Drew Nacino

Mayorya ng mga Filipino ang naniniwalang gaganda ang kanilang pamumuhay sa susunod na anim na taon.

Batay ito sa isinagawang tugon ng masa survey ng OCTA research sa isanlibo dalawandaang respondents noong October 23 hanggang 27 na inilabas naman ang resulta kahapon.

Lumabas sa survey na 51% ng adult Filipinos ang nagsabing magiging maayos ang kanilang buhay sa susunod na anim na buwan, 40% ang naniniwalang walang pagbabago habang 6% ang nagsabing magiging malala.

Pinaka-marami ang may positibong pananaw sa Visayas, 65% habang pinaka-mababa sa Mindanao, 42%.

Inaasahan bukas ang pagdagsa sa Batangas Port ng mas maraming pasaherong uuwi sa mga probinsya para mag-Pasko.

Ayon kay Philippine Ports Authority (PPA) – Batangas Port Manager Joselito Sinocruz, tiyak na may hahabol na mga biyahero, partikular ang mga ngayon pa lamang nakapag-leave.

Sa ngayon anya ay mayroong average na 8,000 pasahero sa pantalan at naitala ang mas malaking bulto nitong Sabado pero maaari pang madagdagan simula ngayong araw.

Samantala, pinayuhan naman ni Sinocruz ang mga biyahero na magbaon ng maraming pasensya dahil sa mga posibleng aberya.

Tiniyak din ng PPA ang seguridad para sa kaligtasan ng mga pasahero.

Muling inakusahan ng Chinese Embassy ang U.S. na naguudyok ng kaguluhan sa pagitan ng Pilipinas at sina sa issue ng West Philippine Sea.

Ito ang tugon ng China sa pagkundena ni U.S. State Department spokesman Ned Price sa pagkukumpulan at panghihimasok ng mga Chinese Vessel sa Iroquois Reef at Sabina Shoal.

Tinawag din ito ni Price na panghihimasok ng China sa hanapbuhay ng mga mangingisdang Pilipino at pagbaliwala sa United Nations Convention on the Law of the Seas.

Ayon sa Chinese Embassy sa Pilipinas, walang katotohanan ang mga akusasyon sa kanila ng Amerika, na ang layunin ay pagsabungin ang Pilipinas at Tsina.

Iginiit pa ng embahada na ang patuloy na pakikisawsaw ng U.S. sa Maritime Dispute sa West Philippine Sea ang lumilikha ng tensyon at nakapipinsala sa kapayapaan sa Asia-Pacific Region.

Suportado ng Estados Unidos ang Pilipinas sa iginigiit nito sa China na respetuhin ang International Law of the Sea sa West Philippine Sea.

Sa gitna ito nang napaulat na muling pagkukumpulan ng mga Chinese vessel sa pinag-aagawang karagatan, kamakailan.

Ayon kay US State Department Spokesman Ned Price, ang pagkalat ng mga Chinese vessel sa bahagi ng Iroquois Reef at Sabina Shoal sa Spratly Islands ay panghihimasok sa hanapbuhay ng mga mangingisdang Pinoy.

Isa rin anya itong “repleksyon nang patuloy na pagbaliwala ng Tsina sa karapatan ng ibang claimants na nag-o-operate rin sa pinag-aagawang karagatan.

Aminado naman si Price na kabahagi rin ng Pilipinas ang Amerika sa paghahayag ng pangamba sa peligrosong paghaharap ng China Coast Guard at Philippine Navy sa South China Sea na ipinakita sa video sa Senado.

Partikular na tinukoy ng U.S. official ang privileged speech ni Senador Francis Tolentino na nagpakita sa video ng Chinese Coast Guard na kumuha ng isang rocket debris mula sa Philippine Navy sa Pag-asa Island na bahagi ng territorial waters ng Pilipinas.

Nananatiling ligtas ang mga turista sa kabila ng pagkakadiskubre ng mahigit 800 sinkholes sa isla ng Boracay sa Malay, Aklan.

Ito ang muling tiniyak ni Malay Mayor Frolibar Bautista sa gitna nang pagdagsa ng mga bakasyonistang mag-pa-Pasko sa Bora ngayong holiday season.

Ayon kay Bautista, hindi naman napakalalim at kalaki ang mga nakitang butas at hindi rin delikado para sa mga istrukturang nakatayo.

Nilinaw din ng Alkalde na hindi lahat ng espasyo sa isla ay tatayuan o tinatayuan ng mga gusali dahil may limitadong kapasidad ang isla at hindi naman mismong sa lupa nadiskubre ang mga sinkhole.

Inaasahang aabot sa 57 milyong pasahero ang daragsa sa iba’t ibang pantalan hanggang sa katapusan ng buwan o bago mag-bisperas ng bagong taon.

Ito ang inihayag ng Philippine Ports Authority (PPA) sa gitna nang patuloy na pagdami ng mga pasaherong mag-pa-Pasko sa mga probinsya.

