Drew Nacino

Hinatulang makulong ng anim hanggang walong taon ng sandiganbayan ang dalawang dating opisyal ng Department of Agriculture dahil sa pagbili ng overpriced liquid fertilizer.

Sa limampu’t anim na pahinang desisyon ng Anti-Graft Court noong December 2, guilty sa kasong graft sina dating Regional Executive Director Oscar Parawan at chief Accountant Maria Perlice Julian, mula sa DA Region 9.

Kaugnay ito sa pagbili ng mga overpriced liquid fertilizer na bahagi ng P728 million fertilizer fund scam.

Kinonvict ang dalawa sa pag-otorisa sa pag-transfer ng P5 million public funds sa non-government entity na masaganang ani para sa Magsasaka Foundation Incorporated (MAMFI) nang walang public bidding.

Ayon sa Korte, hinugot ang 5 million mula sa Priority Development Assistance Fund ni dating zamboanga Del Sur Representative Isidoro Real Jr, na kabilang din sa mga akusado pero inabswelto matapos pumanaw nitong Pebrero a-uno.

Mismong si Parawan ang pumasok sa memorandum of agreement sa MAMFI batay sa request ni real habang si Julian ang lumagda ng disbursement vouchers para i-release ang pondo.

Nag-ugat ang kaso sa pagsasabwatan nina Parawan, Julian at apat na iba pang kapwa akusado na bumili ng liquid fertilizers sa presyong P800 per 300 m.l. bottle, kumpara sa talagang presyo nitong P190 lamang.

Umapela si DWIZ anchor at Atty. Ferdie Topacio sa Office of the Ombudsman na muling buksan ang kaso ng Mamasapano o SAF 44.

Ito, ayon kay Topacio, ay dahil hindi pa rin nakakamit ang hustisya kahit pitong taon na ang nakalilipas.

Umaasa anya sila na ma-engganyo ang taongbayan na buksan muli ang kaso hindi dahil sa pelikulang Mamasapano, bagkus ay para sa mga naulila ng apatnapu’t apat na miyembro ng Special Action Force.

Iginiit ni Topacio na nais lamang niyang mabuksan ang isip ni Ombudsman Samuel Martires sa pamamagitan ng pelikula na halaw sa historical event.

Gayunman, naniniwala naman siyang hindi ganoon kababaw ang Ombudsman na ma-iimpluwensyahan ng pelikula, lalo’t isa itong dating associate justice ng Supreme Court.

Ang pelikulang Mamasapano na iprinoduce ng Borracho Films ni Topacio ay kabilang sa kalahok sa Metro Manila Film Festival.

Samantala, nakatakdang maghain sina Topacio ng “motion to re-open” hinggil sa kaso.

Gagamit na ng online payment ang National Housing Authority (NHA) sa pakikipagtulungan ng Maya Philippines upang palakasin ang pagbabayad ng monthly amortization sa pabahay.

Inihayag ni NHA General Manager Joeben Tai na magkakaroon ng pilot digital payments sa maya ang mga benepisyaryo ng special housing projects sa Region 2 at Cordillera Administrative Region.

Bukod sa payments, maaari rin anyang magbigay ang maya ng billing notices at remittances of collected payments sa pamamagitan ng email o s.m.s. notifications.

Idinagdag ni Tai na binuo ang konsepto ng online payment noong kasagsagan ng covid-19 pandemic.

Ikinalugod ng mga magsasaka sa Tarlac ang mataas na farm gate price ng lokal na sibuyas ngayong nagsimula na ang anihan.

Ayon kay Department of Agriculture deputy Spokesperson Rex Estoperez, paldo-paldo ang mga magsasaka ngayon dahil sa kawalan ng kakumpitensya na mga imported.

Inamin din sa DWIZ ni mang Gerry, isa sa mga onion farmer sa Tarlac, na ngayon lamang sila nakaranas ng ganitong kalaking kita.

Kung noong 2021 anya ay P400,000 lamang ang kanilang kinita, inaasahan nilang ma-do-doble o triple ito ngayong anihan.

Samantala, pinayuhan naman ni Estoperez ang mga consumer, lalo sa Metro Manila, na huwag muna bumili ng kada kilo ng sibuyas kung nagtitipid.

Muling binalaan ng Department of Agriculture ang mga consumer sa pagbili ng puting sibuyas.

Iginiit ni DA Deputy Spokesperson Rex Estoperez na hindi locally produced ang mga white onion bagkus ay ipinuslit sa bansa.

Ayon kay Estoperez, hindi sumailalim sa sanitary inspection o walang permit ang mga puslit na sibuyas na ibinebenta sa ilang pamilihan.

Maaari anyang tamaan ng sakit sakaling makatiyempo ng white onion na bagsak sa sanitary inspection kaya’t hindi dapat ipinagsasapalaran ang kalusugan ng mga consumer.

Kamakailan ay iniatras ng kagawaran ang planong ibenta ang mga nasabat na puslit na sibuyas sa kadiwa stores sa pangambang nagtataglay ang mga ito ng chemical residue at e. coli bacteria.

Aminado ang Land Transportation Franchising and Regulatory Board (LTFRB) na kulang ang mga bumibyaheng taxi at Transport Network Service Vehicles (TNVS) ngayong holiday season.

