Drew Nacino

Hiniling ng ilang consumer group sa Energy Regulatory Commission (ERC) na dapat otomatiko silang kasali sa anumang talakayan at pagdedesisyon o public consultation sa singilan ng kuryente.

Sa gitna ito nang inaasahang pagtaas muli ng singil sa kuryente sa enero sa ilang kadahilanan, gaya ng pagtatapos ng isa sa tatlong refund ng MERALCO at suspensyon ng kanilang Power Supply Agreement (PSA) sa isa sa mga planta ng San Miguel Corporation.

Sa ngayon ay hindi kasali ang consumer groups sa anumang usapin halimbawa na lamang ng pagrepaso sa PSA kaya kanilang ipinanawagan na amyendahan ang Magna Carta of Electricity Consumers.

Ayon kay kuryente.org National Coordinator Roland Vibal, dapat silang isama sa mga konsultasyon dahil lahat naman ay electricity consumers na pangunahing nagbabayad.

Bilang tugon, inihayag ni ERC Chairperson Monalisa Dimalanta na maaari nilang pag-aralan ang hiling ng grupo ng mga consumer.

Nagtataka ang ilang sugar producers sa rekomendasyong mag-angkat ng karagdagang 64,000 metric tons ng asukal ngayong “full swing” na ang milling season.

Binigyang-diin ni National Federation of Sugar Workers (NSFW) Secretary General John Milton “Butch” Lozande na sa Marso o Abril dapat mag-angkat o panahon kung saan malalaman ang eksaktong dami ng produksyon.

Ayon kay Lozande, nagkaroon na ng dalawang bugso ng importasyon ngayong taon bukod pa sa halos 3.8-M metric tons na local production na dapat ay sapat para sa mahigit 2-M metric tons ng consumption kada taon.

Ipinunto naman ng Department of Agriculture na mataas ang presyo ng asukal, kulang ang supply at para mapababa ito ay importasyon ang sagot ng gobyerno.

Gayunman, nagtataka si Lozande at hinihinala nilang mayroong manipulasyon sa supply at presyo ng asukal dahil nagmura na ito noong Oktubre subalit tumaas muli noong Nobyembre hanggang pagpasok nitong Disyembre.

Para anya sa kanilang mga producer ay dapat nagsisimula nang bumaba ang presyo lalo’t nagpapatuloy ang gilingan na pasok sa peak season ng milling ngayong buwan hanggang Pebrero.

Iginiit ng NSFW na kung tutuusin ay wala pang dapat ikabahala pagdating sa supply dahil lahat ng mills sa buong bansa ay operational.

Samantala, iminungkahi ni Lozande na para maibsan ang epekto ng mataas na inflation ay pansamantalang tanggalin ang VAT sa basic goods, gaya ng asukal at magtakda ng price cap sa halip na mag-angkat na naman.

Hindi pa pinal ang Memorandum Order Circular no. 77 ng Sugar Regulatory Administration (SRA) na nagre-rekomendang mag-angkat ng karagdagang 64,050 metric tons ng asukal.

Ito ang nilinaw ng DA sa kabila ng pagtutol ng grupong United Sugar Producers Federation sa nasabing plano.

Ayon kay DA Deputy Spokesperson Rex Estoperez, dedesiyunan pa ng Minimum Access Volume Advisory Council ang rekomendasyon base sa magiging resulta ng mga konsultasyon sa mga consumer at producers.

Mayroon pa naman din anyang imbentaryo batay sa datos ng SRA pero nakalaan ito para sa industrial users at nagiging issue lamang ang allocated supply para sa mga palengke at supermarket.

Ipinunto ng DA na mataas kasi ang presyo pero kulang ang supply at para mapababa ito ay importasyon ang sagot ng gobyerno.

Una nang naglabas ang SRA ng Sugar Order no. 4 noong Agosto pero naudlot nang ihayag ng Malakanyang na wala itong basbas ni Pangulong Bongbong Marcos na kalihim ng DA.

