Drew Nacino

Ikinakasa na ng Iloilo Provincial Government ang deklarasyon ng state of calamity dahil sa african swine fever outbreak.

Ayon kay Iloilo Governor Arthur Defensor,Jr. idedeklara ang state of calamity sa oras na makuha na nila ang eksaktong bilang ng mga hog raiser na apektado at tatanggap ng tulong ng gobyerno.

I-ko-convene rin ni Defensor ang local price coordinating council ngayong araw upang talakayin at kumonsulta sa magiging presyo ng karneng baboy sa lalawigan.

Target naman ng provincial veterinary office na mag-depopulate ng nasa tatlundaang baboy sa bayan ng san miguel kung saan naitala ang pinaka-bagong mga kaso ng ASF.

Umabot na sa mahigit animnaraan mula sa tinatayang isanlibong baboy ang dinepopulate ng p.v.o. sa bayan pa lamang ng Oton.

Dalawa pang bata sa lalawigan ng Batangas ang nahawahan ng hand and foot and mouth disease.

Kinumpirma ni DOH officer-in-charge Maria Rosario Vergeire, na ang dalawa ay kabilang sa halos limampung pasyente na tinamaan ng virus.

Ito, ayon kay Vergeire, ay batay sa isinagawang laboratory test.

Nagpapatuloy naman anya ang test sa iba pang pasyente.

Nilinaw ng opisyal na aabot na sa 362 ang suspected cases ng HFMD pero nang beripikahin ay nasa limampu lamang ang kumpirmado.

Samantala, naka-isolate naman ang mga nahawang bata habang pina-alalahanan ng DOH ang ibang residente na mag-ingat laban sa sakit at ugaliin ang kalinisan sa katawan at kapaligiran.

Hindi pa man tumatama sa kalupaan ang bagyong paeng, lubog na sa abot-baywang na baha ang mga residente sa ilang lugar sa mga lalawigan ng Aklan, Capiz at Iloilo.

Ayon sa Capiz Provincial Disaster Risk Reduction and Management Office, kabilang sa mga nakaranas ng pagbaha ang mga bayan ng Tapaz, Dumalag, Mambusao at Sigma.

Stranded naman ang maraming residente sa Numancia, Aklan makaraang umapaw ang Aklan river bunsod ng high tide.

Naghahanda rin ang mga residente sa kabisera na kalibo sa pag-apaw ng tubig sa mga ilog.

Nalubog naman sa abot-dibdib na baha ang Oquendo Elementary School sa bayan ng Balete.

Ang malakas na pag-ulan ay dulot ng shearline at trough (trap) ng bagyo.

Nasa dalawampu katao na ang nagsilikas matapos malubog sa baha ang ilan pang lugar sa Negros Occidental bunsod ng malakas na ulang dala ng shearline at trough (trap) ng bagyong Paeng.

Kabilang sa mga apektado ng pagbaha ang mga residente ng mga bayan ng Binalbagan at Moises Padilla sa Negros Occidental.

Kinumpirma ni Provincial Disaster Management Program Division Head Dr. Zealhard Caelian na kasalukuyang tumutuloy ang mga apektadong residente sa mga paaralan.

Sinuspinde rin ang klase sa lahat ng antas sa mga lungsod ng San Carlos at La Carlota, maging sa bayan ng Pontevedra kahapon.

Samantala, kinumpirma ng San Carlos City Disaster Risk Reduction and Management Office na isang landslide ang naganap sa eco-translink highway, alas otso y medya kagabi.

Wala namang nasugatan pero naharangan ng debris ang kalsada na nagdurugtong sa nasabing lungsod at mga bayan ng Don Salvador Benedicto, Murcia at Bacolod City.

Nagkasundo na ang Pilipinas at U.S. sa pagtukoy sa limang karagdagang sites na pagtatayuan ng mga infrastructure project sa ilalim ng Enhanced Defense Cooperation Agreement (EDCA).

Ayon sa isang senior U.S. Defense Official, nagkasundo na rin ang mga liderato ng defense department ng dalawang bansa na bilisan ang pagpopondo para sa limang nasabing proyekto.

Layunin anya nito na mapabilis ang pagtugon ng pwersang pilipino at amerikano sa tuwing may mga kalamidad at krisis sa Pilipinas.

Una nang tinukoy ng Pilipinas at Amerika ang basa airbase sa pampanga; fort magsaysay military reservation sa nueva ecia;

Lumbia air base sa Cagayan De Oro City; Antonio Bautista Air Base sa Palawan at Mactan Benito Ebuen Air Base sa Cebu bilang EDCA sites.

Gayunman, hindi pa binabanggit ng dalawang bansa ang limang karagdagang sites, na kailangan pang sumailalim sa consultation.

