Isang bagong kaso ng fireworks-related injury mula sa 61 ang naitala ng DOH simula noong Miyerkules, Disyembre 21.
Kumpara ito sa zero case na naitala sa parehong panahon noong nakaraang taon.
Pinayuhan naman ng kagawaran ang publiko na umiwas sa paputok upang magdiwang nang kumpleto at ligtas ang buong pamilya ngayong pasko at bagong taon.
Una nang hinikayat ni Pangulong Bongbong Marcos sa mga LGU na mag-organisa na lamang ng fireworks display.
Inatasan na ng Department of National Defense (DND) ang Armed Forces of the Philippines (AFP) na palakasin ang presensya nito sa West Philippine Sea.
Ito’y bunsod ng mga aktibidad umano ng China sa “unoccupied” features sa Spratly Islands na inaangkin ng Pilipinas.
Ayon sa DND, anumang paghihimasok sa West Philippine Sea o reclamation sa unoccupied features ay banta sa seguridad sa Pag-Asa Island na bahagi ng teritoryo ng bansa.
Isa rin anila itong peligro sa yamang dagat at nagpapahina sa katatagan ng Asia-Pacific Region.
Ang Lankiam Cay ang “pinakamaliit” sa unoccupied features sa Spratly Islands, na pinangangasiwaan ng Pilipinas bilang bahagi ng Kalayaan, Palawan.
Itinuturing ding bahagi ng exclusive economic zone ng Pilipinas ang Whitsun Reef na tinatawag namang Julian Felipe Reef.
Una nang nagpahayag ng labis na pagkabahala ang Department of Foreign Affairs sa balitang nagtatayo umano ang Tsina ng mga imprastruktura sa mga nasabing teritoryo na malapit sa Pag-Asa Island.
Aabot sa P20-M na halaga ng mga puslit na sibuyas na mula China ang nasabat ng Bureau of Customs (BOC) sa Mindanao Container Terminal (MCT) Port sa Misamis Oriental.
Ang dalawang container na naglalaman ng 50 toneladang sibuyas na idineklarang tinapay at iba’t ibang klase ng pastries mula China ay dumating sa Cagayan De Oro City noong December 6.
Ayon kay BOC Commissioner Yogi Filemon Ruiz, nakatanggap sila ng intelligence information hinggil sa mga container na daraan sa MCT Port na naglalaman ng mga smuggled na sibuyas.
Dahil dito, agad anyang nag-isyu ng pre-lodgement control order si Port of Cagayan De Oro District Collector Alexandra Lumontad laban sa nasabing kargamento.
Iginiit naman ni Ruiz na hangga’t nahuhumaling ang ilang negosyante na mag-smuggle ng mga producto, partikular ng pagkain.
Gayunman, hindi anya nila ito hahayaang mangyari dahil taumbayan ang labis na apektado ng pagtaas ng presyo ng mga bilihin.
Naghain na ang Energy Regulatory Commission (ERC) ng petisyon sa Court of Appeals upang harangin ang Temporary Restraining Order (TRO) na pabor sa San Miguel Corporation (SMC) subsidiary na South Premiere Power Corporation.
Ito ang kinumpirma ni ERC Chairperson Monalisa Dimalanta kasabay ng pagbubunyag, na nag-file rin ng kahalintulad na petisyon ang Meralco sa CA.
Una nang inihayag ni Dimalanta na dapat nang maghanda ang consumers sa posibleng mas mataas na singil sa kuryente sa susunod na taon.
Gayunman, posibleng mabawasan ang dagdag-singil kung papayag ang SMC sa apela ng Meralco na pasanin ang price difference sa pagitan ng orihinal na presyo sa kontrata at ng kasalukuyang presyo ng kuryente mula sa spot market at emergency power supply agreements.
Sinisikap din anya nila na ipagpaliban pa hanggang sa ikalawang quarter ng susunod na taon ang implementasyon ng desisyon ng supreme court noong 2013 na nag-o-otorisa na magpatupad ng mas mataas na generation charge.
Magugunita noong 2013 ay tumaas ang generation charge dahil sa malampaya shutdown sa gitna ng mga naranasang pagnipis ng reserbang kuryente.
Hiniling ng ilang consumer group sa Energy Regulatory Commission (ERC) na dapat otomatiko silang kasali sa anumang talakayan at pagdedesisyon o public consultation sa singilan ng kuryente.
Sa gitna ito nang inaasahang pagtaas muli ng singil sa kuryente sa enero sa ilang kadahilanan, gaya ng pagtatapos ng isa sa tatlong refund ng MERALCO at suspensyon ng kanilang Power Supply Agreement (PSA) sa isa sa mga planta ng San Miguel Corporation.
Sa ngayon ay hindi kasali ang consumer groups sa anumang usapin halimbawa na lamang ng pagrepaso sa PSA kaya kanilang ipinanawagan na amyendahan ang Magna Carta of Electricity Consumers.
Ayon kay kuryente.org National Coordinator Roland Vibal, dapat silang isama sa mga konsultasyon dahil lahat naman ay electricity consumers na pangunahing nagbabayad.
Bilang tugon, inihayag ni ERC Chairperson Monalisa Dimalanta na maaari nilang pag-aralan ang hiling ng grupo ng mga consumer.
Nagtataka ang ilang sugar producers sa rekomendasyong mag-angkat ng karagdagang 64,000 metric tons ng asukal ngayong “full swing” na ang milling season.
Binigyang-diin ni National Federation of Sugar Workers (NSFW) Secretary General John Milton “Butch” Lozande na sa Marso o Abril dapat mag-angkat o panahon kung saan malalaman ang eksaktong dami ng produksyon.