Tinutulan ng sugar producers group na United Sugar Producers Federation (UNIFED) ang rekomendasyon ng Department of Agriculture na mag-aangkat muli ng asukal.

Ayon kay UNIFED President Manuel Lamata, sobra-sobra sa ngayon ang suplay ng asukal dahil nagpapatuloy ang anihan.

Ang tunay anyang problema ay mataas na presyo ng asukal at pagpapatupad ng suggested retail price.

Ipinunto ni lamata na binibili sa kanila ng P60 ang kada kilo ng asukal pero P100 na ito pagdating sa ibang lugar, partikular sa Metro Manila.

Idinagdag ng UNIFED na nasa 1-M metric tons ng asukal ang inaasahan nilang ma-po-produce hanggang matapos ang milling season sa Abril.

Una nang inilabas ang Memorandum Order Circular no. 77 na nilagdaan ni DA Senior Undersecretary Domingo Panganiban na nagrerekomenda sa Minimum Access Volume (MAV) Advisory Council na agarang mag-angkat ng 64,050 metric tons ng refined sugar.

Nakasaad din sa kautusan na labis na nangangamba si Pangulong Bongbong Marcos sa mataas na inflation rate at naitalang taunang pagtaas ng inflation para sa mga sugar, confectionery at dessert products na umabot sa 38%.

Karagdagang 639 special permits para sa provincial buses ang inilabas na ng Land Transportation Franchising and Regulatory Board sa gitna nang pagdagsa ng mga pasahero ngayong holiday season.

Ayon kay LTFRB Technical Division Chief Joel Bolano, pawang papuntang North at South ang inilabas na special permits.

Bagaman sarado na anya ang aplikasyon para sa special permit, magpapalabas sila ng mas maraming special permits sakaling kailanganin para sa karagdagang units sa bus operations.

Tiniyak naman ni Bolano na manageable pa ang sitwasyon sa bus terminals sa harap ng patuloy na pagdagsa ng mga pasahero dalawang araw bago mag-pasko.

Pinayagan na ng MMDA na magbalik normal na ang oras ng operasyon ng mga mall sa Metro Manila.

Maaari nang simulan ngayong araw alas-9:00 ng umaga ang operasyon ng mga mall kumpara sa dating alas-11:00 ng umaga hanggang alas-11:00 ng gabi.

Ito, ayon kay MMDA acting Chairman Romando Artes, ay upang mabigyan ng mas maraming panahon ang publiko na makapag-last-minute Christmas shopping.

Una nang itinakda simula November 14 hanggang January 6, 2023 ang 11:00AM hanggang 11:00PM schedule  upang maiwasan ang rush hour.

Gayunman, batay sa bagong memorandum circular, inihayag ni Artes na hindi naramdaman ang mabigat na daloy ng trapiko ngayong Christmas season dahil sa inilatag na “pre-emptive measures” sa kabila ng kaliwa’t kanang pagtitipon at aktibidad.

Noon lamang isang linggo inamin ng ahensya na ang mabigat na daloy ng trapiko sa kalakhang Maynila ay dulot ng Christmas rush na naging kalbaryo naman para sa mga commuter dahil sa pahirapang pagsakay sa mga public transportation, tulad sa mga taxi.

Isang unidentified flying object (UFO) ang namataan sa ilang lugar sa Pangasinan.

Nakunan ng litrato ng ilang residente sa Sison, Mangaldan, Villasis, Natividad, San Nicolas, San Quintin, Tayug ang nasabing air vessel.

Kabilang sa mga nakakita sa pamamagitan ng telescop si dating Calasiao Mayor Roy Macanlalay dakong alas dos ng hapon noong Martes.

Nagtagal umano ang air vessel sa himpapawid nang halos apatnapu’t limang minuto bago tuluyang naglaho.

