Drew Nacino

Inendorso na sa plenaryo ng kamara ng Committee on Government Enterprises and Privatization ang panukalang ibaba ang optional retirement age ng mga empleyado ng pamahalaan sa 56 mula sa kasalukuyang 60.

Aamyendahan ng House Bill 206 ang Section 13-A ng Government Service Insurance System (GSIS) Act of 1997 o Republic Act 8291.

Alinsunod sa RA 8291, ang mga GSIS member ay makatatanggap ng retirement benefit kung nakapagserbisyo nang hindi bababa sa 15 taon;

Walang natatanggap na buwanang pensyon mula sa permanent total disability at hindi bababa sa 60 ang edad sa panahon ng pagreretiro.

Umabot sa mahigit 16,000 teaching at non-teaching personnels ang na-hire ng Department of Education ngayong taon.

Batay sa year-end report ng DepEd, nasa 11,500 guro ang na-hire habang nasa 5,000 administrative officer ang nilikha upang gumawa ng administrative loads ng mga guro.

Magugunitang inamin ni DepEd Spokesperson, Atty. Michael Poa na kabilang ang kakulangan sa mga guro sa mga hamong kinakaharap nila ngayong academic year.

Plano rin anya nilang mag-hire pa ng mahigit sa 10,000 guro para naman sa school year 2023-2024.

Mananatiling libre ang sakay sa Pasig River Ferry Service hanggang sa susunod na taon.

Tiniyak ni Metropolitan Manila Development Authority acting Chairman Romando Artes na may sapat na pondo para sa libreng sakay sa mga pasahero.

Para sa taong 2023, P79.96-M ang inaprubahang pondo ng kongreso para sa Pasig River Ferry Service.

Simula pa noong Disyembre 2019 ang libreng sakay nang magbukas muli ang ferry service mula Pinagbuhatan, Pasig City hanggang Escolta, Maynila.

Ilan pang pasyalan sa loob at labas ng Metro Manila ang dinagsa kasabay ng pagdiriwang ng pasko kahapon.

Kabilang sa pinilahan ng mga bata pati matatanda ang mga amusement o theme park, gaya ng Star City sa Pasay City at Mini-Fiesta Carnival sa Cubao, Quezon City.

May mga namasyal din sa Enchanted Kingdom sa Santa Rosa City, Laguna.

Pami-pamilya naman ang nagpunta sa Tagaytay City, Cavite kung saan kabilang sa dinagsa ang Picnic Grove at People’s Park upang masilayan ang Taal Volcano.

Ganito rin ang naging sitwasyon sa kalapit na Sky Ranch Theme Park.

Sa kabila nito, muling hinimok ng Office of the Press Secretary ang publiko na i-prayoridad ang health protocols dahil mayroon pa ring banta ng COVID-19.

Sinimulan na ng Department of Social Welfare and Development (DSWD) ang relief operations sa mga apektado ng flashfloods bunsod ng malakas na pag-ulan sa ilang bahagi ng Visayas at Mindanao.

Alinsunod ito sa direktiba ni Pangulong Bongbong Marcos sa DSWD Field Offices sa Eastern Visayas at Northern Mindanao.

Namahagi ang mga nasabing field office ng food packs sa mga residenteng apektado sa Eastern Samar, Misamis Oriental, Misamis Occidental, Camiguin at Bukidnon.

Ayon kay DSWD-Region 7 Director Grace Subon, kabuuang 32,458 individuals ang naapektuhan ng pagbaha sa mga bayan ng Jipapad, Oras, Arteche, Mercedes, Taft at Giporlos sa Eastern Samar nitong weekend.

Inihayag naman ni Region 10 Director Ramel Jamen na 45,687 individuals sa mga lalawigan ng Misamis Oriental, Misamis Occidental, Camiguin at Bukidnon ang nakatanggap na ng tulong.

Mayorya anya ng mga apektadong indibidwal ang nananatili sa evacuation centers.

Nagsimula ang pag-ulan sa mga nasabing lugar nitong Biyernes dahil sa shear line.

Bababa simula sa Enero ng susunod na taon ang income tax ng mga individual taxpayers kaya’t inaasahan na ang pagkakaroon nila ng mas mataas na take home pay.

