeng mamatay kaya nagsasabi o naglalabas ng mga impormasyon at kabilang sa mga exception sa “hearsay rule.”

Ipinaliwanag naman ng Kalihim na mahalagang ebidensya ang text messages dahil ang kapatid ni Villamor ang may-ari ng cellphone at nakausap ni Jun bago mamatay.

Dahil dito, ipasusuri sa National Bureau of Investigation ang naturang ebidensya.

Handang magbigay ng seguridad ang Department of Justice sa pamilya ng pinaslang na broadcaster na si Percival Mabasa o Percy Lapid.

Ito’y makaraang ibunyag ng kapatid ni Ka-Percy na si Roy Mabasa na nakatatanggap na sila ng banta.

Ayon kay Justice Secretary Boying Remulla, kinausap na niya ang kapatid ni Percy na si Roy Mabasa hinggil sa pagbibigay ng security protection.

Sa katunayan anya ay tinawagan na niya si Roy upang ipagbigay-alam na maaaring magtalaga ng mga NBI Personnel ang DOJ kung kinakailagan pero wala pang tugon ang nakababatang Mabasa.

Samantala, tiniyak din ng kalihim ang seguridad ng mga kapatid ng nasawing ‘middleman’ na sa Jun Villamor.

Malaki ang maitutulong sa pag-akit o paghikayat ng mga turista na bumisita sa bansa ang planong mas luwagan pa ang paggamit ng face mask.

Reaksyon ito ni Senador Grace Poe sa Executive Order na inilabas ni Pangulong Bongbong Marcos kung saan gagawin ng boluntaryo at hindi na mandatory ang pagsusuot ng face mask sa indoor spaces.

Ayon kay Poe, kaisa siya ng pamahalaan sa hangaring muling buhayin ang ekonomiya matapos maapektuhan ng Covid-19 pandemic.

Sa pagpapaluwag anya ng regulasyon sa paggamit ng mask, maraming ma-e-engganyong bumisita sa bansa at maging aktibo muli ang ekonomiya na kalauna’y magbibigay trabaho sa mga Pilipino.

Gayunman, pinayuhan ng senador ang publiko na manatiling sumunod sa minimum health protocols at ipagpatuloy ang laban sa virus hanggang tuluyan na itong matuldukan.

Samantala, inihayag naman ni Senate Minority Leader Koko Pimentel na dapat na talagang matuto ang publiko na mamuhay kasama ang Covid-19 virus. —ulat mula kay Cely Ortega Bueno (Patrol 19)