Tumanggi namang magbigay ng pahayag ang Armed Forces of the Philippines at itinuro ang Department of National Defense na dapat hingan ng komento.

Batay sa pagsisiyasat ng DWIZ, ang nasabing air vessel ay may pagkakahawig sa tethered aerostat radar system (TARS), na tinatawag ding spy blimp na idineliver ng U.S. sa Philippine Navy noong 2017, layuning makapangalap ng impormasyon mula sa airspace.

Mayroon ding ganitong kahalintulad na air vessel ang China na idineploy naman sa West Philippine Sea.

Magsasagawa na ng soil re-investigation ang Department of Public Works and Highways upang mabatid ang sanhi ng “vertical displacement” o paglubog ng bagong tayong flyover sa Iloilo City.

Kamakailan ay ininspeksyon ng Regional Development Council (RDC) sa pangunguna ng National Economic and Development Authority-Western Visayas ang Ungka flyover na bumabagtas sa nasabing lungsod hanggang bayan ng Pavia.

Ayon kay Councilor Ely Estante, napag-alaman na itinayo sa isang replacement pile ang pundasyon ng nasabing istruktura na nagkakahalaga ng P680 million at pinondohan sa pagpupursige ni dating Senador Franklin Drilon.

Naniniwala anya ang RDC na ang vertical displacement ng four-lane flyover sa tatlo nitong pundasyon ay maaaring dulot ng pag-uga ng lupa lalo’t nakatirik ito malapit sa fault line.

Nadiskubre rin na manipis ang layer na pinagtayuan ng pundasyon at malambot ang lupa sa ilalim kaya’t umuuga at tila lumulubog.

Inirekomenda naman ng RDC na i-review ang commitment ng DPWH at contractor na International Builders Corporation upang matugunan ang nasabing problema.

Hunyo a – 30 nang bahagyang buksan ang Ungka flyover at tuluyang binuksan sa mga motorista noong September 6 pero makalipas ang labindalawang araw ay isinaraw ng DPWH dahil sa reklamong mauga ang tulay.

Mag-a-angkat ng karagdagang sugar supply ang Pilipinas.

Ito’y sa kabila nang iginigiit ng mga producer na sapat ang local supply bukod pa sa naunang 150,000 metric tons ng imported na asukal na nagsimulang dumating nitong Nobyembre.

Sa katunayan ay pinabibilisan na ni pangulong Bongbong Marcos, na kalihim ng Department of Agriculture, ang pag-import ng dagdag 64,050 metric tons ng refined sugar upang mapatatag ang presyo nito sa merkado.

Alinsunod sa DA Memorandum Order 77, na nilagdaan noong December 20 ni Agriculture Senior Undersecretary Domingo Panganiban, inatasan si minimum access volume o mav Secretariat Officer-in-Charge at Exec. Dir. Jocelyn Salvador na agarang i-convene ang mav advisory council.

Ang mav ay tumutukoy sa dami ng isang partikular na agricultural product na maaaring angkatin sa mas mababang taripa.

Nakasaad din sa kautusan na labis na nangangamba ang pangulo sa mataas na inflation rate.

Batay sa datos ng kagawaran noong Nobyembre, ang taunang pagtaas ng inflation para sa mga sugar, confectionery at dessert products ay umabot sa 38%.

Muling tiniyak ng Philippine Ports Authority ang seguridad at kaligtasan ng mga biyaherong mag-uuwian sa mga probinsya ngayong christmas rush.

Ayon kay PPA Spokesperson Eunice Samonte, mahigpit ang kanilang koordinasyon sa iba pang ahensya ng gobyerno sa gitna nang pagdagsa ng milyun-milyong biyahero, lalo bukas.

Aminado naman si Samonte na hindi minsan maiwasan ang ilang aberya, gaya ng atrasadong schedule ng mga barko, lalo’t nakararanas din ng traffic congestion sa mga pantalan.