Ito’y sa gitna nang kalbaryong dinaranas ng mga commuter, lalo sa Metro Manila, bunsod ng christmas rush.

Ayon kay LTFRB Executive Director Roberto Paig, 18,142 lamang ang taxi units kahit mahigit 24,000 ang rehistrado at 8,427 TNVS units ang bumibyahe ngayong mag-pa-pasko.

Ipinanawagan anya nila sa mga operator na dagdagan ang kanilang mga unit at mag-hire ng karagdagang driver upang maibsan ang perwisyong dinaranas ng mga commuter sa paghihintay ng masasakyan.

Samantala, batay sa datos ng ahensya ngayong buwan pa lamang ay aabot na sa 177 formal complaints na ang kanilang natanggap sa ilalim ng oplan isnabero program pero wala pa sa kalahati ang nahuhuli.

Asahan na ang lalong pagbigat ng daloy ng trapiko sa mga expressway simula bukas dahil sa mga nagsisi-uwian sa probinsya para mag-pasko.

Ilan sa inaasahang pipilahan ang South Luzon Expressway, Star Tollway, Skyway, NAIA Expressway at Tarlac-La Union-Pangasinan Expressway na pawang ino-operate ng San Miguel Corporation (SMC).

Ayon kay SMC President Ramon Ang, libre ang toll sa mga nasabing expressway simula alas diyes ng gabi sa Sabado o sa bisperas ng pasko hanggang alas sais ng umaga ng linggo o sa mismong araw ng pasko.

Libre rin ang toll sa bisperas ng bagong taon simula alas diyes ng gabi hanggang sa mismong bagong taon, alas sais ng umaga ng Enero a – 1.

Gayunman, ibinabala ni Ang na kadalasang bumibigat ang daloy ng trapiko tuwing holiday kaya’t umapela siya sa mga motorista na magbaon ng mahabang pasensya at pang-unawa.

Dapat din anyang planuhing maigi ang biyahe, lalo ang mga mayroong flight.

Magdedeploy naman ng karagdagang personnel upang tumulong sa pag-scan ng autosweep cards ng mga nakapilang motorista.

Nito lamang Disyembre a – 1 inilunsad din ng SMC ang “Seamless Southern Tollways” initiative kasabay ng holiday rush para sa tuloy-tuloy na biyahe.

Patuloy na dinaragsa ng mga last minute christmas shopper ang Divisoria, Maynila at Baclaran sa Pasay at Parañaque.

Sa pagtaya ng Manila Police District, aabot na sa kalahating milyon ang mga namimili sa Divisoria kada araw.

Muling pina-aalalahanan ng M.P.D. ang publiko na panatilihin ang health protocols para sa kanilang kaligtasan at ingatan ang mga gamit, tulad ng cellphone at wallet.

Inabisuhan din ng pulisya ang mga mamimili na hangga’t maaari ay iwasan nang magdala ng mga bata o senior citizen sa mga siksikan at mataong lugar.

Sa Baclaran naman, halos magkapalitan na ng mukha ang mga tao dahil nagkasabay ang mga nagsisimba sa National Shrine of our Mother of Perpetual Help at namimili ng kanilang mga pamasko.

Samantala, binalaan ng MMDA ang mga vendor na lumalampas na sa kalsada at inutusan ang mga ito na tumabi upang makadaan ang mga tao at sasakyan.

Sa gitna nang kalbaryo sa paghahanap ng taxi at pag-book ng Grab ngayong holiday rush, ilang commuter na ang nagpapa-book bilang “package”.

Halos triple na ngayon ang booking ng mga padala ayon sa delivery service app na Lalamove pero ang ilan ay pasahero pala na nahihirapang sumakay.

Bukod sa request ng mga commuter na umangkas, nakararanas din ang ilang rider ng nasabing delivery service app na may mga nag-re-request na magsakay ng hayop pero kanila itong tinatanggihan.

Ipina-alala naman ng lalamove na hindi sila nag-bo-book o nagsasakay ng pasahero, hayop man o tao.

Ipinagbabawal ding magpa-deliver ng matatalas na bagay at iligal na droga.

Nito lamang weekend, bumigat ang daloy ng trapiko sa Metro Manila dahil sa mga kaliwa’t kanang christmas party at pagdami ng mga tao, partikular sa mga mall.

Ikinababahala ng gobyerno ang napaulat na reclamation activities ng China sa ilang unoccupied features sa Spratly Islands sa West Philippine Sea.

Reaksyon ito ng Department of Foreign Affairs sa ulat ng international media outlet na Bloomberg na nagtatayo ang tsina sa ilang unoccupied land features malapit sa teritoryong okupado ng Pilipinas.

Ayon kay Foreign Affairs Spokesperson Maria Teresita Daza, sinusuring mabuti at bineberipika ng DFA ang katotohanan sa nasabing ulat.

Kung totoo man anya ang nasabing ulat ay taliwas anya ito sa self-restraint na nakasaad declaration of conduct (DOC) sa South China Sea at 2016 Arbitral Award.

Ang DOC, na nilagdaan ng China at sampung miyembro ng Association of Southeast Asian Nations noong 2002, ay malinaw na nagpahayag na ang lahat ng partido ay dapat iwasan ang pagsasagawa ng aktibidad na makagugulo at maka-aapekto sa kapayapaan sa West Philippine Sea.