“Huwag puro military na lamang na parang naghahanda tayo na makipag-giyera.”

Reaksyon ito ni Senate Minority Leader Koko Pimentel sa plano ng estados unidos na maglaan ng $70 million o mahigit 4 na bilyong pisong military aid sa Pilipinas.

Para ito sa pinaigting na pagpapatupad sa susunod ng dalawang taon ng pinasok na kasunduan ng Pilipinas at U.S. na Enhanced Defense Cooperation Agreement (EDCA).

Iginiit ni Pimentel na hindi dapat na pangunahing nakatutok ang pagtutulungan ng Pilipinas at Amerika sa military aid.

Dapat din anyang magkaroon ng kasunduan ang dalawang bansa sa larangan ng agrikultura kung saan tutulong ang Amerika na mag-produce ang Pilipinas ng mas maraming pagkain.

Ang EDCA ay kasunduan na nagpapahintulot sa amerika na magtayo ng mga pasilidad at maglagay ng kanilang assets o kagamitan sa ilang military base na nasa strategic na lugar. — Mula sa ulat ni Cely Ortega-Bueno (Patrol 19)

Nilinaw ng Department of Health na dapat pa ring magsuot ng face masks sa public transport at medical facilities sa kabila ng plano ng gobyerno na luwagan ang facemask mandate.

Ayon kay DOH officer-in-charge Maria Rosario Vergeire, opsiyonal ang pagsusuot ng facemask sa indoor areas at requirement pa rin ang pagsusuot nito sa healthcare facilities gaya ng mga clinic at ospital.

Pawang mga high-risk area anya ang mga health at transport facilities at lantad sa iba’t ibang sakit ang mga nakatatanda, buntis at may comorbidities.

Una nang inihayag ni Tourism Secretary Christina Frasco na plano ng pamahalaan na alisin na ang mandatory wearing ng masks sa indoor settings.

Gayunman, hindi pa naglalabas ng executive order si Pangulong Bongbong Marcos para rito.

Suspendido ang mga biyahe ng mga sasakyang pandagat sa ilang bahagi ng bansa dahil sa bagyong Paeng.

Pansamantalang ipinatigil ng Philippine Coast Guard ang mga biyahe sa Sorsogon papuntang Northern Samar simula alas onse kahapon ng umaga.

Ipinagbawal din ang lahat ng biyahe sa mga pantalan sa mga lalawigan ng Romblon at Masbate maging ang pagpalaot ng mga sasakyang pangisda sa Ilocos Norte.

Sinuspinde rin ng PCG ang biyahe mula Cebu patungo sa ilang lugar sa central at eastern Visayas sa gitna nang banta ng naglalakihang alon.

Kasalukuyang nakataas ang signal number 1 sa malaking bahagi ng Bicol Region at Eastern Visayas. –Mula sa ulat ni Aya Yupangco (Patrol 5)

Nagbabadya na ring magmahal ang processed canned meat at iba pang processed meat products, gaya ng hotdog, sausage at longganisa sa mga supermarket.

Bunsod ito ng inihaing petisyon sa Department of Trade and Industry (DTI) ng mga manufacturer na humihiling ng dagdag-presyo.

Kinumpirma ng Philippine Association of Meat Processors Incorporated (PAMPI) na P1.50 hanggang P2.00 ang hirit nilang price increase kada 150 grams.

Ayon kay PAMPI Vice President Jerome Ong, ang mas mahal na imported mechanically-deboned meat, paghina ng piso at giyera sa Ukraine ang nagtulak sa kanila upang magtaas na rin ng presyo.

Damay din anya sa price hike ang hotdog, sausage at iba pang kahalintulad na produkto.

Samantala, inihayag ni DTI-Consumer Protection Group Officer-In-Charge Ann Claire Cabochan na pinag-aaralan na nila ang petisyon ng mga manufacturer.

Nasa 170 pamilya o mahigit 1,000 katao ang nagsilikas at pansamantalang nanunuluyan sa Guihulngan City Gymnasium sa Negros Oriental matapos ang flashfloods kahapon.

Kinumpirma ni Engineer Giovani Enabe, hepe ng City Disaster Risk Reduction and Management Office na pawang residente ng Barangay Poblacion at Buenavista ang mga apektado ng pagbaha.

Ayon kay Enabe, umapaw ang Bateria River bunsod ng malakas na ulan.

Maliban anya sa pagbaha, nakaranas naman ng landslides sa Sitio Mambog, Barangay Planas at Barangay Humay-Humay.

Hanggang ngayon ay hindi pa humuhupa ang tubig sa mga nabanggit na lugar dahil sa patuloy na pag-ulan.

Samantala, pinalawig ng lokal na pamahalaan ang class suspension sa lahat ng lebel hanggang ngayong araw.