Drew Nacino

Inabisuhan na ng MERALCO ang mga consumer sa naka-umang na dagdag-singil sa kuryente sa unang buwan ng susunod na taon.

Ipinaliwanag ng MERALCO na matatapos na kasi sa Enero ang isa sa tatlong refund na P.28 at mararamdaman na rin ang epekto ng mas mahal na supply ng kuryente.

Bunsod naman ito ng pagsuspinde ng San Miguel Corporation sa kanilang Power Supply Agreement sa MERALCO matapos makakuha ng Temporary Restraining Order sa Court of Appeals.

Ayon kay MERALCO spokesperson Joe Zaldarriaga, labis na maka-aapekto ang dalawang nabanggit na rason sa final billing ng kanilang mga customer.

Dahil anya sa TRO, napilitan ang nasabing power distributor na pumasok sa Emergency Power Supply Agreement sa isang planta ng Aboitiz sa presyong halos P6.00 kada kilowatt hour.

Kumpara ito sa sinuspindeng kontrata ng SMC na mas mura sa P4.30 centavos ang kada kilowatt hour.

Asahan na ang pinalakas na internet connectivity sa mga tourist destination sa bansa.

Ito’y makaraang lumagda sa isang Memorandum of Understanding (MOU) ang Departments of Tourism at Information and Communications Technology.

Pinangunahan nina Tourism Secretary Christina Garcia Frasco at Information and Technology Secretary Ivan John Uy ang MOU Signing sa tanggapan ng DOT sa Makati City.

Ayon kay Uy, kabilang sa mga mandato ni Pangulong Bongbong Marcos ang pagpapalakas sa Interconnectivity ng mga ahensiya ng pamahalaan.

Inihayag naman ni Frasco na mayroon nang 94 na tourist destinations sa bansa ang natukoy na nangangailangan ng mas malakas na internet connections.

Umaasa anya silang mas mapalalakas pa ang internet connections sa mga lugar na ito katuwang ang DICT na magiging malaking tulong para sa pagpapa-unlad pa ng turismo sa bansa.

Nakikipag-ugnayan na ang Department of Health sa Office of the President (OP) kaugnay sa magiging pasya ng gobyerno sa nakatakdang pagtatapos ng Covid-19 State of Calamity sa December 31.

Inihayag ni DOH officer-in-charge, USec. Maria Rosario Vergeire na nagsumite na sila ng Memo kaugnay sa kanilang mga rekomendasyon sa O.P.

Pinag-usapan na anya nila ni Executive Secretary Lucas Bersamin ang mga posibleng maging panibagong paraan ng pagharap sa Covid-19 pandemic.

Sa ngayon ay hinihintay pa ng kagawaran ang magiging tugon ni Pangulong Bongbong Marcos Jr., sa kanilang mga rekomendasyon.

Pinag-iingat ng Department of Health ang publiko ngayong nauuso na naman ang trangkaso o flu.

Ayon kay DOH officer-in-charge Maria Rosario Vergeire, karaniwan na ang trangkaso na dulot ng influenza virus sa respiratory tract, kapag maulan at malamig ang panahon, lalo ngayong amihan season.

Halos katulad nito ang sintomas ng trangkaso sa Covid-19 gaya ng lagnat, pananakit ng ulo, sipon, ubo at namamagang lalamunan.

Maaari ring makaranas ng pananakit at panghihina ng katawan ang taong may trangkaso.

Sakaling makaramdam ng sintomas, pinayuhan ng DOH ang publiko na magsuot ng face mask, limitahan ang pakikisalamuha sa ibang tao, magpahinga at kumain nang masustansiyang pagkain.

Dapat din anyang obserbahan ang sarili, kumonsulta sa doktor sa pamamagitan ng telemedicine at magpa-test na rin kung may Covid-19 upang makatiyak.

Sa mga walang kakayahang magbayad ng RT-PCR o Antigen Test, sinabi ni Vergeire na may libreng Covid-19 test sa health facilities ang mga local government at puwede ring sagutin ng PhilHealth ang gastos.

Ngayong kaliwa’t kanan ang mga pagtitipon at pagdiriwang, inabisuhan din ng kagawaran ang publiko na maging mas maingat upang maiwasan ang hawahan, trangkaso man o Covid-19.

Nakapagtala ang Department of Health ng 592 severe at critical cases ng Covid-19 na naka-admit sa mga ospital.

Ayon sa DOH, ang nasabing bilang ay naitala noong Dis.18.

Sa 2,501 ICU beds para sa mga Covid-19 patients, 509 o 20.4% ang okupado.

Nasa 4,455 o 22.5% ng 19,819 Non-ICU Covid beds naman ang kasalukuyan ding ginagamit.