Ayon kay Lozande, nagkaroon na ng dalawang bugso ng importasyon ngayong taon bukod pa sa halos 3.8-M metric tons na local production na dapat ay sapat para sa mahigit 2-M metric tons ng consumption kada taon.
Ipinunto naman ng Department of Agriculture na mataas ang presyo ng asukal, kulang ang supply at para mapababa ito ay importasyon ang sagot ng gobyerno.
Gayunman, nagtataka si Lozande at hinihinala nilang mayroong manipulasyon sa supply at presyo ng asukal dahil nagmura na ito noong Oktubre subalit tumaas muli noong Nobyembre hanggang pagpasok nitong Disyembre.
Para anya sa kanilang mga producer ay dapat nagsisimula nang bumaba ang presyo lalo’t nagpapatuloy ang gilingan na pasok sa peak season ng milling ngayong buwan hanggang Pebrero.
Iginiit ng NSFW na kung tutuusin ay wala pang dapat ikabahala pagdating sa supply dahil lahat ng mills sa buong bansa ay operational.
Samantala, iminungkahi ni Lozande na para maibsan ang epekto ng mataas na inflation ay pansamantalang tanggalin ang VAT sa basic goods, gaya ng asukal at magtakda ng price cap sa halip na mag-angkat na naman.
Hindi pa pinal ang Memorandum Order Circular no. 77 ng Sugar Regulatory Administration (SRA) na nagre-rekomendang mag-angkat ng karagdagang 64,050 metric tons ng asukal.
Ito ang nilinaw ng DA sa kabila ng pagtutol ng grupong United Sugar Producers Federation sa nasabing plano.
Ayon kay DA Deputy Spokesperson Rex Estoperez, dedesiyunan pa ng Minimum Access Volume Advisory Council ang rekomendasyon base sa magiging resulta ng mga konsultasyon sa mga consumer at producers.
Mayroon pa naman din anyang imbentaryo batay sa datos ng SRA pero nakalaan ito para sa industrial users at nagiging issue lamang ang allocated supply para sa mga palengke at supermarket.
Ipinunto ng DA na mataas kasi ang presyo pero kulang ang supply at para mapababa ito ay importasyon ang sagot ng gobyerno.
Una nang naglabas ang SRA ng Sugar Order no. 4 noong Agosto pero naudlot nang ihayag ng Malakanyang na wala itong basbas ni Pangulong Bongbong Marcos na kalihim ng DA.
Tinutulan ng sugar producers group na United Sugar Producers Federation (UNIFED) ang rekomendasyon ng Department of Agriculture na mag-aangkat muli ng asukal.
Ayon kay UNIFED President Manuel Lamata, sobra-sobra sa ngayon ang suplay ng asukal dahil nagpapatuloy ang anihan.
Ang tunay anyang problema ay mataas na presyo ng asukal at pagpapatupad ng suggested retail price.
Ipinunto ni lamata na binibili sa kanila ng P60 ang kada kilo ng asukal pero P100 na ito pagdating sa ibang lugar, partikular sa Metro Manila.
Idinagdag ng UNIFED na nasa 1-M metric tons ng asukal ang inaasahan nilang ma-po-produce hanggang matapos ang milling season sa Abril.
Una nang inilabas ang Memorandum Order Circular no. 77 na nilagdaan ni DA Senior Undersecretary Domingo Panganiban na nagrerekomenda sa Minimum Access Volume (MAV) Advisory Council na agarang mag-angkat ng 64,050 metric tons ng refined sugar.
Nakasaad din sa kautusan na labis na nangangamba si Pangulong Bongbong Marcos sa mataas na inflation rate at naitalang taunang pagtaas ng inflation para sa mga sugar, confectionery at dessert products na umabot sa 38%.
Karagdagang 639 special permits para sa provincial buses ang inilabas na ng Land Transportation Franchising and Regulatory Board sa gitna nang pagdagsa ng mga pasahero ngayong holiday season.
Ayon kay LTFRB Technical Division Chief Joel Bolano, pawang papuntang North at South ang inilabas na special permits.
Bagaman sarado na anya ang aplikasyon para sa special permit, magpapalabas sila ng mas maraming special permits sakaling kailanganin para sa karagdagang units sa bus operations.
Tiniyak naman ni Bolano na manageable pa ang sitwasyon sa bus terminals sa harap ng patuloy na pagdagsa ng mga pasahero dalawang araw bago mag-pasko.
Pinayagan na ng MMDA na magbalik normal na ang oras ng operasyon ng mga mall sa Metro Manila.
Maaari nang simulan ngayong araw alas-9:00 ng umaga ang operasyon ng mga mall kumpara sa dating alas-11:00 ng umaga hanggang alas-11:00 ng gabi.
Ito, ayon kay MMDA acting Chairman Romando Artes, ay upang mabigyan ng mas maraming panahon ang publiko na makapag-last-minute Christmas shopping.
Una nang itinakda simula November 14 hanggang January 6, 2023 ang 11:00AM hanggang 11:00PM schedule upang maiwasan ang rush hour.
Gayunman, batay sa bagong memorandum circular, inihayag ni Artes na hindi naramdaman ang mabigat na daloy ng trapiko ngayong Christmas season dahil sa inilatag na “pre-emptive measures” sa kabila ng kaliwa’t kanang pagtitipon at aktibidad.
Noon lamang isang linggo inamin ng ahensya na ang mabigat na daloy ng trapiko sa kalakhang Maynila ay dulot ng Christmas rush na naging kalbaryo naman para sa mga commuter dahil sa pahirapang pagsakay sa mga public transportation, tulad sa mga taxi.