Ito, ayon sa Bureau of Internal Revenue (BIR), ay dahil sa Tax Reform for Acceleration and Inclusion (TRAIN) Law.

Mananatili namang exempted sa pagbabayad ng personal income tax ang mga manggagawang may annual taxable income na mababa sa 250,000 pesos.

Para sa ibang taxpayers, maliban sa may taxable income na mahigit P8-M, magkakaroon ng mas mababang tax rates mula 15% hanggang 30% sa taong 2023, mula sa dating 20% hanggang 32%.

Samantala, ang mga top individual taxpayer na may annual taxable income na lampas P8-M ay may mas mataas na tax rate na 35% mula sa kasalukuyang 32%.

Ang bagong annual individual income tax rates ay bababa ng 5% para sa mga may taxable income o higit pa sa P250,000 hanggang P2-M habang 2% decrease sa tax rate sa mga indibidwal na may taxable income na higit P2-M hanggang P8-M.

Kumpara ito sa income tax rates na ipinatupad sa inisyal na implementasyon ng TRAIN Law noong 2018.

Binalaan ng National Privacy Commission (NPC) ang publiko laban sa pagkalat ng e-mails at text messages na naglalaman ng mga peke at malisyosong panuntunan at link hinggil sa registration ng sim cards at virtual wallets.

Ayon sa NPC, maaaring ‘phishing at smishing attempts’ ang mga kumakalat na pekeng emails at text messages na isinasagawa ng mga sindikato upang makapangalap ng datos ng mga indibidwal na target nilang biktimahin.

Pinayuhan naman ng komisyon ang publiko na huwag magbigay ng anumang personal na impormasyon sa pamamagitan ng mga naturang email at text message at iwasan ding i-click ang anumang link o URLs.

Dapat ding antabayanan na lamang ng mga subscriber ang opisyal na guidelines na ilalabas ng department of information and communictions technology at national telecommunications commission hinggil sa sim card registration.

Bukas opisyal nang sisimulan ang pagpapatupad ng Sim Registration Law.

Mahigit 58,000 pasahero ang na-monitor ng Philippine Coast Guard (PCG) sa iba’t ibang pantalan, hanggang kahapon o sa mismong araw ng pasko.

Batay sa datos ng PCG, pinaka-marami ang naitalang outbound passenger na 31,000 habang 27,000 ang inbound passengers.

Ayon sa ahensya, karamihan sa mga biyahero ay umuuwi sa kani-kanilang probinsya upang magdiwang ng pasko at samantalahin ang mahabang holiday weekend kasama ang pamilya.

Nag-deploy naman ang PCG ng mahigit 2,400 frontline personnel sa 15 coast guard districts upang matiyak ang kaligtasan at seguridad ng lahat ng pasahero.

Nananatiling naka-heightened alert ang coast guard hanggang Enero 7 sa gitna nang pagdagsa ng mga biyahero ngayong holiday season.

Mahigit 1,000 pamilya sa Northern Mindanao ang nagsilikas bunsod ng walang tigil na pag-ulan simula pa noong bisperas ng pasko.

Karamihan o nasa 700 pamilya, na binubuo ng halos 2,000 katao, ay pawang residente ng  apat na lungsod at ilang bayan sa Misamis Oriental.

Ayon sa Office of the Civil Defense – Region 10, mahigit 500 pamilya o halos 2,400 katao naman ang nagsilikas sa mga bayan ng Sinacaban at Jimenez, Misamis Occidental.

Hanggang nitong kahapon sa mismong araw ng pasko, humupa na ang baha sa ilang lugar.

Magugunitang naglabas ang pagasa ng heavy rainfall warning signal dulot ng shearline at wind convergence weather system sa nasabing rehiyon noong Biyernes.

Sa gitna nang pagsalubong sa pasko, mahigit 300 pamilya ang apektado nang pagbaha at paghampas ng naglalakihang alon sa bayan ng Pola, Oriental Mindoro.

Nawasak ang mga bahay at resort sa mga barangay ng Bayanan, Batuhan, Pula Zones 1 at 2 bunsod ng naglalakihang alon.

Ayon kay Pola Mayor Jennifer Cruz, umapaw ang tubig sa dike bunsod ng malakas na pag-ulan.

Tiniyak naman ni Cruz na nahatiran na ng relief goods ang mga apektadong pamilya.