Samantala, 73 million individuals o 94.41% na ng  target population ang fully vaccinated kabilang ang 21 million individuals na nakatanggap na ng booster shots.

Nagkasundo na ang Manila International Airport Authority (MIAA) at Grab Philippines sa pagpapatupad ng “Airport to Anywhere” Program.

Ito’y upang maglaan ng dagdag na dedicated 200 Grab Accredited Vehicles para tugunan ang inaasahang pagtaas ng demand sa masasakyan ng mga pasahero sa NAIA, lalo ngayong holiday season.

Ayon kay MIAA General Manager Cesar Chiong, maaaring mag-book gamit ang Grab Mobile App o sa Grab Booth nang walang surge charges.

Nakipag-partner anya sila sa nasabing Transport Network Vehicle Service bilang bahagi ng kanilang preparasyon ngayong Christmas season.

Layunin din nitong maibsan ang kinakaharap na mga hamon ng ilang pasahero sa NAIA, partikular ang mga walang sariling sasakyan na nahihirapang mag-commute.

Walang silbi kahit palawigin hanggang sa katapusan ng susunod na taon ang Executive Order 171 mababang taripa sa imported agricultural products, gaya ng bigas at baboy.

Ayon kay Federation of Free Farmers Cooperative FFFC National Manager Raul Montemayor, hindi naman na nagmura ang bigas maging ng iba pang agri-products.

Sa halip anya makinabang ang milyun-milyong Pilipino, pawang mga importer ang kumita at nagpapakasaya sa mababang tariff rate, lalo ngayong holiday season.

Iginiit ni Montemayor na malaking koleksyon sa buwis na ang nawawala sa gobyerno dahil sa mababang taripa.

Matapos ang dalawang taon, muling dumagit ng korona sa University Athletic Association of the Philippines (UAAP) Mens Senior Basketball ang Ateneo De Manila University Blue Eagles.

Naungusan ng Ateneo ang defending champions ang U.P. Fighting Maroons sa score na 75-68 sa Game 3 ng Season 85 finals, kagabi.

Dinumog ng nasa 22,000 expectator ang Araneta Coliseum upang saksihan ang  tinaguriang “Battle of Katipunan”.

Dinominahan ng Blue Eagles ang second half sa score na 47-32 hanggang sa lumobo sa 20 points ang kalamangan 52-32, sa nalalabing siyam na minuto ng 3^rd  quarter matapos ang lay-up ni Sean Quitevis mula sa pasa ni Angelo Kouame.

Gayunman, hindi nagpadaig ang Fighting Maroons makaraang magpakawala ng floater si James Spencer hanggang sa makabahol ang U.P. sa score na 56-50 sa nalalabing tatlong minuto ng 3^rd quarter.

Tinanghal namang finals Most Valuable Player si Kouame na nagpawakala double-double 19 points at 12 rebounds.

Ito na ang ika-12 kampyonato ng Blue Eagles sa Senior Men’s Basketball ng nasabing torneyo.

Nasa 550 katao o 167 pamilya ang apektado ng pagbaha bunsod ng walang tigil na ulan dulot ng shearline sa ilang bahagi ng Bicol Region.

Kabilang sa mga apektado ang mga residente ng Camarines Sur, Norte at Albay.

Ayon sa Provincial Disaster Risk Reduction and Management Office ng CamSur, kasalukuyang nasa evacuation center na ang tinatayang apatnaraang residente.

Nakaranas naman ng landslides sa mga Bayan ng Lagonoy, Presentacion, Garchitorena at Lupi.

Samantala, 44 na pasahero ang stranded sa Pasacao Port at 37 sa Pandan Port.

Niyanig ng lindol ang lalawigan ng Abra, kahapon.

Ala-5:05 ng hapon nang tumama ang magnitude 5.1 at natunton ang sentro sa layong tatlong kilometro, timog-silangan ng Bayan ng Pilar.

Naramdaman ang Intensity 5 sa Pilar at Lacub, Abra; intensity 4 sa Banayoyo, Ilocos Sur; Licuan-Baay, Abra; Intensity 3 sa Nueva Era, Ilocos Norte; San Fernando City, La Union;

Intensity 2 sa Baguio City; La Trinidad, Benguet habang intensity 1 sa Pasuquin, Ilocos Norte at Itogon, Benguet.

Ayon kay Phivolcs Science Research Assistant Dan Dy, tectonic ang origin ng lindol na may lalim na 8 kilometro.

Inaasahan anya ang aftershocks at pinsala matapos ang pagyanig.

Hulyo a – 27 nang tamaan din ng Magnitude 7 ang Abra at Magnitude 6.4 noong Oktubre a – 25 na kapwa nagdulot ng casualties at pinsala sa mga imprastraktura.