Ayon kay PPA General Manager Jay Daniel Santiago, ang nasabing bilang ay mataas ng 200% sa mga naitalang bilang ng mga pasahero noong isang taon.

Dahil anya ito sa mas pinaluwag na travel restrictions sa kabila ng Covid-19 pandemic.

Nitong Lunes, pinulong ni Santiago ang mga opisyal ng Port Police at inilatag ang security measures na ipinatutupad ngayong holiday season.

Samantala, ganito rin ang magiging lebel ng kahandaan ng PPA sa pagbabalik naman ng mga biyahero matapos ang pagdiriwang ng bagong taon.

Binuksan na kahapon sa Pasig City ang isa sa pinaka-malaking dialysis centers sa bansa.

Ang bagong “Mega Dialysis Center” sa Barangay San Miguel ay mayroong total floor area na 1,390 square meters at 79 na dialysis machines.

Ayon kay Pasig City Mayor Vico Sotto, libreng makapagpapagamot ang mga Pasigueño sa nasabing pasilidad na itinayo sa tulong ng pribadong sektor.

Kabilang anya sa maaaring i-avail na treatment ng mga taga-Pasig na mayroong Renal Failure at nangangailangan ng Renal Replacement therapy ay Kidney Transplantation, Peritoneal Dialysis at Hemodialysis.

Sa pamamagitan ito ng “No-Balance Billing Scheme” nangangahulugang libre ang serbisyo, partikular sa mga taga-Pasig.

Karamihan ng medical services ay sasagutin ng PhilHealth, pero sakaling maging limitado ang partisipasyon ng PhilHealth ay mismong Pasig Local Government na ang sasalo sa gastos ng pasyente.

Muling dinepensahan ng Social Security System (SSS) ang panibagong dagdag kontribusyon ng mga miyembro at employer na lalarga simula sa susunod na taon.

Ipinaliwanag ni SSS President at CEO Michael Regino na makatutulong ang contribution hike upang pondohan ang mas mataas na benefit disbursements.

Ayon kay Regino, inihahanda na ng “four-stage” contribution rate hike ang SSS fund para sa pangangailangan sa hinaharap ng kanilang mga miyembro.

Ang pagtaas ng contribution rate ay alinsunod sa Republic Act 11199 o Social Security Act of 2018 na nilagdaan ni dating Pangulong Rodrigo Duterte upang itaas sa 15% ang kontribusyon sa taong 2025.

Sa ilalim ng RA 11199, ipapataw ang 1% contribution increase sa SSS members kada dalawang taon mula 12% noong 2019 hanggang maabot ang 15% sa 2025.

Simula sa Jan. 1 taong 2023, ang bagong contribution rate ay magiging 14% na.

Posibleng maabot na ang peak o rurok ng inflation sa bansa ngayong buwan.

Ito, ayon kay Bangko Sentral ng Pilipinas (BSP) Governor Felipe Medalla, ay matapos sumampa sa 14-year high ang inflation rate noong Nobyembre.

Nagdulot ang 8% annual inflation ng year-to-date rate na 5.6%, kumpara sa 2% hanggang 4% target ng BSP para sa kasalukuyang taon.

Magugunitang nirebisa ng Development Budget Coordination Committee ang Inflation Projection nito para sa taong 2022 sa 5.8%.

Mula ito sa kasalukuyang projection na 4.5% hanggang 5.5% dahil sa pananatili ng mataas na presyo ng pagkain at transportasyon.

Umapela na ang MERALCO sa Court of Appeals na alisin na ang Temporary Restraining Order sa kanilang Power Supply Agreement sa San Miguel Corporation Subsidiary na South Premire Power corporation (SPPC.)

Ipinunto ni MERALCO spokesman Joe Zaldarriaga na negatibo kasi ang epekto ng TRO sa mga consumer, partikular sa halos 7.6 milyon nilang customer.

Layunin anya nilang ma-protektahan ang publiko sa posibleng maging dulot ng dagdag-singil sa kuryente ngayong kumukuha na ang MERALCO ng mas mahal na supply ng kuryente mula sa planta ng Aboitiz.

Ipinanawagan din ng MERALCO sa CA na ibasura ang application para sa Writ of Preliminary Injunction ng SPPC.

Ipinunto ng nasabing power distributor sa kanilang mosyon na nagulo ang basic at essential services na ibinibigay ng SPPC, taliwas sa layunin ng TRO.

Nagkaroon din ng masamang epekto ito sa milyun-milyong Pilipinong pinaglilingkuran ng MERALCO.

Kung tutuusin ay mas mura ang PSA ng MERALCO at SPPC kung saan sinusuplayan ang power distributor ng 670 megawatts kumpara sa wholesale electricity spot market at Emergency Power Supply Agreement sa Aboitiz.

Inihirit din ng MERALCO sa Appellate Court na atasan ang SMC na ipagpatuloy ang implementasyon ng PSA upang maibalik ang mababang singil at maprotektahan ang publiko.